Eliyet a itunganan angini etami.
<< prev
next >>
Eliyet ka Akuj.
William Branham.Tosiomete alo akirot...
Eliyet a itunganan angini etami.Akimario 19:9,
Emaikina nai itunganan ngini nyitoroniaritai tomuda ekuron ka ataok, kiwuaaki nakibois ngina eseg ngina ke etal alokinga Alomar. Ingadaryo ekuron ngol anguna ka atukot ka anguna ka akiwuakin nakipi nguna italeunere atukot a ngidwe a Isirael: Arai ngin akitesegunia anasecit.Akou ka Akirot ngina esitiyai ayong nakuwarina erai: Eliyet A Itunganan Angini Etami. Epuposi ngun esibit nguna itegelikina anguna a ekalimonokinan angolo igesicit ka akimat esigara, ayaar akou ka Akirot ngina ikoni nen, Eliyet a itunganan a ngini etami. Apotu totakanut, ebe, ataparacu ngina ngoon alosit ayong Erika ngicelekui.
Kerai ngitunga ngulu epupete anaredio, alokuwuam, kori anasimio, toanyunito ngireetin ka atukot ngina alimoria ayong akou ka Akirot, kingedanara iyes kan ngun. Aliyet a itunganan angini etami.
Ejok, atakanunete ngun daadang neni kang aneni ekedodikinotor ayong ngipian a Ekapolon apei taparacu, ka aponi tolimokinoi ngicelekui ayiakaun. Itamunito iyes dadang ngina etiyakinotor ngun. Ka, dang, alokaamukut aneni awaar ayong, arai neni... ca eringa nyelimonokina nganyameta angikansai, ayiai ayong erikae apeitaparacu eringa apaaran. Abu towuo aina... atami ayong epiripirunit akolong kidiama, ayapikinit ngisaae ngiomwon ngulu ka ataparacu. Amaditaka; Abu ayong engolik akica ngin, ka abu ayong ebelekin, ka apotu ngicoge ngikanikaarei towaa alo kidiama aina alokaamukut, tosibite abunit alokakinet anapaipoi ka toyai erai ngina elosi apuripuriaar.
Atipei ekau a ngun, abu Ekapolo Yesu totakanu nenikosi. Ka anenipei abu ayong eira etoil ngolo abala ebe, “Jeoba ngolo ka akitutuket angina Ngorot inges Yesu ngolo ka Akitutuket angina Kitete.” Ka ayai Inges nen, kelunyar apaki adiocici, kepukun akau ngina angicoge angitaai a ngikanikaarei ngulu a egolid. Anen toanyu nai ngun. Ngiai emisiunito ngakiro ngun? Abu ayong egirak kau akabokis ngina ayakasi ngiboro ka atom alotooma epuko kang. “Jeoba ngolo ka Akitutuket angina Ngorot inges Yesu ngolo ka Akitutuket angina Kitete”. Eyeni Akuj ngolo Anakuj atemar iyookino ngun.
----
Ka asiomit ayong anabuk a Daniel, neni abunio Inges “Ngolo iboit ngikaru ka ngikaru, ngolo akuangak Ngiketim ikwa ekipaama.” Abu nai ayong engolik ngolo iboit ngikaru ka ngikaru. Arai Inges ngolo eboit ngikaru ka ngikaru, ngolopei ngol bien, nakuwarina, ka ngikaru kangikaru, kingolik, arai akisikwaanet, alorua kolong.
Kan nyo eraakar ekipaama ngolo akuangan? Ka anen ayong... abu Ekuwuam ngolo Akuangan kirwor nenikang kan nguna etapito epikica ngolo aanyunit ayong apei paki, ngolo a ekatubon angolo ngorot. Ka abu ayong olot loemuto; ka ngikatubok ngulu kolong, ikwa esasedooti ngolo apolon alotooma Isirael, abeit inges toyakatar ngolo akuanga ngol, ngakoruo nguna esyiaaka ka epenek, anerai itoodiarito ngilowi ngulu akuangak anenikeng apedor ngina alokidiama ngina a ngikatubok alotooma Isirael. Ka tar nakuwarina, ka alokaru ngidikidio a ngulu alunyarosi, acepaki ngikaru ngiarei kau, kori acepaki meere tar ikongin, akau adepar nen. Ngikatubok ngulu Musugui, tar kedit itunganan ikwani kori kemojongit ikwaani, ani elosete natubonokin, anapete akopiya ngina akuangan, akidodiar atemar emam nabo ace pedor, anapukan angin, eyai kidiama ngakecekiro. Erai akecekirot ngina erai esal alotooma apukan. Nguna elimunete ikes, dadang ngun.
