Pearry Green.

Luka 21:25-27,
25 Bimanyinu nebikale mu diba ne mu ngondo ne mu mitoto; ha buloba nehikale dikenga dikole dia bantu, nebatshine tshiona tshinene tshia mai manene ne tshia mavuala;
26 bantu nebafue tshihuka bua buowa ne bua ditekemena dia malu alua ha buloba; bualu bua nebanyukule makole a mu diulu.
27 Hashishe nebamone Muana wa muntu ulua mu ditutu ne bukole ne butumbi bunene.

Mvese eyi ya mu mvese mmibala kukadi bidimu nkama ne nkama. Misangu yonso mu meji a bantu, dimueneka dia matutu ne dimueneka dia Yesu Kilisto bidi bipetangana. Nansha bamanyi ba malu a Nzambi badi bitabuja dipingana dia Mukelenge pa buloba, bua kuangata mukajende, mbafike ku dienza malanda aa mu lungenyi luabu. Kadi bena teoloji aba badi mua kupanga dilua diende dibidi bualu, nansha mudibu babapeshe “mêsu a kumona ne matshi a kumvua” nebabenge bua kuenza nawu mudimu bua kujingulula malu adi Nzambi mulaye mu dîyi diende, tshivua ne bua kudianjila kumpala kua dilua dibidi dia Kilisto.

Matayo 24, udi ubanga ku mvese wa 23 udi kabidi bumanyishi bua matuku aa kumpala kua dilua dia Kilisto:

23 Bianuambila muntu ne, Kilisto udi aha, anyi, haha; kanumuitabushi.
24 Bualu bua ba-Kilisto ba mashimi nebalue, ne baprofete ba mashimi, nebaleshe bantu bimanyinu binene ne malu a kukema bualu bua kuhambuisha badi basungula kadi Nzambi mene mene; biamanyabo mua kuenza nunku.

(Mona ne: Yezu kavua muambe ne: “ba Yezu ba dishima” to, kadi wakamba ne: “bela manyi” ba dishima, aba badi ne diela manyi dilelela, kadi badi bakula malu adi kaayi malelela, mêyi a dishima.)

Yezu uvua udimuija bua dishima divua ne bua kuenzeka mu dilua dibidi, kadi wakalaya ne: basungula kabavua mua kushima to, bavua mêna abu mafunda mu mukanda wa muoyo wa muana wa mukoko katshia ku tshibangidilu tshia buloba, ne badi badianjile kulongolola bua kuikala bafuanangane ne tshifuanyikiji tshia Yezu Kristo. Lomo 8:30, “Bakadianjileye kusungula, yeye wakababikila kabidi; ne bakabikileye, yeye wakababingisha kabidi; ne bakabingisheye, yeye wakabatumbisha kabidi.” Yezu udi wamba ne: nekujuke bantu badi bantu mua kuamba bualu buabu ne: “Mona muntu umue muela manyi! Mona muntu udi ne Dîyi!” Mu Matayo 24:25 udi utungunuka wamba ne:

25 Unvuai! nakunuambila diambedi.
26 Bianuambilabo ne, Yeye udi mu tshihela, kanuyi; anyi ne, Yeye udi mu tusubu tua tshisokomenu, kanuitabushi.

Munkatshi mua bitendelelu bia lelu mudi bantu badi basue kuitaba ditabuja dia tshitendelelu, anyi dilongesha, pamutu pa Dîyi. Badi bakumbaja mêyi a mu Mukanda wa Nzambi eu, bualu badi bamba ne: “Monayi Dîyi edi; apa ke padi diela dia manyi. Tuetu bena tshipangu, balombodi badisangisha mu musokoko, bakeba Mukelenge. Mpindieu tudi tulua ne tunuambila ne: eu ke dîyi.” Badi bakeba dibuluibua dia pa nkaya ne badi badienzeja ku bukole kudi bayidi babu. Vuluka ne, yeye ke Dîyi. “Ku tshibangidilu Dî diakadiku, Dî diakadi ne Nzambi, Dî diakadi Nzambi... Dî diakakudimuka muntu, diakuikala munkatshi muetu tshituha...”

