Ahabw’enki Omwoyo Orikwera yaahairwe?
<< prev
next >>
William Branham.Read the full account in...
Ahabw’enki Omwoyo Orikwera yaahairwe?.Yohaana 14:26,
Kwonka Omuhwezi, Omwoyo Orikwera, ou Isheboona aryohereza omu iziina ryangye, niwe aribeegyesa byona, akabaijutsya byona ebi naabagambiire.Nyomwabazyo ekiro tubaire nitugamba, “eki Abaire ari.” Omwoyo Orikwera Akaba Ari Ki? Kandi Tushangire ngu We ni buri kintu, eki Ruhanga yaaturagaaniise. Ahaa. Omu Mwoyo Orikwera tushangiremu eki Ekanisa ya Ruhanga yaabaire neeza kwetenga. Tumushangire kuba ari akamanyiso, Omuhuumuza, ekihuumuro, okushemererwa, n'obusingye, n'okuzooka. Kandi byona ebi Ruhanga yaaragaaniise Ekanisa Ye, biri omu Mwoyo Orikwera.
-----
Hati, kandi nyencakare... Ekiro eki nitwegyesa aha: Ni Kigyendererwa Ki Kya Ruhanga Ekyatumire Yaayohereza Omwoyo Orikwera? N'Ow'enki? Ku Araabe ari ekintu kikuru kityo, mbwenu ahabw'enki Ruhanga Yaamwohereize?-----
Hati, ekigyendererwa, ekigyendererwa kya Ruhanga omu kwohereza Omwoyo Orikwera kikaba kiri ki-kikaba kiri ki? Hati, ekyo nkaakihandiika, Yohana 14, okutandikira aha mushororongo gwa 14, kandi n'okushoma omu shuura yoona, okutaho omusingye. Ekigyendererwa kya Ruhanga, nitureeba hanu, omu kwohereza Omwoyo Orikwera, kikaba kiri ekigyedererwa kimwe, kugira ngu Ruhanga We wenka abaase kutuura omu Kanisa Ye n'okugumizamu entebeekanisa Ze kurabira omu Kanisa. Ngu, Ruhanga akaba ari omuri Kristo, kugumizamu entebeekanisa Ze kurabira omuri Kristo; kuruga omuri Kristo, kutaaha omu Kanisa, kugumizamu omurimo Gwe kurabira omu Kanisa.Hati, nitumanya eki Omwoyo Orikwera ari. Tushangire, ekiro kya nyomwebazyo, ngu Ni Ruhanga. Hati, ku turikuteekateeka ahari Ruhanga, Tataitwe, nka Yesu oku yaagambire hanu, Ishe; Ruhanga, Omwana, nka Yesu; Ruhanga, Omwoyo Orikwera, nk'oku Tumweta ebiro ebi. Hati, ekyo tikirikumanyisa ngu hariho abantu bashatu, Baaruhanga abeetongoire. Nikimanyisa ngu hariho Ruhanga omwe omuri za ofiisi ishatu.
Ka tukigambe tuti. Byona ebi Ruhaga yaabaire ari, Akabishuka omuri Kristo, ahabw'okuba Akeemaramu Weena kandi Yaakishuka omuri Kristo. “Kandi omuri Kristo hakaba harimu obwaruhanga bwona obureeberwa omu mubiri Gwe.” Byona ebi Yehova yaabaire ari, Akabishuka omuri Kristo. Kandi byona ebi Kristo yaabaire ari, Akabishuka omu Kanisa; ti mu muntu omwe, kureka omu Mubiri gwona. Aho, twateeranira hamwe omu bumwe twine Amaani. Byona ebi Ruhanga yaabaire ari, bikaba biri omuri Kristo; kandi na byona ebi Kristo yaabaire ari, biri omuriiwe. “Ahakuba Ruhanga akaba omuntu, kandi yaatuura naitwe.” Timoseo y'okubanza 3:16, ku muraabe nimukihandiika, “Hatariho kubangaanisa enaama y'Obwaruhanga ni nkuru: ahakuba Ruhanga akeeyoreka omu mubiri, kandi Twamukwataho. Ruhanga, Yehova, ahindukire omuntu, kandi yaatambura omu nsi, kandi Twamureeba n'amaisho gaitu.”
