N'akamanyiso kaawe.

William Branham.

Read the full account in...
Omwoyo Orikwera Niki?.

Hati, nshabire tabirinaakuru egi... Hati, titurikutaaha omuri eki nk'ahabw'okuteerana kw'omwanya muraingwa kwonka. Niinyenda kutaaha omuri eki, kandi nimbenza, kandi nshabire, okwotsya buri rutindo orubari enyima, kandi n'okweteisa buri kibi, kugira ngu nitutaaha omuri eki na byona ebiri omu mitima yaitu n'omu magara gaitu. Nituteekwa kwija hanu ahabw'ekigyendererwa kimwe kyonka ky'okutebeekanisa emitima yaitu ahabw'Okwija kwa Mukama, beitu hatari ahabw'ekigyendererwa kyona ekindi. Kandi nk'oku naagamba kandi nkagira, ngu shana obumwe n'obumwe nimbaasa kwegyesa nari kugamba ekintu ekyakubaasa kuba kihindukireho kakye aha ky'omuntu ondiijo, omuringo ogu barikukiikirizamu. Ti-tindi-tindaizire ahabw'okuteera empaka, nimureeba, nka-nkaija... Turi hanu okweteekateekyera Okwija kwa Mukama.

-----
Omu mwanya ogu, nitwenda kuturukirira eishomo, eri ndikuteekateeka ngu n'eishomo ry'omugasho ry'ebiro ebi, erya... Omwoyo Orikwera Niki? Omwoyo Orikwera niki? Kandi, hati, enshonga etumire naatwara amashomo aga gakurataine gati, torikubaasa kwija haza okatunga Omwoyo Orikwera waaba otarikumanya eki Ari. Kandi torikubaasa Kumutunga, waaba noomanya eki Ari, shana waikiriza ngu Akakuheebwa, kandi N'owaawe. Kandi, kyaba kiri kityo, torikubaasa kumanya yaaba Omwine, nari otamwine, shana waaba orikumanya ebi Omwoyo Orikwera arikureeta. N'ahabw'ekyo waaba noomanya eki Ari, kandi n'ow'oha, niki eki Akora Yaija, obwo noija kumanya eki oine ku Oraamutungye. Mwareeba? Ekyo kyonka nikibaasa kumara.

Hati, hariho entaaniso mpango munonga rwagati y'Omukristaayo n'Omukristaayo oijwire Omwoyo Orikwera. Kandi hati eki twaza kukiiha omu Byahandiikirwe, kandi tukite buzima omu Byahandiikirwe. Eky'okubanza, hariho Omukristaayo orikwatura kuba Omukristaayo. Kwonka Omukristaayo ogu ku araabe atakaijuziibwe n'Omwoyo Orikwera, ari omu rugyendo rw'okuba Omukristaayo kwonka. Mwareeba? Ayatwire Kumwikiriza; naakora Kumutunga, kwonka Ruhanga takamuhaire Omwoyo ogu, Omwoyo Orikwera. Takahikire aha kigyendererwa ekyo na Ruhanga, kugira ngu Ruhanga yaamwikiriize.

-----
Okusharwa n'ekirikushushanisa ky'Omwoyo Orikwera. Kandi Ruhanga akaha Abrahamu a-akamanyiso k'okusharwa ahanyima y'okwikiriza Ruhanga okuragaanisa Kwe kandi akagyenda akaza omu nsi etari yaabo. Mwareeba? Kakaba kari akamanyiso. Kandi n'abaana be boona, n'oruzaaro rwe orurikurataho, nibateekwa kugira akamanyiso aka omu mubiri gwabo, ahabw'okuba kakaba kari entaaniso. Kakaba kari ak'okubataanisa omu bandi bantu boona, akamanyiso aka ak'okusharwa. Kandi ekyo nikyo Ruhanga arikukozesa ebiro ebi. N'akamanyiso k'okusharwa kw'omutima, Omwoyo Orikwera, ohindura Ekanisa ya Ruhanga Ekanisa eyetaaniise kuruga aha zindi nyegyesa zoona, enyikiriza n'ebigombe by'amadiini. Bari omu bigombe by'amadiini g'emiringo yoona, kwonka nabwo n'abantu abeetaaniise.