Kakuyi dibuluibua badi bumvuija mvese, bu mudi Matayo 24:27,

27 Bu muele wa nvula udi uhenya ku esete, ne udi umueneka ku wesete; kulua kua Muana wa muntu nekuikale nunku.

Ku diambuluisha dia mvese eu, badi batekemena ne: Yezu Kristo neapite mu diulu, wela mbila bua dipingana diende bua kuangata mukajende. Bantu badi balongesha bualu ebu badi bapua muoyo mvese udiye wamba patoke ne: dipingana diende nedikale “bu muivi wa butuku.”

Tangila tshididi; uvua umbuka ku est uya ku ouest. Tangila buena kilisto, buvua bufumina ku est too ne ku ouest. Tangila munya; didi dijuka ku est ne dipueka ku ouest. Nzambi ke uvua mutuadije mukenji wa mutumibue yonso ku tshikondo tshionso tshia ekeleziya ku est ne mutumibue wa ndekelu wakamueneka ku ouest, kukumbaja malu masokoka a Nzambi, bu mudibi bimanyishibue mu Buakabuluibua 10:7. Nunku bikala malu a pa mutu pa buloba mua kumueneka kudi bantu badi ne muoyo mu matuku a ku nshikidilu kumpala kua dilua dia Mukelenge, malu aa avua mua kuenzeka ku ouest. Bualu bua “bu mudi mupenyi ufuma ku est,…ku ouest,” ke mudi Yesu Kilisto mudisokolole ku est too ne ku ouest ku butuangaji bua batumibue muanda mutekete aba. Bu muvua muntu ne muntu ulua ne mukenji wende, ke muvua dibuluibua dienda dienda, dienda divula ne muntu ne muntu: Luther wakalua ne dibingisha; Wesley, dijidila, bena pentekoste, dikuluka dia Nyuma Muimpe ku ntuadijilu kua tshikondo etshi tshia Laodikiya; ne mpindieu ku dikumbana dia mukenji eu kudi mukaji udibu basela muaba udibu bambe malu masokoka aa kudi mutumibue eu ne bitampi mbibulula mene.

Matayo 24:28,
28 Bikololo bitu biadisangisha hadi tshintu tshibole.

Ke bualu kayi banjelu bende nebasangishe nyunyi ya mikanku, badi ne muoyo mu tshikondo etshi, tshikondo tshia mikanku. Nyunyi udi udia munyinyi mupiamupia, ki mbua “usama” adi ne bua kuwuja “mêsa” onso a bitendelelu (Yeshaya 28:8), kadi mbua munyinyi mupiamupia wa Dîyi. Ke muaba wikala nyunyi ya mikanku idisangisha. Bu mudi dî edi dipatuka, ke mudi bantu badisangisha badi badiitabuja, bu mudi Nzambi ubabikila.

Matayo 24:29-30,
29 Hashika dikenga dia matuku au, diba nedifikuluke, ngondo kena ukenka, mitoto neituke mûlu, neihone, nebanyukule bukole buakadi buendesha bintu ebi mu diulu; 30 hashishe, tshimanyinu tshia Muana wa muntu netshimueneke mu diulu; bisamba bionso bia ha buloba nebidile, nebimone Muana wa muntu ulua ha matutu a mu diulu ne bukole buandi ne butumbi buandi bunene.

Muaku mukuabu udi wakula bua dilua dia muana wa muntu, mu Danyele 7:13,

13 Nakatangila mu bikena kumona butuku kabidi, ekumona, mukuabo mufuane muana wa muntu ulua mu matutu a mu diulu,...

Danyele mu tshipungidi tshia kale udi mene ujadika dilua dia muana wa muntu bu udi mulamakaja ne matutu. Bia muomumue Yezu, misangu yonso ivuaye wakula bua dilua diandi dibidi, uvua wakula bua matutu.

