Ekitoe ngolo ka Akiyiar.
(Ekinyomit ke Emun.)

William Branham.

Tosiomete alo akirot...
Aturi ngina a Epeso.

Apukokino 2:7,
"...Inges ngini ipiyori ainakini ayong akinyam a Lokitoe angolo ka Akiyiar, angolo eyiai kiding eparadiso ka Akuj."

Erai na akiikinet ngina a moi neni angikelounak a daadang a ngulu angaturio adaadang. Ngina ekutakinere a rupepe ngina ka anyarao lojie ngolo ka awasia, kedaun iwon akiperikin ngiboro yok ngulu jiet kwap, ikiponi nai iwon akiengun aloparadiso ka Akuj, ido ayokotyaket erauni Ekitoe ngolo ka Akiyiar, angina a ngikaru ka ngikaru.

“Ekitoe ngolo ka Akiyiar.” Nyerauni mono ngol erwor ngolo ajokan a? elimunitoi ngarwatin ngauni alotooma ekitabo ngolo ka Ageun ka ngarwatin ngauni alotooma ekitaabo ngolo ka Apukokino. Alotooma ngakiboisio nguna kanikapei nugu erai ekitoe lo ngolopei ngol ido itodiarit jik ibore nginipei ngin.

Nai nyobo Ekitoe ngolo ka Akiyiar? Kire, na esyaunan, ebeit mono iwon oyenutu apolou ngina iteyenunit Ekitoe. Alotooma Akimario 24:6, ikwapei etamia Balaam ngisirael, ebala inges ebe erai ikes “ngikito ngulu adupaki Ekapolon.” Ngikito a lotoma ngakigiret itodiarito ngitunga ikwapei alotooma ngikirukisio 1. Angun Ekitoe ngolo ka Akiyiar erai torai Etunganan ngolo ka Akiyar, ido erai nai ngol Yesu.

Aso ayiakasi ngikito ngiarei ewaasi alokiding Emanikor ngolo ke Eden. Arai epei ekitoe ngolo ka Akiyiar loce arai Ekitoe ngolo ka ayenun nguna Ajokak ka nguna Aronok. Abeit itunganan toyiar alokitoe a ngolo ka Akiyiar; pa abeit inges akitap Ekitoe loceye ani ketap etwani. Nai abu etunganan tonyam nguna ka Ekitoe aye, kedau inges akitiyia ngun tolomakini nai atwanare toma keng. Torauni nai inges ngolo etiakara aneni ka Akuj.

Aso Ekitoe ngol ngolo ayiai Eden, Ekitoe ngol ngolo arai alibunet ngina ka Akiyiar, arai Yesu. Alotooma Yokana 6 - 8 itodiara Yesu elope ikwa alibunet ngina ka Akiyiar angina emam nyedaun. Abu inges elope tonyarai ebe arai inges Amukati ngina abuni Anakuj. Abu inges kirwor nguna ka akipotun akekukuwan ka dang ebe kenyam itunganan akekuan emam nyetwani. Abu Inges kisera ebe ayeni Inges Aburam, ka dang ebe eroko Aburam Ayai Inges. Abu Inges todwar ebe erauni Inges elope abuni ainakin ikes ngakipi nguna Ayiarak nguna ani erai kemat itunganan emam nabo nyenyami inges akure, nai ebuni inges akiyiar ngikaru ngulu emam nyedaunosi. Abu Inges elope kitoodiar ikwapei “AYAI” NGOLO APOLON NOOI. Erai inges Amukati ngina ka Akiyiar, akare ngina ka Akiyiar, ngolo eyiari ngikaru daadang, Ekitoe ngolo ka Akiyiar. Ayiai inges sek inaa Eden kiding Emanikor ikwapei ebunio ayiakaunor kiding Eparadiso ngolo ka Akuj.