-----
Nooba ow'omutaano munonga Omwoyo Orikwera yaakwijaho, okuhitsya obu abaine obwengye bw'ensi egi batarikukukunda, kandi nibakurwanisa, kandi tibaine kakwate naiwe, na kakye. Ozairwe omu nsi endiijo. Ori omunyamahanga, omunyamahanga emirundi ikumi kukira oku waakubaire, ku waakugiire omu byanga bya hare munonga by'omu mahamba ga Afrika. Nooba ow'omutaano Omwoyo Orikwera yaija, kandi N'akamanyiso. Ni raama omu bantu. Hati, noogira oti, “Mbwenu, Ow'eishe-emwe Branham, ako kamanyiso k'okusharwa kakaheebwa Abrahamu?” Ago n'amazima. “Kandi n'Oruzaaro rwe?” Eego.

-----
Hati, Abaefeso 4:30 neeshomwa eti:
Kandi mutarigwisa kubi Omwoyo Orikwera wa Ruhanga, owaabateereirweho kuba akamanyiso okuhitsya aha kiro ky'okucungurirwaho.
Ninteekwa kugumisa kakyeho ahari eki hati, okukishoboorora butunu. Hati, imwe b'eishe-emwe abeegamira ebiragiro, mutuuzeho akaanya kakye. Mwareeba? Mwayetegyereza akamanyiso ako omwanya ogu karikumara? Ti kuhitsya aha kusisiimuka okuraakurateho, okuhitsya obundi bwire obu ekintu kiraashobe. “Okuhitsya aha kiro ky'okucungurirwaho kwanyu,” obwo nibwo bwire obu orikumara oteirweho akamanyiso. “Okuhitsya aha kiro ky'okucungurirwaho kwawe,” obu oraacungurwe kuba hamwe na Ruhanga, obwo nibwo bwire obu Omwoyo Orikwera araakuteho akamanyiso. Ti kuruga aha kusisiimuka kuhika aha kusisiimuka; kureka kuruga omu Butahwaho kuhika omu Butahwaho, nooteebwaho akamanyiso Omwoyo Orikwera.

Ekyo nikyo Omwoyo Orikwera ari, N'akamanyiso ka Ruhanga, ngu Aboine... waagirirwa embabazi omu maisho Ge, kandi Naakukunda, kandi Naakwikiriza, kandi Yaakutaho akamanyiso Ke. Akamanyiso niki, omuntu weena? Ahabw'enki, akamanyiso nikooreka nari nikamanyisa “omurimo oguhweire.” Amiina. Ruhanga akujunire, yaakweza, yaakushemeza, yaakusiima, kandi yaakutaho akamanyiso. Amazire. Ori ekintu Kye okuhitsya aha kiro ky'okucungurirwaho kwawe. Ekitairweho akamanyiso ni “ekintu ekihweire.” Omwoyo Orikwera niki? N'akamanyiso. Ekyo nituza kukihikaho handihakye, omu Butumwa obundi, akamanyiso aku Paulo yaagambireho. Endimi kakaba kari akamanyiso aha baikiriza... nimmanyisa abatarikwikiriza.

Hati mwetegyereze, kwonka, omuri eki, Omwoyo Orikwera n'akamanyiso. Nimmanyisa... Kandi Omwoyo Orikwera n'akamanyiso. N'akamanyiso aku Ruhanga yaahaire abaana Be abaatoorainwe. Okukanga, n'okucuubwa omu bantu; kandi Okukatunga, ni ebintu by'ensi kukuhwamu hamwe n'ebintu by'ensi byona, n'okuba ekintu eki Ruhanga ataireho akamanyiso k'okuhamya.

