Ibore ainakini erai ekecokon.

William Branham.

Naka oitabo...
Ibore ainakini erai ekecokon.

Luka 2:8-16,
8 Kojaas ikecokok kakwap kangin kiboiete kais idarete ekecesipan kuare.
9 Kotakanik kes emalaika loka Ejakait, kocau angosibibi naka Ejakait airiamar kes: kokuriakaros noi.
10 Kotema emalaika kes atiar, “Sirikuriakaros: naarai koany, kainunit yes akiro nukajokak nuka aiyalama naepol naejaun mama ejaas itunga kere.
11 Naarai auruun lolo kanukus Eketajaran, nges Kristo Ejakait kotoma ore loka Daudi.
12 Na nges aanyunet kamakus, idumunete Ikoku yenimukeru imukoritai kigoen lukimukeru, eperi kotoma atuba nakenyamenenata ibaren.”
13 Katipet kojai nepepe kemalaika ngol ekodet loka ajore naka akuj ituritos Edeke, ebalasi ebe,
14 Kojai aibuses mama ejai Edeke kokuju kakuj, kainapakin da kakwapin mama ejaas itunga luitojokit.”
15 Kosodi kanen kenyout imalaikan abongor toma akuj, kotemanaros ikecokok ebe, “Aso kalototo kiton Betelekem, kaanyut ngun nuiswamatai, nukitejenu Ejakait oni.”
16 Kolototo katipet, kodumutu Mariam ka Yosep, nepepe kimukeru eperi katuba nakenyamenenata ibaren.

Kwana, erai e... Inyobo ainakini epukokinio akirosit na nakapolon neejaas ikecokok? Ti ngin erai ibore yenesubit bala epol noi kanuwok. Kijaar eong ikokoron idis iwadikatai ne, ka akiro adis nuabuni eong aitam aitor toma, kanu aitetemikin yes kanukiinyo koipone kalo ajenia eong kere. Kosodi do aticepak akaulo naka nu, ebe ebuni Ejakait kede Akesianut, atibong na, alemar awai aingiseta nu ebe kanukiinyo kamawok. Konye abu... Noi noi oni kere, aomit eong, kotoma apak adiopet arai ace, aomokinit kanukiinyo araar ebe akirosit na nakapolon naka apakio kere aponi kopukokinai neejaas ikecokok. Inyobo ainakini Ngin epukokinio neejaas ikecokok ido mere luesisiatos akiro nuka ediini luka apak kangin? Arai ngul kes etutuoritai apupun Ngin. Ido inyobo ainakini Ngin ebuni kosodi ainac lukabarak, kosodi abunore neejaas lukican? Bobo da, inyobo ainakini Ngin inaci luesisiatos ka lukacoa, kosodi abunore neejaas lueyapaara ido komam isisiatos? Ejaas aingiseta adis nuka kanukiinyo kotoma kanu.

Ido ibore idiopet yenaticepak epedoria eong alimun, koany, aponi kourunai ikoku ko Betelekem. Naeraar Betelekem kotoma aijulunet naka Iburanian, kwape kipou oni aanyunitotor ikar idis kau kane, Betelekem akepolou ebe, “etogo loka emugati loka Edeke.” Ido apotu oni etogogongoto kotoma Nuiwadikaere, mam Nges apedori abunore kotoma aiboisit adio kere. Rakab ka okilenike kes apwakunete Betelekem. Arai Rakab amalayat nabu ekapolokiniton ajore isupa, kotoma ajore naka Isirael, akaulo naka kes aikamar Yeriko. Ido kanuka aiyuun abu kocam Aisiraret naka Edeke, kotoma ojauteneke, ido aponi nges kitajarai. Ido anyoun kanen, neabu Yosua kotiakatiaka akwap neabuni nginidiopet ajaun,...

Ido ejai akirot nasisiauna naepol noi na amuno eong acepak ayangaun ko Tucson, naka nukatoto ngun nuka Iburanian aur idwe ngun. Nakemonyia kotoma ariebo naka aidoun ikoku, eworoori ngesi ekiror loka ikoku ido ngol nges asipokini ikoku ngin aiboisit kotoma akwap naka aisumunet, atekerike. Ibore yenapolon, Akirot naak Edeke kere eupa cut nepepe. Arai mam eupa nepepe, mam erai Akirot naka Edeke engolopa, erai aomisiokon kes einakisi Akirot naka Edeke angolopikin. Eupa Ngin kere nepepe.

Aso, do, arai Ngesi Emugati loka Aijar, kwape kipou kesisianakiniata kosabiiti loatubor ko Phoenix, arai bo esabiiti eroko loatubor. Ido kwape araar Emugati loka Aijar, mam Nges apedori abunore kotoma aiboisit adio kere kidimarai “otogo loka emugati loka Edeke.” Ido ngin nges arai abongokinet naka aingiset ebe kanukiinyo. Kwana, kane, euruunitai Yesu ko Betelekem, ido ko Betelekem kangina ajai atukos, ingarenok lukapolok luka ediini eboiete ko Betelekem, Daudi ekabaka lokapolon loarai ekecokion auruunitai ko Betelekem, papake Yese aurikinitai Betelekem, papaake Obed aurikinitai Betelekem. Bobo, da, abongor kau kere, alomunito ko Betelekem.