Ka tokona, anen, aanyunit ayong ngun. Ayai ekile ngolo awoi aina, esorokit, nai tonapite akopiya ngina akuangan. Arai inges ka akileleba apedor ngina alokidiama. Arai Inges Akirot. Ka ayakatar Inges, enapit akopiya ngina akuangan.Anen, ekau ngina engetakinere iwon, alimonokin, ka alosit too ama, ka ani ngina atakanuniata ngipian a Ekapolon alokinga ka ama anguna angakipuceta, ka abu tolot kidiama lokuwuam (ngolo ikiyakatar iwon epikica nege, ka nakwapayok daadang), Awuoi Inges aina, toringa enapit akopia ngina ka apedor angina alokidiama. Erai Inges akou ngina a Ekanisa. Erai Inges akou ka akuwan. Emam nabo idiobore ngini ekwaan ka Inges, aiwadio. “Abu Inges Elope kitiyau ngiboro dadang. Abu kitiyau ngiboro dadang Angunakeng, kerai tomamu Inges kemam idiobore dadang ngini esubunitae.” Eyakatar Inges apedor daadang Anakuj ka alokwap, “Ka ngiboro daadang eyakasi nakan Keng.” Ka tooma Keng eyai akileleba ka Akujuwanut alotooma akuwan. “Ka erai inges Akirot ka Akuj, ka abu tonap akuwan kiboikin kiding yok.” Ka arai Inges apukunu akirworiunet ngina ka akiteyario dadang, ngolo apotu ngikaduarak dadang ka ngitunga ngulu aosok kirworito. Inges bon arai ngolo etanapitai akopiya ngina akuangan ngina ka apedor angina alokidiama.
Kwana, abu ayong owuo, alokidiama ekaamukut ataparacu ngina ngoon, asibit ayakasi ngicelekui ngulu kelunyanar aina. Ka abu ayong ogeu akiboikin kwap. ka ayai ayong inaa apaki adiocici, ngina, akagwaragwaraa ayong amoni, ka abu ecetunganan ngolo anapit atom bu elosi itorit namoni inaa, ka abu eketukurianik ayong noi. Abu ayong olot yaye, ka akijor alokwap; abu okobul ayong alosit, akabulit atemar kori akagumi inges ayong. Ka kiloiloo amoni, abu ayong eboikin ekililingat.
Abu eceleku togeu alokidiama ekaamukut, ka abu inges kiwaak epauda lobaketa ngulu atingit inges. Ka angun abu kitwania inges, ka abu nai eceleku toem kwap ekaamukut. Abu ayong otamak, “Kwana aekari ayong; eruo acela nign. Ka adau inges akibuk aketom.”
Ka abu ayong ogeu alokwap ekaamukut, ka abu etunganan ngolo togum kingaren kang. Abu ekenyaku ayong lowai lo. Ka abu ayong ogeu anege, alosit kwap esitiyai ecerot, ka abu amakana togeu aruun ka apotu ngimalia kitoro kidiama kang. Abu ayong otema, “Tema yong, ayai ayong nakibois ngina aronon.”Abu ayong ebelekin ka atiyaar nangolol. Ka abu ayong otamak, “Alosi ayong kwap nege ka akiduk akitodol ngina engetakiniata ikes, kotere alomari ayong kinga, abu ayong aapu... apotu ngakatameta kingoliasi lowai ngolo teten kang. Ka, ikwapei etiyakinia ayong, ayai apakit apei ngina ke esigara neni kebu epei alotoomakec tocakak kwap, alotooma akerit dadang ngina angicelekui itorito namoon.