Etamito ngice ebe ngikito lu arei ngulu alomanikor ngul arai ngikito ngice ngulu ikwaan ka ngulu sek ewakinit Akuj nen. Nai ngikasyomak ngulu ecoitoko eyenete atemar mam ngun nyikote nen. Ngina eworoo Yokana Ekebatisan ebe idokokinitoe aep nataagor angikito adaadang, pa erworo inges nguna ikamunito ngikito kire, nai ayiai apolou keng tooma Lokuwam. Nai alotooma 1Yokana 5:11 ebala ebe;
“Naga inges AKITEYENUNET ebe, abu Akuj ikiinak iwon Akiyiar ngina angikaru ka ngikaru, eyiai dang Akiyiar ngin tooma lokoku keng.”
Ebala Yesu alotooma Yokana 5:40,
“Nabo nyicamito iyes aponare neni kang toriamut Akiyiar.”
Angun itodiarit Akirot ka Akuj etakani ka akilerer ebe Akiyiar, AKIYAR NGINA EMAM NYEDAUN, eyiai toma lokoku keng. Mam ka acekiding. 1Yokana 5:12,
“Inges ngini eyiai Lokoku, eyai Akiyar; ngini emam Lokoku ka Akuj, emam Akiyar.”
Aso ikwapei nyepedoror akiteyenunet akijulakino kerai dang tolemarae idiobore alotoma keng, kori akiyiatakino, inges atemar ewoi akiteyenunet ebe EYAI AKIYIAR TOOMA LOKOKU. Ikwapei ikoniata nugu nege, EKITOE NGOLO ALOMANIKOR NGOL ERAUNI YESU.

Iyookino. Erai kerai Ekitoe ngolo ka Akiyiar itunganan, apolou keng erai Ekitoe ngolo ka ayenun nguna Ajokak ka nguna Aronok DANG itunganan. Mam nyerauni icebore. Angun awaasi ngolo Eyokino ka ngolo Aronon ngol ediyediye anen aloking Emanikor ngolo ke Eden. Esekiel 28:13a,
“Iyiai iyong (Satan) Lomanikor ngolo ke Eden, Amana ngina ka Akuj.”

Nege inges ikiriamunia iwon Apukokinio ngina a kire ngina ke “Ekinyomit ke Emun.” Nugu ikes kire nguna apotu totakanut Alomanikor ke Eden. Ebala Akirot ebe abu Emun tomodik Eva abu kire Emun kisupa inges.
Ageun 3:1,
“Anen arai emun ngol, ngolo apiirianan noi akilo ngitiang daadang ngulu asubunit Ekapolon Akuj.”
Arai etyang lo ngolo ekwaan jik ka itunganan (Nai torai ca etyang) ka dang apedorit atamatam ka erwor dang. Kerai inges esubuna ngolo awoi itenara (ikwa itunganan) ido asibit ayiai inges kiding Ecom ngolo apolon ngolo angamoni (gorilla) nai toapikinite cut itunganan. Aapi inges nooi anaraut itunganan, tar ngina apedoria ekinyomit keng akimorikin ka ngini ka aberu akitodol ngina etopotiyorio inges. Ngina atakanuniata nugu, abu Akuj kilam etiang ngol. Abu inges kijulak ngina koit daadang anakuwan keng ikotere eliae ikwa emun. Epedori aosou ngina asayanis akingic daadang nguna ecamit nai mam nyeriamuni arucokina kec engopit. Abu Akuj toany ngun. Erai itunganan ngini aoson ido asakit inges aanyun arucokina ngina a itunganan ka etiang ecamit akitogogong nguna ka aluwonor (evolution). Emam adio luwonor. Nai abu itunganan ke etiang kingodiakin. Erai ngin apei kimunono ka Akuj ngina ewaitae nai apukor anege. Apotu ngun totakanut alokau ka ama alokiding Eden anguna abunio Eva tomulenio Akiyar anguna ka acamun Atwanare.