Nimumanya, omu shuura niyo emwe, ya Yohaana 14, Filipo akagira ati, “Mukama, tworekye Isheboona, kandi ekyo nikitumara.” Yesu yaagira ati, “Filipo, ahi naakatuurira naimwe, Tokammanyaga? Ondeebire, biri areebire Isheboona. Mbwenu n'enki ekirikukushabisa oti, 'Tworekye Isheboona'?” Ruhanga akahinduka omuntu.
Hati nkiki hanu. Isheboona akaba ari Ruhanga ahaiguru yaanyu, nikwo turikugamba. Tutwireho kwiha ahari Adamu. Ruhanga, Isheboona, akaba ari ahaiguru ya Musa n'abaana ba Israeli, omu Nyomyo y'Omuriro. Obwo, Ruhanga arinaitwe, omuri Kristo; yaatambura naitwe, yaagamba naitwe, yaarya naitwe, yaabyama naitwe. Ruhanga ahaiguru yaitu; Ruhanga arinaitwe; kandi hati Ruhanga omuriitwe. Byona ebi Ruhanga yaabaire ari, bikataaha omuri Kristo; byona ebi Kristo yaabaire ari, byataaha omu Kanisa.
Niki? Ruhanga naakorera omuriiwe. Ahantu hoona omu nsi ahi Yaakwenda kukutaayaayira, oriho aho honyini, naakorera omuriiwe okukora okukunda Kwe kurungi. Ka tushemereire kusiima Ruhanga ahabw'ekyo! Ruhanga, Omwoyo Orikwera, ayohereziibwe ahabw'ekigyendererwa kya Ruhanga kutuura omu Kanisa Ye, naagyenda kurabira omuri buri busingye, naakora okukunda Kwe kw'Obwaruhanga.
-----
Kandi okwo nikwo Ruhanga yaakozire, akakuratira ebiragiro Bye. Ruhanga tabaasa kukurata, kukuha ekiragiro kimwe ky'okukuratira reero We akakuratira ekindi. Akuratira ebiragiro Bye. N'ahabw'ekyo, Ruhanga, kwenda ngu acungure ekanisa ebuzire, ensi ebuzire, eby'obuhangwa ebibuzire: Ruhanga, Ogwo otaine bugarukiro omu Mwoyo, okucungura oruganda rw'abantu ababuzire, Ruhanga We wenka akaba omunyabuzaare, Omuntu, Omwana ou Yaahangiire omunda ya Mariamu. Reero Yaataho akamanyiso, nari obujurizi; aheeru y'amarembo ga Yerusaalemu, Yaaterurwa yaaza ahagati y'eiguru n'ensi, kandi yaafa, reero yaacungura byona. Reero omu kujwa eshagama, Akeeza Ekanisa kugira ngu We wenka Abaase kugituuramu, kandi akwatanise kandi ahurizane nayo, ogwo mwanya ogwabuzire gw'okukwatanisa kuruga omu kibanja kya Edeni omu Ruhanga yaabaire ashuuma buri mwebazyo, omu bwire bw'okuza aha kanisa.Mwetegyereize, Ruhanga akashuuma omu mabeho g'omwebazyo, eizooba nirirengarenga. Hariho ekintu nanka obwire ku butandika kwira, abantu bateekateeka aha kanisa n'ahari Ruhanga; Abakristaayo. Nooreeba eizooba nirirenga, nooyetegyereza ngu eizooba ryawe nirirengarenga.
Kandi omu mabeho g'omwebazyo Akaba ashuuma ahansi reero akwatanisa nabo. Kandi aho Akafeerwa okwo kukwatanisa, ahabw'okuba ekibi kikaba Kitarikumwikiriza kukikora. Reero Yaaba omuntu kandi yaatuura naitwe, kugira ngu Abaase kugarukira omuntu omurundi ogundi, kandi atuure omu muntu, kandi agarure busya omuntu omu mbeera y'okukwatanisa Nawe omurundi ogundi, reero amugarurire obugabe bwe obu Ruhanga yaamuhaire. Ekyo nikyo Yaakozire.
