Orugamba orurikukirayo orurarwanairwe.
<< prev
next >>
Orugamba rurwanirwa. Omu biteekateeko.
William Branham.Read the full account in...
Orugamba orurikukirayo orurarwanairwe.Hati, orugamba rwona rutakatebeekanisiibwe, baine kubanza baatoorana omwanya gw'okubuganiramu, nari omwanya ogu orugamba ruraarwanirwemu, omwanya ogutoorainwe. Omu Rutaro rw'Ensi Yoona rw'Okubanza, rukaba rutebeekanisiibwe gye munonga, omwanya ahagati y'amahanga abiri ogutaine mukama waagwo n'emyanya ei baarwaniiremu. Kandi nihateekwa kubaho omwanya ogutoorainwe. Nk'obu Isreali yaaza omu rutaro n'Abafilistia, hakaba hariho a- a- akabungo ahari buri rubaju ahu baateeraniire. Kandi aho niho Goliasi yaarugireyo reero yaayeta engabo za Isreali. Aho niho Daudi yaamubugaine, omu ruhanga, ku yaayambukire akagyera kakye akarikuraba ahagati y'obubungo bubiri, yaatoorotoora amabaare. Nihateekwa kubaho omwanya ogutoorainwe.
Kandi omuri eki, hariho o-omwanya ogu embaju zombi zirikwikirizanaho, omwanya ahagati y'amahanga abiri ogutaine mukama waagwo, kandi nibarwanira hanu omu mwanya ogu. Tibarikubaasa, omwe kurwanira seeri hanu, n'ondiijo haifo hanu, n'ondiijo akairukira seeri hanu. Hariho orunyiriri rw'omu maisho omu rugamba ahu babuganira kandi bakagyeza amaani gaabo, ahu buri ihe rigyeza amaani gaaryo aha rindi ihe, omwanya ogu embaju zombi zirikwikiriza kubuganiramu. Hati, mutafeerwa (kutunga) eki. Orugamba rukuru oru ku rwatandikire omu nsi, hakaba nihateekwa kubaho omwanya ogu embaju zombi zirikwikirizana kubuganiramu. Hakaba nihateekwa kubaho omwanya ogutoorainwe kugira ngu orugamba rutandikye, kandi kugira ngu rube orw'amaani. Kandi ogwo mwanya gw'okurwaniramu orugamba nigutandikira omu biteekateeko. Aho niho orugamba rutandikira. Ebiteekateeko by'omuntu bikatooranwa kuba omwanya gw'orugamba, omu rwatandikiire, kandi ekyo n'ahabw'okuba ngu okucwamu kukorerwa omu biteekateeko, omu mutwe. Hati, tibararutandikiire omu kibiina ky'ediini nanka. Tibararutandikiire omu kintu nk'ekyoma. Ah'okurwanira tiharatandikiire okwo. N'ahabw'ekyo, ekyo kibiina ky'ediini tikirikubaasa na kakye, tikikaakora omurimo gwa Ruhanga, ahabw'okuba omwanya gw'okurwaniramu, ahu orikuteekwa kubugana omuzigu waawe, n'omu biteekateeko. Nooteekwa kutooranamu. Nirukubugana. Niinyenda omwishiki muto ogu hanu, orwaire munonga, ahamize kimwe ngu eki hati yaakihurira, ataireho omutima munonga.
Okusharamu kukorerwa omu biteekateeko, omu mutwe. Aho niho Sitaane akubuganira, kandi okusharamu kuri ngu, ahabw'okuba okwo nikwo Ruhanga yaahangire omuntu. Hati, nyine (ku mwakubaire nimureeba aha bi mpandiikire hanu) maapu nkye eteirwe. Nkaba ngiine hanu obwire bukye obuhingwire, aha... ekakozesibwa aha rubaaho. Omuntu akozirwe nk'enjuma y'engano. N'embibo. Kandi omuntu n'embibo. Omu by'omubiri, ori embibo ya sho na nyoko; kandi amagara gakaruga omuri sho, omubiri gwaruga omuri nyoko. N'ahabw'ekyo, ebibiri ebyo, hamwe, eihuri n'e-eshagama, biteerana hamwe. Kandi omu katafaari k'eshagama harimu amagara. Reero omwo nikatandika, kakura, nikakora o-omwana.
