Itauon luejaas aidaris kwana.

William Branham.

Naka oitabo...
Itauon luejaas aidaris kwana.

Kosodi konyet ajai eong amej kapak adiopet, na da esubit bala einono lokiareit mamakang, amina ameja. Ido ajai eong amejaete ka etelepat ediopet, Jim Poole, ikoku yenejokuna taitai. Aomit bala ebunene etelepatake ailip okanisa ne, Jim lodidi, ido erai ekale loka itunga luejokuka noi. Ajeni eong luka Poole. Jimmy ka eong kijotot nepepe ido kiboit da nepepe ageun nakiraar isio isapa ludidik kosomero. Kirai kilanyakina isio kilapio ikanyikape, kotoma okar. Ido abu Jimmy koduo ekemudu, ido abu koduik eong airotar akeje aarei kere, edunyasi keong neeteni, kemudu loka shotgun. Aponi eong kayangaar adekis, ido, kanen, aperi eong kanen auta atwanare, amamei penicillin arai idiobore kapaarasia kangun. Doodo, kwana, apesikinitai amilimilet kwapuka, ido ajeni eong akuare ngin... Alosete kesi aijeng eong atupuruc naatupakini.

Apotu bon kesi koyangasi kosodete aitalaun ajimi, ido alunguren nuapolok nuka akiring nu aduoritai aisiarisiar, ido apotu kesi kolemutu emakasa atubonoria ngun awai, ido arai eong aitingit akanin nuka etunganan. Ido arai kesi aitingit, ajakun kereka akakanin kakaninike, na-na adauniata kesi. Abu eong kelulu kasodi aimony, ido aimakakina nen kopone kangol, kojaasi kesi atubor ewai ngol loka akeju. Karai eong loka ikar itomonaongon lukapolou, isapat bon yenididi.

Ido akuare ngin abu eong katam ajotoor, kosodete kesi... abu eong kakweny, abu ibore kodetun. Kwabo keraas nu kane aokot, nuadolete aapikin aileleb egalon, aomit eong, kelomunete kamoori kangun. Ido adaunitos kesi... adaunitos kesi ainwak kede x-ray, ido abalasi kesi ebe aperi arasasit eiduny kamoorit nakapolon, kowaitin kere, ebe akwacaret napetai epedori aitiak ngin kaarei, ido eong kageu aiwi. “Eebo,” abu eong kaomoom, “awasiaka do nges na.” Ido abu eong kebwaik akaninika kwap kopone kalo kasodi aikeun kuju, ido aleleete aokot kakaninika, kerai aokotoka obe kes kaperi eong kotoma kec. Abu eong keworo, aramakin ekide. Abu anaasit kobu, ido abu bon ngin kopesik ataulo nen aijujuaria naarai amamei idiobore yenapedorete kesi aswam.

Ido tupurucuke, kotoma ojautenesio ngul luitononokete, mam kesi eyasete aokot kapaarasia kangun, ijenete bo yesi da, aso apotu kesi-apotu kesi kojengata eong. Ido apotu kesi kijaikis eong ether. Ido na eong... Ether lokolo ngol, aomit eong iitunitosi yesi, erai ngesi ekia loelemari ber apipil apak edit loenyaritai anesthetic. Ido kokwap naka ether ngol, na ekwarunia eong, ajai eong aikwarun ko ether kangol akaulo na isawan ikanyikauni. Kerai kes aijaikin eong loetia nen, aomitos kesi ebe mam eong tikapedo... mam eong ti ekwaru. Mam kesi apotu kopedosi aisikwarun eong.

-----
Nakwenyunia eong kokwap naka ether ngol, ajai ibore yenabu kiswamaikin eong kanen. Eyuunit duc eong ebe arai ngin aitapoet. Naarai, ajai eong anonok noi, ido eong... Aomitos kesi ebe ajai eong atwanare. Amonyi ngin. Na angaria eong akakonye, abu kapedo asesen, apedorit eong apupun nges inera, kasodi bobo eong abongokin ajotoor, kasodi akwenyun, irwan aarei arai auni. Kasodi konyet eong adumun aitapoet kapak kangin. Kasodi konyet eong adumun...