Ekyo nikyo kigyendererwa ky'Omwoyo Orikwera. Ni Tataitwe, nabwo, Ruhanga Tataitwe otwire omuriiwe, naakora entebeekanisa Ze, okumariiriza entebeekanisa Ye y'obucunguzi; naakora kurabira omuriiwe, naakuhindura omukozi hamwe nawe; Naakuheereza omwanya, naakuha omugabo ahabw'ow'eishe-emwe ogwire, obuzire n'ow'eishe-emwekazi; naakuha Omwoyo We na Rukundo Ye, okuza kusherura ababuzire, nk'oku yaakozire omu kibanja Edeni. “Adamu, Adamu, ori nkahi?” Ekyo nikyo Omwoyo Orikwera akora aha mushaija nari omukazi. Ku ataaha omu mitima yaabo kandi Akatunga obutaaho, nihabaho eiriho n'okugira enjara ahabw'abantu ababuzire.
Ako niko kabi akari omu nteerane z'eriizooba. Tizirimu okukwatwaho kw'Omwoyo okurikugasha omurizo, okuza kusherura emyoyo y'ababuzire n'abarikufa. Okukira munonga n'okukora eiziina, nari ekanisa, nari ekyombeko, nari ekigombe ky'ediini, omu mwanya gw'entebeekanisa y'okureeta abantu omu kujunwa. Ka n'eky'obusaasi! Nitubaasa kukigumaho munonga.
-----
Hati omu busingye obu obu tutwiremu hati, obusingye obu, burengire obwa Pentekoote. Pentekoote ehamiire omu bibiina by'amadiini, kandi yaatandika kutooreza munonga ebikwatsire aha bibiina by'amadiini eti, “Turi eki kandi turi kiriya.” Ekyo n'eky'obuhangwa kwonka. Tokaabaasa kukizibira. N'obuhangwa. Ekyo baryakikora. Niyo puraani, yaabo kukora ekyo. Kwonka Ekanisa eyeyongyeireyo omumaisho. Etaahire omu kintu kikuru okukiraho ekiine amaani agarikukiraho. N'okugarurwa busya kw'ebiconco.Kandi Abapentekoote baingi tibarikwikiririza omu kutamba kwa Ruhanga, obuheereza bwa Baamaraika, n'amaani ga Ruhanga. Abapentekoote baingi beeta okworekwa oku ndeeba, “daimoni.” Ebibiina by'amadiini bingi tibaraije nangwa n'okugira akakwate Nakyo, omuri Pentekoote. Mwareeba, ekyo tugyenzire twakirenga. Nk'oku Abametsodisiti baayetsire Abapentekoote, “abagwa eiraro,” ahabw'okugamba omu ndimi. Nk'oku Abaluteeri baayetsire Abametsodisiti, “abagwa eiraro” ahabw'okuteera akaari. Mwareeba?
Kwonka kwona n'okwija kw'Omwoyo Orikwera, okuhitsya obu Ekanisa nkuru eraijure, kandi ekatsindagirwa buzima, haleluya, n'amaani maingi ga Ruhanga ow'Obushoboorozi bwona. Okuhitsya obu, kihikire omu bwire obu emirimo yonyini ei Yesu yaakozire eriyo neeyeyorekyera hanu honyini omu Kanisa hati. Turi haihi, banywani.
Ka nyemerere hanu, kumara nk'edakiika, kutunga eki Ruhanga yaateereire Omwoyo Orikwera omu Kanisa, mbahe ekirikushushanisa ekindi kugira ngu mwije kumanya. Enyima omu Ndagaano eya ira, o-omwana ku... Omushaija akaba ayeyombekyera enju. Akaba ataasya omugore we, ekyo nikyo kintu ky'okubanza. Bwanyima aba omushaija w'amaani, nk'ekibiina ky'ediini. Ekyo kikaba kiri kirungi. Ekintu ekindi kubaho, omwana azaarwa omu ka egyo. Obwo n'obu Omwoyo Orikwera, mwareeba, ogundi mwoyo gutaahamu, owaabaire ari omwana. Ogwo mwana, akaba ataine obushoboorozi bwona, n'obu kwakuba kuba omuhunguzi okuhitsya obu yaabaire aba ow'emyaka nanka. Kandi akaba ateekwa kubanza, yaagyezibwa. Eego. Reero bakaba baine ekiragiro ky'okuhindurwa omwana oine obushoboorozi. Ahariimwe abaheereza, “okuta omwana omu mwanya gwe,” nikyo ndikugambaho hati, mwareeba, bwanyima akaba ahika omu bwire obu yaabaire ahindurwa omwana oine obushoboorozi....