Abu ayong eteki inges alokwap. Emam nyelemuna ayong inges, anerai emam nyamina ayong eure angiboro angul, anageunet. Ka abu ayong engolia kwap inaa, ka erai ekampani ece ngolo a esigara ngolo atami ayong emam nyebeit ayong alimor ekecekiro, nai iyenunete iyes. Elimunitoi aina, “Aliyet a itunganan angini etami ka abobou a itunganan angini emasi.”
Abu ayong eteki ibore ngin, ka abu ayong otamak, “Aliyet a itunganan angini etami a?” Atami ayong, “Arai ketami itunganan kire, pa kemat inges esigara jik. Ikokini inges eruwor Aliyet a itunganan a ngini etami ai? Pa kemasi etunganan ngolo etami jik.” Iyookino ngun.----
Abu ayong eteki inges, ka abu ayong otamak, “Erai ibore ngini ikwaan ka ngiyoko dinio nakuwarina, ngikanisai ngulu eyakare iwon.” Angolo din eyakar ka ekeceliyet; eyakatar ikes ekabila a ekeceliyet. Ecamakinete ikes dadang nguna ecamito alomun tolomut tooma, ka nyemisitai atemar nyo alomu tooma; nguna eliyete ikes kinga ka tooma, ka ekecekabila ka eliyet. Acamakis ikes neni alalan ka akwap alomun tooma akisimwonikin ngikapir ngulu eyakasi tooma inaa. Eyaarete ikes tooma nyemitakinito atemar ikote ikes ai, arai keyakatar ikes ngisilinga. Eyaete ikes ikec tooma nyemisitai neni ikote ikes, arai keyenara ikes. Nai eyai ipei bore ngini etapit ngun, emam nyipedori iyong alomun lokanisa ka Akuj alopite angol; meere edin tokona, apeleikinit ayong ngolo akire, ekanisa ngolo akire ngolo ka Akuj.----
Eyenete ngitunga, nguna ecamito ikes. Aso eriamunete ikes nguna ecamito ikes, eyakaunotor nai ikes ece kabila a eliyet, ka nguna ka akwap nguna kiyana, akisimwonikin akecekiiret ngina angakwapin. “Eliyet a itunganan a ngini etami, akiiret a itunganan ngina epuri. Eliyet ngolo a edin a ngakwapin, ka akiiret a itunganan a ngakwapin.”Ecamito ikes araut ngulu a edin. Etamete ikes atemar iitana ikes araut ngulu a edin, ebe anera eyakatar ikes etau. Ngina aponere iwon nakwap na, torukau ngimiidi ilipete akolong ka ngiboro nguluce dang, naarai (Kannyo?) erai inges itunganan. Ngina ebongorere iwon namon nguna ka akwap angikirionok, ikiriamuni iwon ngikeboyok ilipete ice bore. Kannyo? Erai ikes ngitunga, ka ecamito ikes, iitana akima.
Aso itunganan, tar kibusokina inges ikwaai, eyeni inges atemar eyai icebore iwace. Nai eyakatar inges akiiret ngina angakwapin, ngina nyeyayia inges eliyet ngolo akire. Ebeit inges toriamu ekeliyet ngolo itiyaunit elope. Angini tunganan etiyau eliyet keng a elope.
----
Toanyu alotooma Akimario 19, akacamit ayong iyes tosioma kiloto iyes lore, ngina iyakatar iyes apaki ace. Toripu, ngina asecia Isirael, nguna ingarenete alemunio ataok ngina arengan ngina pa ariongitor ayokot alogulingul keng. Akepolou ebe emam pa ariongit inges ayokot ngina a idio bore.Ka abeit inges toreng. Erai erangi ngolo arengan erangi ngolo mooket. Iyenete iyes, eyeni sayans atemar arai kilem iyong erangi ngolo arengan kitek erangi ngol, neni angolo arengan, erai ngolo akuangan. kingolik isitorit akongu lorangi ngolo arengan, aneni arengan, ekuang. Ite Inges anaakot a Ekapolon Yesu, ka ngaakot yok nguna arengat eruworosi nguna akuangak ikwa ekuno;Ngolo arengan aneni angolo arengan.
Ka aario ataok alosaa angolo ka atabong, atukot dadang ngina a Isirael. Ka ewaskinio ngirotin ngikanikaarei angaakot keng lopuke neni elomaria atukot dadang ngina a Isirael; akisikwanet ngina anganyameta angakankaarei, kan ngaakot.