Bala ilapio ikanyikaarei konyet ekaulo, abu koraun eong abongor kanu alemun awai kama kakejeka shotgun wads ka igoen luemejaere luajai agirisi toma; mam edokita abu kopedo alemun ngul. Aso abu do eong kadum amunaar naka aokot, apotu akeje kere kobutuonosi kosodete asukokin kau kokwapuka, ido akotosi kesi ti atubor akeje kere kotulin kang. Ido eong cut-abu katema, “Mam, kikuny kuju lailo kosodi atubor kokuju kane.” Mam cut eong abu kapedo atitingikin ngin, teijo. Kosodi konyet do kawasia, apotu Doctor Reeder ka Doctor Pirtle, luko Louisville, kojengata, kosodete aicil toma nen ido apotu kolemutu ngin kinga; ido lolo kijaar eong kakeje nueumokina kanuka asianut naka Edeke.

-----
Kwana kotoma apak na, kwape kipou eong kajaunotor kaitapoet, ido kaomoomoi ebe eong-kadaunit eong atubor kaijar kana alomar toma aiticanio. Ido akaulo na ilapio ikanyikaarei, kane ko Clark County Memorial Hospital, aponi kojengai eong irwan nakiareit. Ido kotoma apak ngin, naekwarunia eong, aomit eong ebe abwoi eong ko To. Abu eong kadum aitapoet ace. Ido ajai nen emusalaba loka esabu kuju toma apak, ido kojai Aibuses naka Ejakait eleleunit komusalaba kangol. Ido abu eong kabwo katerorite akaninika kopone kalo, ido kojai Aibuses ngin edoit toma atorobuka. Kasodi eong... Abu aitapoet ngin konyou kamakang. Ajai papaka iboie kanen eseseni eong, naabunio aitapoet.

Abu duc eong kapupi, yes... itunga kere luejenete eong adaun ikar lu kere, ejenete ebe abu duc eong kakote alosit To. Ijenete yesi epone loejaar ngin. Erai ibore yenajai abear To. Konye naarai abu ekerereon aacer kalimok eong kapak adiopet, ibore ngipengin, ebe ibusakinit eong alosit to... Aacer, nairiamatar airimokinetakec ka ace da kwangin, idounitai eong kokwap naka aanyunet kangin, ido mam cut eong apedori araut lo akeriana ko Kide; eraun eong alosit To. Ido okaru loatubor abu eong kalot, To, ailelebikin ibore yen arai eipud loka apak kere naka aijar, teijo, a-a aswam ngun.

-----
Akaulo na aitapoet ainom eong, ido kajai eong anonok noi, ido abu eong katwaniarite aokot ngun kere, kasodi alosit... abu eong kaomite ebe ajai eong alumor toma naka Ikar kere nemam engetakin. Luipu kayesi iiraritotor eong alimori nu kokau sek, ido-ido alumor toma naka Ikar kere nemam engetakin. Nasodit, ajai eong etorit toma bala idouon, kosodi konyet toma amuton, ido kajai aiyatakinit alumor kwap kopekwangin, kwap, kwap, kwap. Ido ibore yenisodit ijenete yesi, abu eong kadol toma ariino nuka luewolioritos, ido kotoma kanen eong-abu eong kadelo. Ido abu eong kasesen, ido kanen, cut nginibore kere, amamei apetetait mamake. Mam cut eong tikapedo apalar aibiritoi kwap. Adaun Ikar kere, asubit bala, alosi eong aibiritoi. Amamei apalar, kanenidio.

Kosodi do kerai ngin aitegelikinet nanyoin kama ejai aitapoet naabu eong kadumunite kane, mam apak naeoj etuboro, naka ajaut toma Aibuses nepepe kitunga, aitiirianet! Konye kotoma kana, kwape ajaar eong ebiritoi, kawasia konyet do, abu eong keworo papaka. Ejena bo sek, araut ikoku, ngun kes nu ti eong keswama. Abu eong keworo papaka, ido amame papaka kanen. Ido abu eong keworo totoka, “Okwe idiotunganan kigagau eong!” Amame toto kanen. Auta bon eong alosit. Abu do konyet eong keworo Edeke. Amamei Edeke kanen. Amame idiobore kanen.

Ido akaulo apak naedit abu eong kapup eporoto lokaiturur naepol noi lo eiritor eong apupun, ido arai aipup nakaronon kakere. Emamei epone kere... Karaida ber akim naebirani nateniteni tikeraun aiyalama kitiiriani ka ibore yenikerai na. Kwana aitapoeta ngun mam iiritotor aibiror. Ido kerai cut ngin adiopet kotoma aipup nakaronon kakere na eiritor eong adumun, ido nukiswamat...
Abu eong keira eporoto ece, apupo bala ibore ice yenesubit bala a-a-ekamanara ka aiticanio. Ido napupunio eong, abu eong kangolia, eponitos, ido arai angor. Ido ajaatar kesi ka ibore yeniliba, bon abu kapedo cut aanyun ereetekec, ido ajai ibore yeniliba kwap kakonyekec. Ido asubitos akonyekec bala iriyanaritai kau, kwa isusiata angor lolo eriagi akonyekec, iriyanaritai kau kopone kangol, ido bon akonyekec ka ereet. Ido alosete kesi, “Ooh, ooh, oo, oo!” Oo, ikatuan!