-----
Nooba otakahindwirwe okuhitsya obu oraatungye Omwoyo Orikwera. Ekyo kihikire. Noikiriza “kuhika aha.” Omwoyo Orikwera agambire naiwe, kandi waamwatura omu bantu. Sitaane aine ekintu nikyo kimwe. “Niinyikiriza ku ari Omwana wa Ruhanga.” Na sitaane nikwo aikiriza. Kwonka noogyenda noogumizamu Kumushanga.Obu, Petero akaba ayetsirwe kandi aihirweho orubanja, ahabw'okwikiriza Mukama Yesu Kristo; kandi omuri Yohaana 17:17, Yesu akabeeza kurabira omu Kigambo, ahakuba Ekigambo kikaba kiri Amazima. Kandi akaba ari Ekigambo. Yohaana I, neegira eti, “Bwa mbere na Mbere hakaba hariho Kigambo, kandi Kigambo ogwo akaba atuura na Ruhanga, kandi Kigambo akaba ari Ruhanga. Kandi Kigambo yaaba omuntu, kandi yaatuura naitwe.” Akaba ari Kigambo, n'ahabw'ekyo, Akabeeza. Akagira ati, “Taata,” naagambira Omwoyo ori Omuriwe ati, “Nimbeeza kurabira omu Kigambo,” We wenka, ahabw'okubataho engaro Ze. “Ekigambo Kyawe n'Amazima.” Akafa kugamba kusha Yaabaho, omuri nyinenda y'omukazi; oo, tikirikubaasika na kakye We kuba omuringo ogundi gwona gutari nk'oku Ekigambo kya Ruhanga eki Kirikumworeka. “Nimbeeza.”
-----
Hati, “Emirimo ei Nkora.” Ruhanga ari omu Kanisa Ye, okugumizamu emirimo Ye. Ekyo nikyo Yaatumiire Omwoyo Orikwera. Hati, ekyo Akaba naakimanya. We, Akaba naamanya ngu tikyakubaire, tikyakubaasize kukorwa omuringo ogwo, n'ahabw'ekyo kikaba kiri omuringo ogundi, n'ahabw'ekyo akaba Naateekwa kutuma. Isheboona akatuma Omwana, kuta byona ebiri omu mai... Omwana omuriiwe. Kandi emirimo niyo emwe ei Yaakozire, emirimo niyo emwe yonyine hati ei Yesu yaakozire, naimwe muryagikora, Ekanisa. Timukaayenzire kukora emirimo ya Ruhanga? Yesu akagira ati, “Ku oraabe nooyenda kukora emirimo ya Ruhanga, Onyikirize.” Noomwikiriza ota? Torikubaasa kukikora otakatungire Omwoyo Orikwera. Habw'okuba, tihariho muntu orikubaasa kugira ngu N'Omwana wa Ruhanga; noogamba eki ondiijo muntu yaagambire.“Baiburi ekagira ngu N'Omwana wa Ruhanga; niinyikiriza Baiburi.” Ni kirungi. “Baiburi egira ngu N'Omwana wa Ruhanga; niinyikiriza Baiburi. Omuriisa agira ngu N'omwana wa Ruhanga; niinyikiriza omuriisa. Maawe agira ngu N'Omwana wa Ruhanga; niinyikiriza maawe. Munywani wangye agira ngu N'Omwana wa Ruhanga; niinyikiriza munywani wangye.” Kwonka omuhanda gwonka ogu ndikubaasa kugira ngu N'Omwana wa Ruhanga, n'obu Omwoyo Orikwera arikutaahamu kandi Akeehamya We wenka, obwo nibwo ndikumanya ngu N'Omwana wa Ruhanga.