Ka aponi nai yaarai akekuwan ka akicunyakin. Ka ecunyakinio ka ngimeeger, ka ejamu, ka ngamolitenyi, ka awaret, kaapei. Ka abeit tomud ekile ngolo asegan, ka abeit kiwaakinai nakibois ngina alokinga atukot. Angun, arai Isirael topedo akingolikin akisikwaanet! Emam Akirot ka Akuj na totingitetei angakan anguna engoriaka kan amamu anupit. Ebeit torai ekile ngolo asegan. Ka ani kerai inges ngolo asegan, abeit inges kitoru loliyet ngolo ka Akuj.
Ekile ngolo asegan, ngakan nguna asegak, ka abeit kingadakinai nakibois ngina asegan; Meere nakibois ngina eyakasi ata Yesebel, ka ngakaeok ka neni epangasi ngiboro dadang; tonyamete ekomunio ka ngioro nguluce dang, tokeret ka ngaberu, ka ngikiliok, ka angolo kabila ka asilio; toolset lodisikoi ka lopati, ka tonapito ngitim ngulu ebanyitai, ka ngisokologei, ka ngiboro luce dadang, ka tonyaras make ngikristo. Akingadakinio nakibois ngina asegan, ka totingitetei angakan anguna asegak. Ka nai ani eseci Isirael, ka aripun ateamar edyakarito ikes, awasio nai ka ekuron ka ataok ana, kidiama kes. Ka arai ngun ngakipi ka atyakun, akitesegunio anasecit.
Toripu. Enu ne! Ka ngina Isirael, eringa ikes nyepona nakimor tooma nakukonokin, ayai ikes mono akitor nakipi nguna ka atyakun. “Akitojokio kan anupit; ebuni kan akiirar, akiirar Akirot ka Akuj.” Alomarete nai natukot alokwap ngaeseyek ngun ngakankaarei, nguna angaakot, akidodiar atemar abu ice bore totwana ka abu tolot alokingaren kes, anguna ka asecit. Atyakunio ikes kan akiirar Akirot, ngakipi nguna ka atyakunio, Alomar nai nakimor.
Akibois apei bon ngina eriamunotor Akuj ka itunganan arai kau adoketait ngin. Emam pa eriamunosi ka inges aiwadio adaadang. Ayai inges abunore alokau epite ngol. Eriamuunun Akuj ka ngisirael anakibois ka apei. Ka iriamunosi iyong ka Akuj nakibois apei bon, ka erai tooma Yesu Kristo; ka erai Inges Akirot, ngakipi nguna ka atyakunio. Ka aponi tobukoroi ngaakot keng anguna anganyameta dadang nguna kankaarei. Ka nai, kan Ekuwuam ngolo akuangan, ikilomari iwon tooma nakimor ngin, ngina einakinitai ekanisa bon. Okoi, kepoloto nu nooi!
Ka dang, kwana, ikicamit iwon akingolikin Ngiepesoi 5:26, ebala, “Erai akilosio angakipi kan Akirot,” ngakipi nguna ka atyakunio. Anu itiyaete ngun? Anen, erai eliyet ka Akuj Akirot. Ngakipi nguna ka atyakunio, “Akilot angakipi, nguna ka atyakunio, kan Akirot,” Eliyet ka Akuj.
Anen, emam nyipedori iyong abunore neni a Kristo itorit loliyet a ekanisa. Emam nyipedori iyong abunore kan eliyet a edin kori eliyet ngolo angakitatameta angitunga. Eyai epei liyet bon, ngolo ipedoria iyong alomaria nakibois ngina akuangan ngin, erai kan “akilosio angakipi kan Akirot.” Erai Akirot ka Akuj Eliyet a itunganan a ngini etami.
Ikitubokini iyong ekanisa anege kirai iyong emembat ngolo ajokan kori mam. Ikiinakinete ikes iyong anukio ngina ajokan, ka atiyaun amendera anatwanare kon, ka akiyakiun ngainakineta nguna angatur ka etic ngakiro dadang angunakon. Nai ani edoli ekonitau akiwuo alokingaren Akuj, ebeit toyakatar akiyiar ngina Nyedaun. Ka ani kerai Akiyiar ngina Nyesaluni, erai atyaket ngina ka Akirot. Ka ikwanginapei nyengerioto ngakakiro... Emam nyepedori akakan akinger akakan. Emam nyengerete ngakakonyen akakan, kori akakeju, kori ekakimoin ngolo ka akeju, kori eka kiner edio. Emam nyepedorete akinger inges.