Toanyu nguna abu Akuj tolimok ikes alomanikori.
Ageun 3:15,
“ka dang ewaakini Ayong amoitanut kiding kon ka aberu, ka kiding ekonikinyomit ka ikekinyomit, ebuni inges akiwan akonikou ka ibuni iyong akiwan aketotinyo.”
Erai kikinyomitae iwon kire nguna ebala Akirot ebe ayiakar kire aberu abeeye, inges nait atemar keyakatar emun dang ekinyomit. Erai kerai ekinyomit ka aberu ikoku ngini kile nyiriamakina ka ekile, inges atemar ekinyomit dang ngolo ke emun abeit toyakaun alopite alopei angol, inges atemar abeit ice sapat kidounoe tomam akiitanit ekile. Emam ekasyoman ngolo nyeyeni atemar ekinyomit ngolo ka aberu erai kristo, ngolo abuni alopite ka Akuj, tomam ekile ayenun aberu alopite sek angitunga. Eyenen dang kojokon ebe awanat ngina ka akou ke emun ngin a atamitae ya arai adwarasit kire ngina ekamunit nguna abeit Kristo kirikak akitiyakin Satan alomusalaba. Alomusalaba anen abu Kristo towan akou a satan, satan dang towan atotinyo ke Ekapolon.

Atutubet ngina ka akigiret ana inges apukokinio ngina itoodiarit epite ngolo aekinor ekinyomit a etiang nakwap, ikwapei ikiyiakar ka nguna eyiakasi toma Luka 1:26-35, neni itodiarit cut epite ngolo abunio ekinyomit ka aberu kitodiunor etakani tomam akiitanit ekile.

“ka alolap angolo angikankapei abu Akuj kiyakiu emalaika Gabriel lotaun ngolo a Galilea, ngolo anyaritae Nazaret, neni ka apese angina emalat ekile ngolo arai ekekiro Yosepu, ngolo ka akai a Daudi; arai ekiro ka abikirat Maria. Abu emalaika bu neni keng, tema ebe, maata, iyong ngina ikiminae noi, eyai Ekapolon ka iyong: irereng iyong alokiding ngaberu. Kedau inges akingolikin inges, abu tobul inges anguna angakiro anguna abu kiira, totamak alotaukeng atemar ali malas lo? Tolimok emalaika inges tema, nyikibul, Maria: anerai iriamu iyong ajokis aneni ka Akuj. Ka toany, ipotiuni iyong anakook kon, ka idouni ikoku ngini sapat, ido ibuni iyong alimokin inges Ekiro YESU. Ebuni inges apoloor, ka dang eponio anyarare inges ebe lokoku angolo eyai kidiama noi: ka ebuni Ekapolon Akuj ainakin inges ekicolong apapakeng a Daudi: ido ebuni Inges akipuka akai apapakeng ngikaru ka ngikaru; apukan keng emam asalunet. Tobongok nai Maria emalaika tema, epedor nu ikwaani, anerai nyayakatar ayong ekile? Tobongok nai emalaika inges tema, ebuni Ekuwam ngolo akwangan neni kon, ebuni dang apedor angolo eyiai kidiama noi akimukor iyong; aneni inges ngini asegan ngini ibuni iyong akidoun ngin eponio anyarare inges ebe Lokoku ka Akuj.”

Ikwapei eraakar ekinyomit ngolo ka aberu Akuj auruun alotooma akuwan angitunga, aso ekinyomit ke emun dang inges erot ngolo abunio satan topedoria angaaria ekek ngolo etolomunia akekuwan lotunga. Anerai atyono satan ( anerai erai inges ekuwam kongin ngolo asubunio) auruun bon alopite angolo abunio Akuj tourunor, angun ikilimokinit iwon Ageun epite ngolo aurunia inges ekekinyomit kitodiunor ka topedunor tooma ngitunga. Ka dang kiitunite ebe enyaritae satan ebe 'emun.' Ikirworo nai iwon nguna ikamunito ekinyomit keng ka elomune keng lotunga.