Nkaba ninkora omu ruguuto rw'egaari y'omwika ebiso hanu hamwe na Harry Waterberry, kandi tukaba tushuuma kupakira emotoka. Murumuna wangye, Doc, oyemereire enyima aho, ayamba kupakira emotoka. Emotoka yaaba neepakirwa, nibakyebera emotoka egyo, omukyebezi, kandi yaashangamu ekintu kyona ekitahamire, ekyakubaasa kugwa kandi kikahendeka, nari ekintu kyona ekyakubaasa kushiisha; tarikuza kuta akamanyiso aha motoka egyo okuhitsya obu emotoka egyo erikupakirirwa kimwe, okuhitsya obu erikutsindagiririrwa kimwe kandi ekaba omu buteeka, kugira ngu okutengyeta kw'omu rugyendo kutaija kuteganisa ebintu ebiri omunda.

Egyo niyo nshonga erikutuma tutarikuteererwaho kimwe akamanyiso; nituregaijana munonga aha bintu. Omukyebezi ku ataahamu, kukyebera amagara gaawe, kureeba yaaba otahamiire kimwe aha bintu, otahamiire kimwe omu magara gaawe g'okushaba, otahamire kimwe aha kiniga ekyo, otahamiire kimwe omu bi orikugamba aha bandi, Tarita kamanyiso aha motoka. Engyesho zimwe ezigubire, ebintu bibi, ebiteekateeko by'ebikaafiire, Tarikubaasa kuta akamanyiso aha motoka egyo.

Kwonka Yaashanga buri kintu omu mwanya gwakyo, Omukyebezi, obwo Naagitaho akamanyiso. Hatagira omuntu weena owaayehanga kwihaho ako kamanyiso okuhitsya obu emotoka egyo eraahikye aha bugarukiro bwayo ahi eteereirwe akamanyiso! Nkikyo aho. “Mutakora aha bu Naashukireho amajuta; n'obu kwakuba okukora kubi baanabi Bangye. Ahakuba Nimbagambira nti, haakiri iwe okubohwa orubengo omu bitsya, kandi okanagwa omu nyanja, okukira nangwa n'okugyezaho kureetera kukora ekibi nari kutengyesaho kakye aha bato aba abateirweho akamanyiso.” Nimureeba eki kirikumanyisa?

Ekyo nikyo Omwoyo Orikwera ari. N'obuhame bwawe. N'oburinzi bwawe. Ni kareebi waawe. N'akamanyiso kaawe. N'akamanyiso kaawe, ngu, “Mpamize kuza omu Iguru. Tindikufayo eki daimoni araagambe! Mpamize kuza omu Iguru. Ahabw'enki? Akantaho akamanyiso. Akakampa. Akantaho akamanyiso omu Bukama Bwe, kandi mpamize kuza omu Kitiinisa! K'emiyaga ehuuhe, ka Sitaane akore eki arikwenda kukora. Ruhanga yaaherize kuntaho akamanyiso okuhitsya aha kiro ky'okucungurirwaho kwangye.” Amiina! Ekyo nikyo Omwoyo Orikwera ari. Oo, oshemereire Kumwetenga. Tinkaabaasize kugumizamu Ntamwine. Bingi bikaabaasize kugambwa aho, kwonka nimpamya nimumanya eki ndikugambaho.

Hati, nabwo, ka tubiikuure Yohaana 14, nk'edakiika. Ninkunda Ekigambo! Nigo Mazima. Hati, Omwoyo wa Ruhanga, Omwoyo Orikwera, Omwoyo Orikwera niki? N'Omwoyo wa Kristo omuriiwe. Hati, tutakashomire, nkaayenzire kugamba ebigambo bikye hanu ebirikushoboorora. Omwoyo Orikwera niki? N'akamanyiso. Omwoyo Orikwera niki? N'endagaano. Omwoyo Orikwera niki? N'akamanyiso. N'ahabw'ekyo Omwoyo Orikwera niki? N'O... Omwoyo wa Yesu Kristo omuriiwe. Mwareeba? “Omwanya mukye,” Yesu akagira ati, “ensi Okutandeeba bundi; kwonka imwe Muryandeeba, aha bw'okuba Ndyaba ndi naimwe, n'omuriimwe, okuhitsya aha muheru gw'ensi.”