“Tihariho muntu orikubaasa kugira ngu Yesu ni 'Kristo,' kureka ahabw'Omwoyo Orikwera.” Haa! Tihariho omuntu owaakugambisibwa Omwoyo wa Ruhanga owaakugira ngu Yesu akyeenwe, nari akagira ngu Akaba ari ekintu nanka ebiro ebyo kandi n'eriizooba n'ekintu nanka. Ekyo Nikimuhindura otaine maani kandi omweremwa. Ngaaha, sebo. Niwe omwe otahinduka oku abaire ari nyomwebazyo, n'eriizooba nikwo ari, kandi nikwo ariguma ebiro byona. Omwoyo gwona gw'amazima nigwija kuhamya ekyo. Ni kirungi.
-----
Omwoyo Orikwera akaija kukuha Amaani. Nyine ebindi Byahandiikirwe hanu, nk'edakiika. Omwoyo Orikwera akaija kukuha Amaani. Ti-tinyine... Eki nimubaasa kukisherura; naakyerererwa munonga, ekiro eki. Okukuha Amaani, Amaani omu kushaba!Kwata omuntu otwire amagara marungi, kwonka batuura nibasingurwa. “Oo, ninkugambira...” Omuntu murungi ati, “Oo, buzima, ninkunda Mukama, Ow'eishe-emwe Branham.” Buriijo basingurwa, tihariho eshaara yaabo eragarukirwemu. Ijuza ogwo mukazi mukye n'Omwoyo Orikwera rimwe, oreebe ekiraabeho. Yaaza omu maisho ga Ruhanga, tarikusingurwa. Naija n'obumanzi aha Kitebe ky'Obukama kya Ruhanga, naikiriza. Aine obugabe ahabw'okuba ni muhara wa Ruhanga, ahabw'Okuzaarwa. Kwata ogwo mushaija mukye, omunyabwoba munonga, omukuru aha murimo naamutsindika oku n'oku. Agire ati, “Rindaho hanu edakiika hati.” Hariho ekyahindukireho, mwareeba, aine Omwoyo Orikwera. Naakuha Amaani. Amagara gaawe gaijwire Amaani.
-----
Oo, mugyenzi! Naaba ningamba aha Maani g'okushaba, Amaani g'okugamba, Amaani g'okutuura amagara agarikwera. Amiina. Ebyo nibyo Omwoyo Orikwera aine kukora. Bamwe omuriimwe bantu 'mwe abarikugyenda, nimugira muti, “Mbwenu, tindikubaasa kuruga aha kunywa. Tindikubaasa kuruga ahari eki.” Omwoyo Orikwera naija kutuura omuriiwe, kutuma za “tindikubaasa” ezi zoona zaarugaho. Ekyo kihikire. Kutuma abakazi baareka kushara eishokye ryabo, kubareetera kuruga aha kujwara zaasikaati ngufu munonga n'empare daingwa. Tihariho rwekwatso. Kutuma waareka orugambo. Oo, eego, ekyo nikyo kigyendererwa Kye, kutuma waatuura amagara agarikwera. Naija kukuratira okuhabura kwa Baiburi obwire bwona.Omukazi naagira ati, “Nihootsya munonga; ninteekwa kujwara ebi. Ninteerwa omutwe ku ndikureka eishokye ryangye rikakura.” Kwonka tihariho rwekwatso aha Mwoyo Orikwera. Ari aho kukikora atyo. Buzima Naija kukuratira Ekigambo. Ekyo nikyo Omwoyo Orikwera akora. N'ow'okutuma iwe omushaija waahindura omutwe gwawe kuruga ahari abo bakazi abari nk'abajwaire busha, kandi okareka kubarigira, kandi bari baamemba b'ekanisa. Ekyo nikyo Akora.
Read the full account in...
Ahabw’enki Omwoyo Orikwera yaahairwe?.
Obushwere n’Okushenda.