Ido kane, Yesu Okoku loka Daudi eurikinitai Betelekem, cut kokwap naka itoribei luka aicokisio nukapolok. Ido arai itutuoritai itunga ngul, ido kojaas lem amoot Mesia adaun ikar lu kere; ikar akwataongon, adwaritai Mesia abunore. Ido arai ebeit Mesia auruunio kotoribe loka aicokis, inyobo do bobo ainakini kes abongor kau kuju toma omor neejai atukos naka itunga lumam isisiatos, ikecokok lumam itutuoritai kanu ayangaun Aisiraret nakapolon, Aisiraret nasodit? Kosodi aiyakiar ikecokok! Mere lukacoa ka luetutuoritai, konye ikecokok. Erai ibore yenitegelikina, biai mam? Konye ebeit kojai aingiset kanenice ebe kanukiinyo... Ejai aingiset ebe kanukiinyo, kwana ebeit kojai abongokinet neejai aingiset ngin ebe kanukiinyo! Ido emamei itunganan yenejeni abongokinet kidimarai Edeke. Ngesi ejeni abongokinet.

Kwana, kiitu, adaunit Mesia ajaun ore, aurunitai kore, kotoma awi; cut kosiep naka aicokis neajai esasedoti lopeti... ka esasedoti lokapolon, ka luisisiatos akiro nuka ediini, ka lukacoa, ka luitutuoritai, kere ajaas aidarit Mesia. Ido ajai Ngesi nen, cut kakidingotokec! Konye inyobo do ainakini kes elosete neejai... ngina orongan luko Yuda neejaas lumam esisiatos, lumam etutuoritai, lumam ejenete einono, lukiican kakere? Asubit bala itunganan yenimam ebusakinit kakere kanuka epelu kangol, kanu apukor Aisiraret kosodi aijukar kes kinga kanu ayangaun Aisiraret.

Ijenete yesi akaomisioit? Mam aticepak epedori araut naepol ajokis noi, konye akoto eong akorar akaomisioit: eyuunit eong ebe erai kanu naarai acoa naka Edeke, ebe ajeni Ngesi ebe mam ti ngul ijautu eipone Aisiraret kwape kwangin koipone lokebunio. Mam ebecokina kede aisisiakec. Etegelikina. Mam arai ngol eipone loetutuoritere kes aiyuun ebe abuni Ngesi aputor. Angolopasi kede amisiikinikec naka aisisia naka ediiini. Aitutuoriokec kere, aisisiakec kere aponi kinacai, abu koraun tai. Acamunit eong ebe arai acoa naka Edeke nges ajeni ebe mam ti ngul ijautu Aisiraret kwape kangin.

Aso ajai Mesaia ne, ido ebusakinit kojai itunganan yenemisiikini Ngin. Ido ajeni Ngesi ngul lumam enyalinyaluna kotoma oboro luka eipone kwape kangol. Abuni Ngesi apedor noi ayangar Aisirareteke neejai atukos naka lumam esisiatos, adepar kwape ti kepedoria neejai atukos nainyalinyaluna nasipokina noi toma orotinikec ebe amamei ibore yenapedori aibelokin kes, mere karaida Akirot naka Edeke.

Ido kwana, ipapero lukristayon, ber eong engit aingiset na, kede ekatau kere ka amin. Mam eong ajeni arai epedori Ngesi aiswamaun aswamisioit ngipengin atibong na, kosodi aijukakin oni kotoma atur kana Akirot naisumunikitai naisumunikitai kanuka atur kana, mam eong ajeni arai mam luisisiatos akiro nuka ediini, ka luesiomitos, ka lukacoa, epote ainger Aisiraret kwape apotu ngul kiswamatar kolo? Mam etunganan ijulakin, karaida Akirot naka Edeke mam ijulanakin. Erai Ngesi Edeke lomam ijulanakin, mam Nges ijulanakin!

Koany, Imalaikan abunore kosodete... Imalaikan abunore kosodete ainakin Aisiiraret neejai etunganan loka adoketait nakokwap kwape kangin, kojaas itunga luapedoritos noi (kotoma aomoom naka akwap) elosikina noi adepar itunga lu lukican, ikecokok lumam esisiatos. Ekecokon nges erai etunganan lomam ibore yenajeni adepar idiotunganan kere, mam nges epuda aijen idiobore kidimarai bon nuikamunitos amerekekin. Mam nges epuda asioman adio, mam epuda nges aijen aimar adio. Mam nges epuda aijen eipone loka aitiak ibore yenididi noi yenenyarita atom. Mam nges epuda adiosioman. Akoto bon nges aijen amerekekinike, ngun bon kes nuepuda nges kojeni. Kosodi Edeke, Acoa nakapolon, ka Atapar ka alibunet naka acoa kere, asekun etunganan loka epitene kwape kangol (itunga, atemas, kwape kangul), kosodi ainac itunga kere luasiomitos luetutuoritai ejok luetutuoritai kotoma aswam naebucara. Ainac kere lukapolok luka akwap; ajaas itunga lukapolok, ikesisianakinak lukapolok, Kaiapa esasedoti lopeti, itunga ice luipu lukapolok, kere itunga luka Isirael luesisiatos noi, idiinin kere, ka luapogasi luesisiatos akiro nuka ediini, abu Edeke inac nginidiopet kakesi! Kwana, ngin nges acoa naka Edeke.