Abu cut eong kadelo noi aiworo, “O Edeke, kitim eong. Kitimoi, O Edeke! Aibo ijai Jo? Karai bon Ijo kocamak eong kabongo kasodi aijar, esumunit eong Jo, araut esapat loejokuna.” Aso, ngin bon kereka ibore abu eong kapedo alimun. Kwana, ejeni Edeke, ido kotoma Apaaran naka Atubokinio, ebuni Ngesi atubokin eong kanuka alimunet kangin. Ngun kes abu eong kalim, “Ejakait Edeke, kocamak eong kabongo, ido abuni eong aisumun Ijo abuni eong araut esapat loejokuna.”

Ido naduikinere eong, abu eong keneritor nukaingal, eswamat eong aapikin ti nginibore kere yenajai kanu aiswamao, idiope ibore bon yen abala eong... ejokiar bala ti eong aitalaun ngin eringa eong ajai ne kwana. Ido nangolekinio eong kwap kasodi eong aanyun ebe aduikinitai eong aapikin aitiak araun atutubeta aarei, ebucit, abu eong katema, “Edeke, kitim eong. Ijeni Ijo mam eong eiriitor aswam adoteu.” Ngin bon nges ibore yenabu eong kapedo alimokin Edeke. Mam eong abu kacamunite aitimiKe, ka iboro lu kere. Abu bon eong katema, abu kapedo atemar, “Mam cut eong eiritor aswam adoteu.”

Kosodete do kesi ayangaar eong kinga nen. Kosodi konyet kotoma kangin, abu eong kamony, “Edeke, kitim eong. Abuni eong araut esapat loejokuna, arai bon Ijo kocamak eong abongor,” naarai ajeni eong ebe ajai Edeke nenice. Ido kingarak eong, iboro luajarete ngul kanen luitukurianete irimoritos nen kere, arai kereka kwana do eong ekadolunan lokitetet. Ido aipup nasogim noi kakere, naketasuro, namam ayongit Edeke kotoma kangin...Asubit bala akonye nuepolok noi, abukio nuepolok kiswapitos kokinga kopone kangol, ido kiriyanara kau bala ikapa, bala kau kopone kalo; ido ibore yeniliba, kosubite bala enyamit engoti arai icebore.
Ido kesi- alosete kesi, “Ooh, ooh, ooh! Oo, aipup bo na! Kwana naabu eong...

Konyet do kotoma apak naeuriana noi, abu eong kabongu toma aijar nakakuan bobo. Etapas ibore ngin eong. Abu eong kaomoom, “Oo, koraun ebe mam cut eong abuni alosit aibois kwa kangin.”
Ilapio ikanyikaarei konyet ekaulo, abu eong kadum aitapoet na aibwo ko To, kasodi aanyun emusalaba ngol loka esabu ebuni kwap neajai eong. Ido eong-abu eong kajenu ebe ejaas nenice ariino nuka lumudiara.

Kwana, mam eong abu kaanyu ngun ilamara aitodol bala isabitin iwongon luatuboros. Aberuka... Mam eong abu kaomite ngun kadoketa kanu. Bala isabitin iwongon luatuboros, aberuka ka eong kipou kalototo Tucson, egwelet. Ido nakijaar iboie... Abu aberu, kipou isio kalomasi toma togo lokokwap, ido-ido ajaasi nen ekodet loka itelepai luasubitos bala-apesur edemidemitos itimakec, ijenete yesi, kopone loiswamata angor, ido-kojaas itima luetubitai koingaren luekurusitai kwap naka ereet, ido konapitos ipalei luikiara neteni, bala epone loka, aomit eong bala araasi kesi beatniks kere lupe inyaritosi yesi kes.