Omwoyo wa Ruhanga omu Kanisa Ye! Ahabw'enki? Akakikorera ki? Eki n'ekicweka ky'eishomo ry'ekiro kya nyencakare. Kwonka Ahabw'enki Yaakikozire? Ahabw'enki We, ahabw'enki Omwoyo Orikwera... Niki, n'enki ekyamureetsire? Akaizira ki Omuriiwe, Akaizira ki omuriinye? Kukaba kuri okugumizamu emirimo ya Ruhanga. “Obutoosha Nkora ekyo ekishemeza Tata. Tindaizire kukora okukunda Kwangye, kureka okwa Tata Owantumire. Kandi Tata Owantumire ari Naanye; kandi nk'oku Tata Yantumire, Naanye nikwo ndikubatuma.” Oo, mugyenzi! Ishe Akamutuma, Yaamugyendamu. Ishe owaatumire Yesu akaizira Omuriwe, yaakorera Omuriwe. Yesu ogwo orikukutuma, naagyenda naiwe kandi Ari omuriiwe. Kandi Omwoyo ogwo ku araabe, owaabaire atwire omuri Yesu Kristo Yaamureeteire kukora n'okutwaza oku Yaatweize, noija kugira ekiteekateeko oku Araije kukora yaaba Ari omuriiwe, 'habw'okuba ago Magara tigarikubaasa kuhinduka. Nigaija kuruga omu mubiri gumwe gataahe omu mubiri ogundi, kwonka Tigarikubaasa kuhindura obuhangwa Bwago, ahakuba ni Ruhanga.

-----
Hati twaza kuhinduraho nk'okumara edakiika. Hati twaza kubuuza hati... Akaturagaanisibwa omu biro by'aha muheru! Omutonganizi ogu, akamanyiso, okuragaanisibwa, buri kintu eki Twamugambaho omwabazyo ogu, n'ebindi emirundi omutwaro, Akaturagaanisibwa omu biro by'aha muheru. Bakaba Batamwine omu biro ebyo. Bakaba baine akamanyiso akateirwe omu mibiri yaabo, nk'akabonero n'akamanyiso, nibaikiriza ngu Akaba naija, kandi baagyendera omu kicuucu ky'ebiragiro. Eki, bakaba bashazirwe omu mubiri.

Ebiro ebi titurikugyendera omu kicuucu ky'ebiragiro. Nitugyenda ahabw'amaani g'okuzooka. Nitugyenda ahabw'amaani g'Omwoyo, Niwe kamanyiso kaitu k'amazima, Omutonganizi waitu w'amazima, Omuhuumuza waitu w'amazima, akamanyiso kaitu k'amazima ngu tuzairwe kuruga Ahaiguru; abatari ba buriijo, abantu b'omutaano, nibatwaza omu muringo ogurikushetsya, nibaikiriza eki Ekigambo kya Ruhanga kyagamba, nibeeta ebindi bintu byona kuba ebitahikire. Ekigambo kya Ruhanga kihikire. Ekyo ki... Oo, mugyenzi! Ekyo nikyo Omwoyo Orikwera ari.

-----
Hati, hati nituza kushanga ngu, ku baaherize kwijuzibwa, bakateebwaho akamanyiso kuhitsya ryari? Ni bangahi abari hanu abaine Omwoyo Orikwera? Ka tureebe emikono yaanyu. Abaine Omwoyo Orikwera nibakira abo abatamwine. Nitwenda ngu obe omwe omuriitwe, ow'eishe-emwe, ow'eishe-emwekazi. Ku oraayetegyereze eki Ari, Ni... N'Omwoyo wa Ruhanga otuura omuriiwe, kukora emirimo ya Ruhanga. Ruhanga ku yaabaire atuma Omwoyo We omuri weena omu baheereza Be, weena omuri baanabi Be, weena omu beegyesa Be, weena omu ntumwa Ze, buriijo bakaba bangwa ensi. Bakaba babatwaramu nk'abashazi, omuri buri busingye obwabaireho. Nangwa na Paulo obu yaayemerera omu maisho ga Aguripa, akagira ngu, “Omu muhanda ogurikwetwa obuhabe...” Obuhabe niki? “Obushazi.” “Omu muhanda ogu beeta obushazi, ekibiina ky'abashema, ogwo nigwo muhanda ogu ndamizamu Ruhanga wa Baatatenkuriitwe.” Nshemereirwe munonga nimbaasa kugira nti ndi omwe omuribo. Eego, sebo. Ekyo kihikire. Nshemereirwe munonga nimbaasa kugira nti ndi omwe omuribo.