Mu Arizona, ke mudi tshibambalu tshia malu a bungenda tshimanyisha, misangu 85 pa lukama, kakuena matutu mu diulu to. Ino mu dia matuku 28 ngondo muibidi 1963, ditutu dia pa buadi diakamueneka mu diulu dia Arizona divuabu baleje ne foto, mu tshiena bualu tshifunda kudi Dr James McDonald, mulongeshi wa malu a mu lupepele mu iniversite wa Arizona mu ‘Science Magazine’, mu dia matuku 19 ngondo muinayi 1963. Bantu bavua balomba bua kutuma foto anyi malu makuabu avua mua kufila butoke pa ntuadijilu wa ditutu edi.

Bua tshinyi dilonga edi didi ditangila ditutu dimue? Anu bua bunene ne bule buende bua dikema, bibala ku diambuluisha dia trigonometrie ku diambuluisha dia foto 80, bu mudibi ne mu butumbuke kilometre 42, bule bua kilometre 80 ne butshiama bua kilometre 30. Bintu bivuabu bamone bivua bifumina ku kilometre 175 mu luseke lumue ne bia bungi mu nseke mikuabu bifumina ku bule bua kilometre mipite pa 80. Tshimuenekelu tshilenga tshia ditutu edi tshiakashala tshikenkesha kudi butoke bua dîba minite 28 panyima pa dibuela dia dîba. Pa mutu pa lupepele (mu tshibuashibuashi), pa mutu pa mikalu ya ndeke, pa mutu pa muaba udi mâyi mua kuenza ditutu ne kudisangisha, ne kakuyi mushindu wa kuikala mufumine ku tshiamu tshia mvita bua bungi bua mayi avuaye ne bua kuikala nawu, ditutu dinene didi dishala bualu budi kabuyi bumanyike kudi bena sianse.

Bafundi ba tshibejibeji tshia ‘Muoyo’ bakapeta tshiena bualu etshi mu ‘Science’, ne mu dia matuku 17 ngondo muitanu 1963, bakapatula tshimfuanyi tshia ditutu ne mêyi aa, “Ditutu didi muulu bikole, ne dinene menemene bua kuikala bulelela, kadi nansha nanku, mona foto wadi!” Ngakalonga bualu bua ditutu bua musangu wa kumpala mu tshibejibeji etshi tshia ‘Muoyo’.

Pandi ntangila panyima, ndi mmona ne: tshiena-bualu atshi tshivua tshisankisha, kadi tshivua mutshipeshe mushinga wa pa buawu to. Ndi muena mudimu wa lumu luimpe mujima, muwule tente ne Nyuma Muimpe, ndi ngitabuja ne ndi tshitupa tshia mukaji wa Kilisto, kadi tshikondo atshi tshivua ne nyuma mukumbane bua kujingulula ne: Yezu Kristo uvua muambe ne: dipingana diende nedikale dilondangana ne matutu to. Ndipuekesha dia bungi, pandi ngela meji, bua kumanya ne tshivua muele ditutu diumvuija dia pa buadi to, tshidi katshiyi mua kumvuija ku tshilelelu kudi malu a sianse. Kabivua too ne mu 1964 pangakumvua bulelela bua malu manene avua menzeke pavua ditutu edi dimueneka pa mutu pa Arizona to.

Mu dia matuku 22 ngondo wa dikumi ne muibidi 1962, ngondo ibidi mijima kumpala kua ditutu kumueneka, muanetu Branham wakapeta tshikena kumona pavuaye musombe mu biro biende mu Jeffersonville, Indiana. Tshivua tshimue tshia ku bikena kumona binunu ne binunu bivuaye mumone patshivuaye ne muoyo. Mu dia matuku 31 ngondo wa dikumi ne muibidi tshidimu tshia 1962, wakalondela tshikena kumona etshi kudi tshisumbu tshienda mu Tabernakle Branham, mu Jeffersonville. Mêyi ende avua mumvue kudi bantu batue ku nkama isambombo bavuaku butuku abu ne avua mafunda pa kasete pavuaye wenza muyuki wende uvua ne tshiena-bualu tshia ne: “Etshi ntshikondo tshia ku nshikidilu anyi, Bamfumu.?”