Eroko Adam nyeyenuna Eva aberu keng, abu emun kisiau ayenun inges ekingaren. Ka arai ngolo aponi tourunae alopite alo Kaino. Arai Kaino (euriat, eletonit) lokoku a ngolo “Aronon.” 1 Yokana 3:12. Pa apedori Ekuwam ngolo Akwangan alotooma Yokana anyarare Adam ebe “ngolo aronon ngol” (mati kerai inges eurunit Kaino) ido nabo ka acekiding tonyara Adam ebe “Lokoku ka Akuj” arai inges lokoku ka Akuj alotoma asubunio. Luka 3:38. Abu nai Kaino kijulakin alopitesio keng ikwa papa keng, ngolo arai ekaiaunan atwanare, ekaaran. Alopite angolo abunio inges towoikinia Akuj ngina alosikinio inges ngolo etiron ngiboro daadang alotoma Ageun 4:5,13,14, etakani inges anen alopitesio keng erai cut ngolo nyikwaan ka itunganan, ido esibit elunyara inges alopitesio keng akilo nguna iteyenunito ngakigiret nguna ikamunito apaki daadang ngina elosikinio Akuj satan dang,
“nai neni a Kaino ka ainakinet keng pa abu inges tocamu. Ido abu Kaino tongo nooi, tonyoridid ereet keng. Tolimok nai Ekapolon Kaino tema, ai bo eyai lokaatokon Abele? Abu inges tobongok tema nyayeni ayong: arai ayong ekeyokon alokaatokang a? Tobongok nai kaino Ekapolon tema, epol nooi akisicanio kang nyapedori ayong akidang. Toanyu, ikirit iyong ayong anapaaran ana anakwap; ido abuni ayong angopit aloreet kon; arauni dang ekakeran ngolo elwari anakwap; ido daadang ngini akariamuni ayong akaari.”

Kitek kojokan epite ngolo itoodiunitor akiteyenunet ka Akuj ngauruneta a Kaino, Abele ka Set. Ageun 4:1,
“Abu nai Adam toyenu akeberu Eva, abu nai topotiu, ido touru Kaino, ka abu tema ebe, adau ayong ariamun esapat aneni ke Ekaoplon.Abu nai nabo inges touru lokatokeng Abele.”
Ageun 4:25,
“Abu nabo Adam toyenu akeberu; abu inges touru ikoku ngini sapat, tolimok ekekiro Set...”

Erai ngisapa ngiuni abu Adam touru anakiriamuneta angaarei. Ikwapei eraakar Ebaibul Akirot ka Akuj ngina itemokino ka Kiyokino dang, nyerauni nai naga adiobucaret nai erai inges akiteyenunet ngina ka kitacaikino yok. Ikwapei aurunere ngisapa ngiuni aloticisio a NGIAREI ka Adam, iyeni iyong KOJOKAN atemar EPEI alotoma ngiuni ngul PA ARAI lokoku ka Adam. Abu Akuj kigir nugu alopite alo ikotere ikitodikini inges iwon idiobore. Nguna akire nu ebe, ayiakatar Eva nakook keng ngisapa NGIAREI (ngimuu) anaurikineta anguna AGELEGELIA. Ewokit inges ngimuu, kingarenikinite nai apotiorio a Kaino ngina ka Abele.

Tosiomete alo akirot... Aturi ngina a Epeso.

Ingolikia... Ekinyomit ngolo ka Emun.

Aŋun, ileereunete ŋidwe ŋulu erae ŋulu ka Akuj ka ŋulu erae ŋulu a Satan; ituŋanan daadaŋ ŋini nyitiyae ŋuna iyookino, kori ŋini nyemina lokaato keŋ, nyerae iŋes ikoku ka Akuj.

Kire, erae nu ŋakiro ŋuna ipotu iyes kiirasi ŋinapei anakisyakinet ebe, itemokino ominin make.

Nyikikwaanikin ka Kain ŋolo ariit neni a ŋolo Aronon, ŋolo abu toar lokaato keŋ Abel. Kaanukiro aarya iŋes lokaato keŋ? Anerae aroko ŋiticisyo keŋ ka kiyookino ŋulu a lokaato keŋ.

1 Yokana 3:10-12