Hati, embibo yoona eine ekishushu ky'aheeru; eky'omunda n'ebigikozire; kandi omunda y'ebigikozire harimu embibo y'amagara. Mbwenu, okwo nikwo tukozirwe. Turi omubiri, amagara, n'omwoyo. Ekicweka ky'aheeru, omubiri, ekishushu; ekicweka ky'omunda y'ekyo, eiraka ry'omunda n'ebindi nk'ebyo, n'amagara; reero omunda y'amagara, n'omwoyo. Kandi omwoyo gutegyeka ebindi byona.
Hati, ku muraashutame ahansi mwahika omuka, haza mukateera obuziga bukye bushatu. Nimuza kushanga ngu omubiri ogw'aheeru gwine ebihurikizo bitaano ebi gurikukozesa, kandi ebyo n'okureeba, okuroza, okuhuririra mu mubiri, okunuukiriza, okuhurira. Ebyo nibyo bihurikizo bitaano ebirikutegyeka omubiri gw'omuntu. Omunda y'omubiri harimu amagara, kandi ago magara nigategyekwa ebiteekateeko, eiraka ry'omunda, okwijuka, okuhaajaana, n'okukunda. Ebyo nibyo bintu ebirikutegyeka amagara. Kwonka, omwoyo, gwine ekihurikizo kimwe kyonka. Omwoyo... Oo, ka tukitungye. Omwoyo gwine ekihurikizo kimwe, kandi ekihurikizo ekyo, ekirikugutegyeka, n'okwikiriza nari okubangaanisa. Nikwo kiri buzima. Kandi hariho omuhanda gumwe gwonka gw'okuguhikaho, ogwo ni n'obugabe bw'okutoorana. Noobaasa kwakiira okubangaanisa nari noobaasa kwakiira okwikiriza, kimwe omuri ebi bibiri eki orikwenda kukoresa. N'ahabw'ekyo, Sitaane akatandikira aha kicweka ky'omugasho, kureetera omwoyo gw'omuntu kubangaanisa Ekigambo kya Ruhanga. Ruhanga yaatandikira aha kicweka ky'omugasho, okuta Ekigambo ekyo omu mwoyo ogwo. Nikyo ekyo. Okwo nikwo kirikukorwa.
Kuri ekanisa egi, hati hati neebaasa kuba hamwe, kandi ekateeranwa hamwe n'ekintu nk'ekyo okuhitsya obu boona barikwikirizana, hatariho kubangaanisa kwona ahantu hoona, tihakaabaireho omuntu oine amaani makye omuriitwe, omu dakiika itaano ezindi. Tihakaabaho muntu weena hanu orikwetenga Omwoyo Orikwera kureka owaakubaire Naamutunga, ku waakubaasa kutereeza ekintu nanka ekyo.
Hati, aho niho orugamba rutandikira, omu biteekateeko byawe honyini, ku oraabe nooyenda. Hati mwijukye, teri Christian Science, hati, okukozesa ebiteekateeko kumaraho emirabanamu y'eby'omubiri. Ekyo tikiine... Ebiteekateeko byakiira Amagara, nikyo Kigambo kya Ruhanga, reero aho kireeta Amagara. Ebiteekateeko byawe byonka tibirikukikora. Kureka, Ekigambo kya Ruhanga, kireetsirwe omu muhanda gw'ebiteekateeko byawe. Mwareeba? Ti biteekateeko, nk'oku Christian Science erikukigamba, okukozesa ebiteekateeko kumaraho emirabanamu y'eby'omubiri. Ngaaha. Ekyo tikyo. Kureka, ebiteekateeko byawe Bikyakiira. Bikibumbatira. Ebiteekateeko byawe bitegyekwa ki? Omwoyo gwawe. Kandi omwoyo gwawe gukwata Ekigambo kya Ruhanga, kandi ekyo nikyo kintu ekiine Amagara Omurikyo. Nikireeta Amagara omuriiwe. Oo, ow'eishe-emwe! Ekyo ku kibaho, Amagara ku gashuumira omu mufuregye ogwo, gakakutaahamu, Ekigambo kya Ruhanga nikyorekyerwa omuriiwe. “Ku muraagume Omuriinye, n'Ebigambo Byangye byaguma omuriimwe, obwo mushabe eki murikwenda kandi kiryabakorerwa.”