Ka emam nyepedori edio kile ngolo erai epei ka Akirot ka Akuj, kori aberu, akinger epei wae ngolo ka Akirot ka Akuj. Anen, ngaberu arai kitamete iyes ebe ipedorete iyes abunore kingaren nayakau ka Akuj ka ngitim ngulu ebanyitai, idyakarito iyes. Ingolikis iyes aa? Idyakarito iyes; emam nyipedorete iyes abunore aloliyet ka Akuj aneni ikilotarere iyes kan ngakipi nguna ka Akirot. Idio toloma tooma Nakimor. Itami iyong irai iyong, emam nyipedori iyong akitodol ngina ibunio iyong itorit Nakirot, ka angolo wai ngini edit, angini Kirot ka Akuj ngini edit. “Emam nyeyari itunganan ka atap bon, nai kan angina Kirot.” Iitana kitoru naliunio ngin, akitorun. Ka inges ikiini akiiret ngina ka akiyookino, naarai erai nguna iwarit inges ngun, iwarit idio bore akilotaria inges.
Akirot, Akirot ka Akuj inges Eliyet ngolo a itunganan a ngini etami, ka itiyauni akiiret ngina a itunganan angini iyookino. Ikiyeni iwon atemar iyookino ngun; eliyari asecit ngina ka amamu anupit kinga. Emam nabo amamu anupit ngina itorunio iyong Loliyet ngol, naarai erai akiiret ngina a ekanupan angolo akire.
Ecamit ekanupan ngolo akire araut ngolo iyookino, tar keya ngadi. Emam nyecamit inges alimun, “Ejok, emarara ayong nakoyo nguna eyenara. Emarara ayong lokanisa, lokanisa ngolo apolon alotaun.” Emam nyamisit ayong kerai emison alokoona, kori etolim ngolo angaten ke epiini, aiwace, etunganan ngolo etami eyeni atemar ebeit inges akiriamun ka Akuj. Ka pa emisitai nguna ebala ekanisa, kori idio tunganan, ebeit inges abunore anadoketa ka Akuj. Ka ngadoketa ka Akuj erai Akekirot. “Ejok”, ebasi ikes, “Akirot ka Akuj”.
Kire, enupito ikes dadang atemar erai Akirot ka Akuj, nai iitana iyong itoliun alotooma keng aa? Ikokini iyong icamakini aberu ngina ebanyit ngitim itori nen ai? Ikokini iyong itiyakini ngun ai? Ikokini iyong icamakini etunganan ngolo emam nyecamit akiting akitatam naga itoruni nen ai? Ingolik aa? Emam nyerai akiiret ngina a ekile a ngolo etami. Emam. Ekile ngolo etami etamakini, etamakini ekile ngolo etami ngaruatin ngaarei eringa inges nyeporokino ibore idio alopite angol.
Toripu emam nyengero Akirot ngin bon. Emwonikina nai, kori erai akiitanit. Erai akiitanit ngina ainyo? Nyo ikiinakini iyong iitani inges, anakibois anginaesiaunan? Naarai alokwap ekonitau ayai ekinyomit ngolo aseunitai ngolo arai Akiyiar ngina Nyesaluni, aperi jwijwi aina. “Dadang ngulu akainaki ayong Papa epote neni Kang. Emam idio tunganan ngini eoliyori.”
Akiiret ngina a itunganan, ngina iiraria etunganan ngolo etami Akirot ka Akuj, “Iirarete ngakamesekin Ekatoil, emam nyetupakinete ikes epeyonon,” naarai tooma inaa eyai Akiyiar. Eruco asecit ka asecit, ka esoswana asecit akitodol ngina etamia inges atemar kori eyiunit tomambo nyiyiunit. Eyai nacukulul ngina a esoswai.
Tosiomete alo akirot...
Eliyet a itunganan angini etami.