Walondela muvuaye mu tshikena kumona tshivuaye ku luseke lua mukuna, umbusha lutete [cocklebur] lua tshisuku ku dikasa dia pantalon, pavuaye mu tshimpitshimpi mutekeshibue kudi dibutuka dikole, pashishe bakamutangila kudi banjelu muanda mutekete. Wakitaba kudi tshisumbu ne kavua mumanye diumvuija dia tshikena kumona etshi to. Tshikena kumona atshi tshiakamutonda bikole, ne mu mbingu yakalonda wakambila bakuabu ne: pamuapa tshivua Nzambi mulongolole mu nsombelu wende tshivua tshikumbane ne bavua ne bua kumushipa mu dibutuka. Uvua udiebeja bikala banjelu aba ne bua kuambula tshitalu tshiende bu muvuabu benzele Mose.

Matuku makese kunyima kua dimona dia tshikena kumona etshi, wakaya ne dîku diende ku Tucson, mu Arizona ne kusombelamu. Wakayisha ndambu wa miyuki ne kutuadijaye kuikala mu nsombelu wa mu tshipela, kadi tshikena kumona etshi tshivua anu tshimutonda. Tshikondo tshiende tshivua ne bua kujika anyi? Nebikale dîba kayi?

Bilondeshile bumuntu buende bu muntu wa pambelu ne mulobi, wakadimona munange manaya a muaba au, diloba dia ngulube wa mu tshipela uvuabu babikila ne: Javelina. Mu tshikondo tshia luendu lua nunku lua diloba ke muvua tshikena kumona tshivua tshibungamija tshikumbane.

Dituku divua dia matuku 7 ngondo muisatu tshidimu tshia 1963. Divua mu dinda ne muanetu Branham uvua mupatuke mu tshitudilu bua kuambuluisha bana babu ne bena mudimu nende, bana betu ba balume Fred Sothmann ne Eugene Norman, bua kupeta Javelina uvua kayi mua kupeta. Anu bu pa tshibidilu uvua mumane kupeta diakalengele mu diloba dia nyama wende. Wakabanda ku tshibandabanda, yeye mumane kuambila bakuabu njila uvuabu ne bua kulonda bua kusambakena ne tshisumbu tshia ngulube tshivuaye mumone kumpala ne uvua ne bua kubapuekesha ku bukole kudibu. Pavuaye muikishe pa mutu pa tshibandabanda bua tshitupa tshîpi, wakamona ne: kuvua ntete [cocklebur] ku dikasa diende dia pantalo. Matuku makese kunyima kua yeye mumane kuela tshianza panshi bua kutshiumusha, tshintu tshivua tshituta tshiakakuata mukuna ne bu muvua buloba buenda buteketa muinshi muende, wakatuta muulu, kayi mumanye tshivua tshienzeke anyi tshivuaye mua kutekemena pashishe.

Mu diulu pa mutu pende, muvua tutotshi tukese muanda mutekete tumueneka, bu ndeke. Katupa kakese pashishe, tutotshi etu tuakamueneka kumpala kuende - piramide wa banjelu ne muanjelu wa bukole ku mutu ne banjelu bakese basatu kuinshi ku luseke luonso. Anu bu muvua Paulo muambe ne: uvua mubandishibue mu diulu disatu, ke muvua muanetu Branham muambe ne: uvua “muangatshibue” munkatshi mua tshisumbu tshia mitoto tshia banjelu etshi. Dîba adi ke divuabu bamupeshe mudimu wa ne: “Pingana ku est kuuvua mufume ne ku diambuluisha dia dibuluibua ne tshikena kumona, Nzambi neabulule bitampi muanda mutekete idi mishikibue mu bualu busokoka katshia Yone mubuludiki wayifunda mu mukanda wa Buakabuluibua!”

Bana betu bavua nende bavua bamanye tshikena kumona atshi ne bavua bamone muvua mukuna unyunguluka, kadi, bilondeshile dimanya dianyi, kabavua bamanye ne: banjelu bavuaku to. Muanetu Branham wakabambila dîba adi bua kubenga kuambila muntu nansha umue malu avuabu bamone ne bumvue. Kumbuka mu Tucson mu dia matuku 13 ngondo muisatu 1963, wakapingana ku Jeffersonville. Kubangila mu dia matuku 17 too ne mu dia matuku 24 ngondo muisatu, wakatuadija miyuki ya pa buayi ne ya butoke ivua kayiyi mimanyike mu ekeleziya.