Bwanyima ekyo nikikora ki? Kuruga rwagati y'omutima, nigo magara, kuruga aho gagyenda omumaisho, nigariisa buri mufuregye. Omurabanamu gwakyo ni ngu, twemereire omunda hanu n'okubangaanisa kwingi, nitugyezaho kwakiira ekiri aheeru okwo. Ekyo nimuteekwa kukireka; reero mushuumire omuri ogwo mufuregye n'Ekigambo kya Ruhanga ky'amazima, reero kishohore, kyo kyonka, hatariho kugyemwa. N'ekiri omunda. Ekyo nikyo kikuru, n'eky'omunda. Enkora ya Sitaane n'okutandikira omunda.
Hati, noogira oti, “Tinyiba. Tinywa maarwa. Tinkora ebintu ebi byona.” Ekyo tikiine kakwate nakyo. Mwareeba, ni omunda omwo. N'obu waakuba ori murungi ota, okagira emicwe mirungi erikwingana eta, okaba omwesigwa munonga ota, ebintu ebyo nibisiimwa. Kwonka Yesu akagira ati, “Omuntu ku aba atazairwe bwa kabiri.” Mwareeba? Nihateekwa kugira ekyabaho omunda. Kyaba kitabaire kityo, ekyo n'okutooreza kwonka, ahakuba omunda omu mutima gwawe nooyetenga kukikora n'obu kiraabe.
Tikirikubaasa kuba eky'okutooreza. Nikiteekwa kuba ekirikyo. Kandi hariho omuhanda gumwe gwonka ogu ekyo kirikubaasa kurabiramu, kandi ogwo n'omuhanda ogw'okwetooraniramu, kutaaha omu magara, kurabira omu biteekateko byawe. “Nk'oku omuntu ateekateeka omu mutima gwe, nikwo ari.” “Ku origambira orushozi oru ngu, 'Tsinduka,' kandi otarikubangaanisa omu mutima gwawe, kureka noikiriza ngu eki orikugamba nikiija kubakwo, oryakikorerwa.” Mwakitunga? [Abateeraine baagira bati, “Amiina.” -Omur.] Nikyo ekyo. Mwareeba? Aho niho orugamba rurwanirwa.
Kuri nootandika n'ekyo kyonka, okubanza. Twine ekihika kingi kureeba ebintu nibikorwa. Twine ekihika kingi kugira eki twakorera Ruhanga. Ogu mukyara mukye tari... ekihika, tihariho kubangaanisa, aine ekihika ky'okuguma ari ohuriire. Naayenda kukira. Abandi bari hanu, nibenda kukira. Mbwenu ku tuhurira aha kintu ekyo, nka dokita oriya, okuzooka kw'abafu, ebintu bikuru by'amaani ebi Ruhanga waitu akozire, obwo tugira ekihika. Kandi ekintu ni ngu, nitugyezaho kurabira omu bihurikizo ebi, kugira eki twakwata hanu, nk'eiraka ry'omunda.
N'ahabw'ekyo abantu baingi munonga, emirundi mingi, bakyengire Ekigambo kubi. Kandi naanye nkeetegyerezibwa kubi ahabw'eki, ahabw'okweta abantu kwija omu maisho kujunwa. Nkagira nti, “Nkaba ntarikushagika munonga eky'okweta abantu kwija omu maisho kujunwa,” ntarikumanyisa ngu timushemereire kweta abantu kwija omu maisho kujunwa. Kwonka omuntu naakwata omukono gw'ondi, agire ati, “Oo, Ow'eishe-emwe Yohaana, noomanya ki? Nyowe naiwe tutwire turi abataahi obwire obu bwona. Ija hanu ahari rutaari, oteeze amaju.” Naakora ki? Kuri nyine orubaaho hanu, nkaabaasize kubooreka eki ariyo naakora. Naagyezaho kukorera omu magara ge, aha kukunda. Ekyo tikirikukora. Ogwo tigwo muhanda. Buzima, tigwo. Obundi shana naakorera omu (omuri ki?) kwijuka, kurabira omu kihurikizo ky'amagara ge. “Oo, Ow'eisheemwe Yohaana, okaba oine nyoko murungi munonga. Akafa ira.” Okwijuka! Mwareeba? Ekyo torikubaasa kukikora. Nikiteekwa kurabira omu muhanda gw'okweshariramu. Iwe, iwe wenka, oikirize Ekigambo kya Ruhanga... Torikwija ahabw'okuba nyoko akaba ari omukazi murungi. Torikwija ahabw'okuba ori omutaahi murungi. Noija ahabw'okuba ngu Ruhanga naakweta kwija, kandi Noomwakiira aha musingye gw'Ekigambo Kye. Ekyo Kigambo nikyo kirikumanyisa buri kintu. Ekyo Kigambo! Kuri nimubaasa kwiha buri kintu omu muhanda, eiraka ry'omunda ryona, ebihurikizo byona, reero mukaikiriza Ekigambo kikataahamu, ekyo Kigambo nikiija kuzaara ekyo kyonyini.