Aso abu do eong kadoka kuju, kasodi aiboikin. Ido naeswamaunia eong ngun, ajai nen amadala naitwasamae akim aitodokia itunga kuju, ajai ngin ositowa loka J. C. Penney, ido ajai amadala ngin aisirimun itunga aitodokun kuju. Eebo, abu cut kadekakin akoik ne teni, aanyun angor ngun edokunete kuju kanen; aatumunak, amojongai, ido kitapalaunitos, esukusuko emukule, atumunak, ido ngolipone kere, konapitos ipalei ludidik netai; awatekec ngun nuasiliaka, kosodi angor nuanapitos igoen kopone loisupi ikiliok aelo, kede akwes nuapolok noi kopone kangol, ido kane kopote ngun. Kosodi adiopet adokun kamadala kangin, cut abunore cut kuju kopone kangol, neajai eong eboie koicolong, eboie eong kanen ketulurite akakou kwap.

Kasodi eong aibelokin angolekin. Ido adiopet kakesi ajai adokun kuju kamadalai kobala, “Ooh,” enera Spanish, mama ejai aberu ace. Arai ngin aberu namusugut enera neajai aberu na Spanish. Ido nangolekinio eong, kere katipet noi abu eong ketegelikin. Kangina, abu eong kaanyunitor ngun sek eringa. Akekonye, ijenete yesi epone loiswamata angor kwana, aijuk eriagi akonyekec, pacupac cut, bala ikapa, ijenete yesi aibwaikin kuju kopone kalo, ido anapakin alabirai nuka ikapa ka nginibore, ijenete yesi, nepepe kakonye kuju kopone kalo, ido kojai ibore ngin yeniliba kwap kakonyekec. Engibongin ibore ngin yenabu eong kaanyunite nearaar eong ikoku. Engin kanen aberu ya cut becebec. Ido abu eong akuan kotwana cut kere, kasodi ageun angolengole, ido ajaasi itunga ngul iumumosi, ijenete yesi, kolosete iyatakinitos ener nuka itiaisinei ka iboro lukotoma aduketait.

Esubit bala abu eong ketegelikin adaun apak naedit. Ido kasesen eong, ido kaomoom, “Ngun kes nuabu eong kaany kokatwak.” Ajaasi ngun ngina, engoti ngol. Abu eong kaomite ebe naarai ajaasi kesi okatwak nges ejaikinit kes ikote nen, neeliba-nebululu kokwap naka akonyekec. Ido kane ajaasi angor nu ejukitos eriagi loejesi neeliba-nebululu, kopone cut loabalar aitapoet ngin bala ikar akaisaongon atuboros.
Teijo, bala ikar akaisaongon atuboros, nges abu ngin korai. Arai eong akaisakany-kiwongon; karai eong itomonaongon. Aso erai bala ikar akaisaongon atuboros, eong...Ido ngin nges e-e... Ngol nges enaba, kopone kere, loka atubokinio, koany jo.

-----
Abu do eong kaomoom kapak kangin, kwape abu eong kaanyunia akonye ngun nu asubitos bala enyamit-engoti kama ejaas angor ngun. Ajaasi nen Spanish, Ipalasan, Ilugai, ka imusugun, ido kere nepepe, konye akwes nutiok ngun nukapolok, ijenete yesi, ijenete yesi epone loiswamata kesi ngun. Aremor kuju kede alaketa, epone loelakiata kesi ngul kau, kopolok noi, kosodi konyet alomun kinga. Ijenete yesi epone loiswamata kesi, aenikin ngul toma kopone loiswamata kesi ngun. Kosodi konyet akonye ngin nuasubitos-bala enyamit engoti, kosodi akonye ngun nuejukitai eriagi, ekietara ngun kau bala akonye nuka ikapa. Ido ajaas inerasi, kwabo eong ngol kanen bobo, abwoi kanen ko J. C. Penney's store, ajai bobo okatwak.

Eong-eong-abu kaurianaar ketasuro loepol noi. Abu eong kaomoom, “Ejakait, ejena cut ebe mam eong atwanit, ido icamak Jo eong abunore aibois na akaulo naka akiro ngun kere. Aso kerai kes bo ngun kanen, iswamaete... cut kanepekanen kopone kangol, kotoma aitapoet kangin bala, mam cut apatana ijo apupun nu enerasi kesi kakonikii, ijenete yesi. Bon aiumuumo ka alosit, naka itunga, kosodi kojaas angor ngun adokun kuju kamadaala ido kolosete airimor nen, ido “Ooh, ooh!” ajaasi akonye nulibaik ngun, nuajai epone-lope atakaniata, ido koraas nukaiticanio.

Naka oitabo...
Itauon luejaas aidaris kwana.

Ido kwape itemokinitere ituŋa atwanare irwan atipet, kosodi akaulo kaŋin atubokinio:

Iburanian 9:27