Koany, Akuj Naikiara kakere isuburikit aitubusikin luka akwap luetidisiara kakere. Abu Lokapolon lokatoma Akuj kijesun kwap kanu aitejenikin neejaas luetidisiara kakere lukotoma akwap, aikalam kere luajaas kiding kanu aitejenikin neejaas ikecokok; abunore ainakin ikecokok lu lutai Aisiraret naka apakio kere. Ajauna ikiyakia luipu lukapolok. Ipedori ti oni aomoom nuka apak naka Noa, ka inabin, ka-ka isadotin lukapolon, kaiceda, arai kotoma apaarasia nuatuboros. Itunga lukapolok luesisiatos, ikabakan, ikayaitok, akayaitok akabakanuto, konye kane kobuni Ngesi kede nakapolon kakere kotoma Aisirareta. Arai bo Aisiraret biai? “Ejai Mesia ne kwana!” Ianyu? Kosodi kanu aitejenun ngun, abu Ngesi kinac ngul kere, kanu aitejenikin ngin neejaas ikecokok luetidisiara.

Komoom ber ijo ngun: kere itunga lukapolok kokanisa, kotoma otunga kere luka okanisa, ikesisianakinak kere, kotoma aitutuorio kere naka akiro nuka idiini, isirigin kere luaponi kitwasamatete, ikanisan kere, ka aisisianakineta kere, ka idiinin, kere aponi ikalamai! Aisisia kere napotu kesi kiswamatos neejaas ikiyakia kere, ka aibelonokin anyoun aiyuun adiopet kiton neejai nace, araut imeeban ngin kere, ka nginibore kere yenawomitotor kesi ebe eswamaikinitos kesi Edeke aibuses, konye kere Aisiraret naka ngin kere aponi kinacere kere. Itegelikina! Inyobo? Ianyu?

Ido koany, mere ngun bon, konye aiboisit namam ebusakinit kakere kanuka akirosit kangin. Ikecokok, kwana, kes apotu ijautu Aisiraret. Ido kwana koany neajai Aisiraret: toma aiboisit namam ebusakinit kakere namam idiotunganan aomit bala ti Ngin elomu kotoma. Mam eong ajeni atibong na, korai ti oni amootos Aisiraret nakabeit naka Ejakait Yesu, mam eong ajeni arai ti eraun atukos namam ibusakinit, aiboisit naerai... ebe akwap nakapolon, naka adoketait naekiara ka ekanisa lolo ti eomoom ebe arai atukos naka-naka, oo, luka ikerep? Mam eong ajeni arai mam ti ngin eraun aiboisit naidumakini oni Nges? Aiboisit namam ebusakinit kakere, ka ikenerak lumam ibecokina kakere. Mam ikecokok ejenete idiobore yenikamunit einer, aiworot amerekekin bon; eebo, aticepak ngin nges apolou ainakini Ngin ebuni.

Konye arai ngin Akirot naesumunikitai. Koany, abuni aswam ngun bobo. Abu inac itunga lukajokak kere luka akwap. Abu ilam itunga lukajokak kere, kosodete apukokin itunga lutai. Itunga ngul kere lukajokak luesiritai kede-kede asioma naikiara noi naka ediini ka-ka acoa naka adam, ka iboro, aponi ngun kere kinacai kosodete apukokin itunga lutai. Acoa, acoa naemamei ageunet arai esange naka Edeke lokapedor kere nges abu iswama ngun, aitejenikin ngul Aisiraret nakapolon kakere najaunor, “Ejai Mesia kwana toma akwap.” Ikoni bo lolo acoa ngin ai! Apedori bon abunore kama ejai Edeke loejeni acoa! Acoa kere ka asioman kere, ka nginibore kere, aponi kere kojalakinai icanicanuna ido kojalitete acoa nakapolon naka Edeke. Enyikokinit eong ainyoginyog ngun naarai akoto eong ngin koloma toma noi. Kere aperete kicanicanuna, amamei ajokis. Abu inac ngun kere kanu ainakin acoa naka arereng naka atubor, ebe eleumi Edeke iboro lutai kanu aiswamauna iboro luepon ajokis.

Naka oitabo...
Ibore ainakini erai ekecokon.

Kobongosi ikecokok, itopoloorito ituritos da Edeke kanuka akiro nukiirarete, muaanyut da, kwape kelimokinitere.

Luka 2:20