Hanu, nimureeba Ekikishwekire? Noogira oti, “Mpaho, hati,” noogira oti, “mbwenu, ebi, eiraka ry'omunda n'ebihurikizo, n'ebindi, tibiine kakwate nakyo, Ow'eishe-emwe Branham?” Buzima, biine akakwate. Kwonka ku oraikirize Ekigambo kikataahamu, reero Okakishweka n'eiraka ry'omunda, obwo Tikirikubaasa kukura; nikiija kuba ekigambo kiremahaire. Murareebire enjuma nungi y'ekicoori ebyairwe omu itaka, reero okareka ekiti kikagigwaho? Neija kukura egorami. Omuzaabibu gwona, ekintu kyona ekikura, nikiija kubakwo, ahabw'okuba hariho ekyakizibira.
Mbwenu, egyo niyo nshonga eri n'Okwikiriza kw'ekipentekoote kwaitu ebiro ebi. Turekire ebintu bingi munonga Byakuzibira, Okwikiriza okwo oku twegyesiibwe, Omwoyo Orikwera obaire naatuura omuriitwe. Turekire ebintu bingi munonga, nitureeba omuntu ondiijo. Kandi Sitaane buriijo agyezaho kukworeka okuremwa kw'omuntu, beitu agyezaho kukwiha aha bujurizi obuhikire obw'amazima. Naija kukworeka endyarya, obwire bumwe, owaashohoire akagyenda naatooreza ekintu nanka. Tarakikozire, ahabw'okuba akaba naatooreza. Kwonka ku kiraarugye omu burugo bw'amazima bw'Ekigambo kya Ruhanga, “Eiguru n'ensi biryahwaho, kwonka Ekigambo Kyangye tikirikubaasa kuhwaho,” Nikiteekwa kugumaho. Nookireeba, ow'eishe-emweka?
Nikiteekwa kwakiirwa omu biteekateeko, bwanyima Kiikirizibwe omu mutima. Bwanyima Ekigambo kya Ruhanga kibe ekihuriire, reero ebihurikizo byona by'amagara n'omubiri bishemezibwa n'Omwoyo Orikwera. Bwanyima ekihurikizo kyawe kya Ruhanga, eiraka ry'omunda ryawe rya Ruhanga, buri kintu ky'Obwaruhanga, nikihimintika nikirabira omuriiwe. Tihariho kubangaanisa ahantu hoona. Tihariho ekintu kyona ekirikubaasa kwimuka. Tihariho ekintu kyona ekirikubaasa okwija omu kwijuka, reero kikagira kiti, “Eego, niinyijuka Mukyara Jones akagyezaho kwesiga Ruhanga, na Mukyara Nanka na nanka. Mukyara Doe akagyezaho kwesiga Ruhanga kumutambira, rimwe, kandi yaaremwa.” Mwareeba? Kwonka ogwo mufuregye ku guraabe guboneziibwe kandi gushemeziibwe, kandi gwijuziibwe omunda n'Omwoyo Orikwera, ekyo nangwa tikirikwija n'omu kwijuka, tihariho kuta omutima ahari Mukyara Jones n'ebi yaakozire. Niiwe na Ruhanga, hamwe, kandi tihariho ondiijo weena kureka imwe babiri. Nikyo ekyo. Ndurwo orugamba rwawe.
Read the full account in...
Orugamba orurikukirayo orurarwanairwe.
Obushwere n’Okushenda.