Hati, Omwoyo Orikwera ogu ku yaabaizireho, Akabahindura abakundwa munonga okuhitsya obu baakwataniise omu bintu byabo byona. Ekyo kihikire? Mugyenzi, mugyenzi, ka n'okukwatanisa! Obumwe tweshongora ekyeshongoro ekyo, “Oo, ka n'okukwatanisa! Oo, ka n'amashemererwa ga Ruhanga!” Nikyo ekyo. Bakaba batarikufayo, bakaba batarikufayo yaaba e-eizooba ryabaire rijwa nari ritajwa. Tibarashabire kujarama. “Hati, ninza kutunga Omwoyo Orikwera,” nikwo abantu bamwe bangambira, “Omw. Branham, ku orampamize ngu niinyija kuba miriyoniya, ku orampamize ngu niinyija kubona amaziba g'amajuta, kandi ku ndaabe niinyija kubona ebinombe by'ezaabu, kandi ndya-ndya...” Mwareeba, abantu ebyo babyegyesa, haza beegyesa ekishuba. Ruhanga tararagaaniise ebintu ebyo.

Omuntu otungire Omwoyo Orikwera tafayo yaaba ashabiriza eby'okurya, nari ngaaha. Tikirikureetaho ntaaniso yoona ahariwe. N'ekihangirwe ekyorekyereire Eiguru. Tariku... Taine ebimukomeire hanu, na kakye. Ekyo kihikire. Tarikufayo. N'obu haakubaho ki, kyona ekiraabeho. Ka bamukyeme, bamushungise. Waafeerwa ekitiinisa kyawe, noofayo ki? Ori omu rugyendo rwawe nooza omu Kitiinisa! Haleluya! Amaisho gaawe ogahangire Kristo, kandi ori omu rugyendo rwawe. Torikufayo eki ensi eraagambe. Ekyo nikyo Omwoyo Orikwera ari. N'Amaani, N'akamanyiso, N'Omuhuumuza, N'Omutonganirizi, N'akamanyiso. Oo, mugyenzi! Niwe buhame ku Ruhanga akwakiriire.

Naamara obwire oburikwingana ki? Nyineyo edakiika munaana ezindi. Ni kirungi. Reka... Nyine hanu Ebyahandiikirwe bingi munonga. Tindikuteekateeka ngu nimbaasa kubitaasyamu, kwonka nitwija-nitwija kugyezaho nk'oku turikubaasa. Hati, omuntu ku aheza kwijura Omwoyo Orikwera, nikibaasika ngu okuhiigwa n'ebindi bikaamureetera kugaruka enyima kandi... Hati, tarikuza kubura, akiri omwana wa Ruhanga, aryaguma ariwe obutoosha, ahabw'okuba otairweho akamanyiso kuhitsya ryari? [Abateeraine baagira bati, “Kuhitsya aha kiro ky'okucungurirwaho.” -Omur.] Ekyo kihikire. Ekyo nikyo Baiburi yaagambire.

Read the full account in... Omwoyo Orikwera Niki?.

Naanye ndyashaba Tata, nawe aryabaha Omuhwezi ondiijo, agume naimwe obutwire bwona.

Omuhwezi ogwo n'Omwoyo ow'amazima, ou ensi etarikubaasa kwakiira, ahakuba temureeba n'obu kwakuba okumumanya; kwonka imwe mumumanya; ahakuba aguma naimwe, kandi aryatuura omuriimwe.

Tindibatsiga muri efuuzi; ndyaija ahi muri.

Yohaana 14:16-18