Kuangata tshitampi tshimue butuku buonso, yeye, ku dibuluibua dia buludiludi ne ku dikankamija dia Nyuma Muimpe dituku dionso, wakayisha malu masokoka a Nzambi avua Nzambi mulaye Danyele ne: kaavua mua kubuluibua too ne ku tshikondo tshia ku nshikidilu. Tshikondo atshi ke tshivuabu bambe mu mifundu minsantu, tshikondo tshia ku nshikidilu, ne Nzambi wakakula ku butuangaji bua muprofete wende bu muvuaye wenza misangu yonso; kadi musangu eu Dî diakalua mu mushindu wa dibuluibua wakadi kayi muanji kuambibua muntu. Bavua baleje mukaji uvuabu basela ne: bintu bia bungi bivuabu bakeba bivua bimane kupita. Dîba divua dikumbane bua mukaji uvuabu basela “kudilongolola.”

Wewe mukonkonone tshimfuanyi tshia ditutu didi dikemesha malu a sianse udi mua kumona mpala wa Mukelenge Yezu Kristo munda muadi, mutangile ku est, ne nsuki bu miosa ya mikoko, anu muvua Yone Mubuluidi mumumone. Kavua mumueneke bu nsongalume bu muakadiye pakamukudikaye ku mutshi mutshiamakane ne bidimu makumi asatu ne bitatu to, kadi bu yeye udi mulumbuluishi wa ba pa buloba. Bualu ebu budi mua kuikala bukole kudi bamue bantu bua kubupeta, kadi kabienaku biamba mu mifundu miaba ya bungi ne, padi muana wa muntu umueneka, nekuikale matutu anyi?

-----
Ndi ngambila bantu ba tshikondo etshi ne: mifundu idi ilaya ne: nekuikale ditutu didi dilamakaja ne dimueneka dia muana wa muntu pa buloba ebu. Mpindieu ndi nnutuadila lumu lua dikema lua se: kudi ditutu dia mushindu eu mu bidimu bia 20 ebi - ditutu didi kadiyi mua kumvuija kudi malu a sianse. Bu biobi mua kumvuija ku diambuluisha dia mikenji ya sianse, tshivua mua kuitaba tshindi ngenza bua bualu ebu to, kadi kakuena diumvuija nansha dimue.

Ndi muambila kudi muntu undi ngitabuja ne udi muprofete wa Nzambi bua tshikondo etshi, Muanetu William Branham, ne: banjelu muanda mutekete bakalua kudiye ne bakasokolola malu masokoka a mu mukanda wa Buakabuluibua, bakamukuata munkatshi muabu; ne bakenza ditutu edi. Tshiena ne bualu bua kuelakana bua diumvuija edi to. Ditutu divua dinene bikole, dipite bule, ne divua ne bua kuikala ne mâyi a bungi be kuikala mulelela; kadi bualu bulelela budi bushala - bivua bia bushuwa. Bivua bia pa mutu pa buloba ne Nzambi wakabituma bu tshimanyinu kudi mukaji uvuabu basela.

Dikudimuna dia kudi...
Acts of the Prophet. - Pearry Green

Kuangata (Anglais):   "Is this the sign of the end Sir"

Bala muyuki mu (PDF Anglais)... The Cloud. - Pearry Green.

Monai, nennutumine Eliya muprofete diambedi dituku dia Yehowa kadiyi dianji kulua, dituku adi dinene ne didi dikuatshisha bantu buowa.

Yeye neakudimune mitshima ya batatu bua ihingane kudi bana babo, neakudimune mitshima ya bana bua ihangane kudi batatu babo; bua meme tshilu kubutula buloba ku mulau.

Malaki 4:5-6

Diambuibwa.

(PDF Anglais)

The Indictment

My Life Story (W.Branham)

How the Angel came to me

Anointed ones at the end time

Beyond the Curtain of Time