Klaut bilong heven.
Klaut bilong heven.
Pearry Green.Luk 21:25-27,
25 Jisas i tok moa olsem, “Long dispela taim ol kain kain mak bai i kamap long san na long mun na long ol sta. Na long graun tingting bilong olgeta lain man bai i bagarap tru na ol bai i harim pairap bilong bikpela si i bruk bruk long solwara, na ol bai i tingting planti na pret moa yet.
26 Planti manmeri bai i tingting long ol samting i laik kamap long graun, na ol bai i pret tru na ai bilong ol bai i raun, long wanem, ol strongpela samting bilong skai bai i guria.
27 Na long dispela taim ol manmeri bai i lukim Pikinini Bilong Man i stap long wanpela klaut na i kam wantaim bikpela strong na bikpela lait bilong en.Ol i bin ritim ol dispela ves bilong skripsa inap planti handet yia. Oltaim long tingting bilong ol man, lukluk bilong ol klaut na kamap bilong Jisas Krais i bin konektim. Maski ol saveman bilong lotu husat i bilip long Bikpela bai kam bek long graun, long kisim meri bilong em, ol i bin kamapim dispela koneksen long tingting bilong ol. Tasol ol dispela wankain saveman bilong lotu i ken lusim namba tu kam bilong em bikos, maski ol i kisim "ai bilong lukim na yau bilong harim" ol bai no laik yusim ol dispela long painim ol dispela samting we God i bin promisim long tok bilong em, bai kamap pastaim long namba tu taim Krais i kam bek.
Matyu 24, stat long namba 23 ves em i wanpela witnes tu bilong ol dispela de pastaim long Krais i kam bek:
Matyu 24:23-24,
23 “Long dispela taim, sapos wanpela man i tokim yupela, ‘Lukim, man God i makim bilong kisim bek ol manmeri bilong en, em i stap hia,’ o ‘Em i stap long hap,’ yupela i no ken bilip long tok bilong ol.
24 Long wanem, sampela man bai i kam na tok giaman olsem, ‘Mi dispela man God i makim bilong kisim bek ol manmeri bilong en,’ o ‘Mi wanpela profet.’ Na bai ol i wokim ol bikpela mirakel na mekim ol narakain narakain samting i kamap. Ol i laik paulim olgeta manmeri, na sapos ol inap ol i laik paulim tu ol manmeri God i makim bilong em yet.(Lukim olsem Jisas i no tok “ol giaman Jisas” tasol em i tok ol giaman “ol manmeri God i bin makim,” ol lain husat i gat trupela anointing, tasol ol i save toktok long ol samting i no tru, ol giaman maus.)
Jisas i tok lukaut long pasin giaman long taim bilong namba tu taim em i kam bek, tasol em i tok promis olsem ol manmeri God i makim bai i no inap kisim giaman, nem bilong ol i bin stap long buk bilong laip bilong pikinini sipsip long taim graun i no kamap yet, na ol i bin makim pinis long kamap wankain olsem piksa bilong Jisas Krais. Jisas i tok olsem bai i gat ol lain we ol manmeri bai tok long ol olsem “Dispela em i wanpela man God i bin makim! Em hia wanpela husat i gat Tok!”
Insait long Matyu 24:25 em i tok moa olsem:
25 “Harim. Mi tokim yupela pinis long dispela ol samting bai i kamap.
26 Olsem na sapos ol i tokim yupela, ‘Lukim, em i stap long hap i no gat man,’ orait yupela i no ken i go long dispela hap. Na sapos ol i tok, ‘Lukim, em i stap insait long dispela haus,’ orait yupela i no ken bilip long tok bilong ol.Namel long ol lotu tude i gat ol lain husat i laik bilipim wanpela bilip, doktrin, o doktrin bilong wanpela lotu na i no long Tok. Ol i inapim dispela tok bilong Baibel, long wanem, ol i tok, “Dispela em i tok, hia em i anointing. Mipela ol memba bilong kaunsil, ol lida i bin bung long ples hait, na painim Bikpela. Nau mipela i kam na tokim yu olsem dispela em i Tok.” Ol i save painim praivet revelesen na fosim long ol lain i bihainim ol. Tingim, Em i Tok, “Bipo bipo tru, taim olgeta samting i no kamap yet, Tok i stap. Tok i stap wantaim God na Tok em yet i God...
Sapos ol i no kisim revelesen, ol i tanim tok bilong skripsa, olsem Matyu 24:27,
27 Yupela i save, taim klaut i lait, dispela lait i save kamap long hap bilong sankamap na i lait i go olgeta long hap bilong san i go daun. Orait Pikinini Bilong Man bai i mekim olsem tasol long taim em i kamap, na olgeta manmeri bai i lukim.
Long dispela skripsa, ol i ting Jisas Krais bai flai antap long skai, singaut long kam bek bilong em long kisim meri bilong em. Ol lain husat i skulim dispela i save lusim tingting long skripsa we em i tok klia olsem em bai kam bek olsem “ol stilman i kam bek long nait.”
Lukim sivilisesen; em i bin raun long hap is i go long hap wes. Lukim lotu Kristen, em i bin raun long hap is i go long hap wes. Lukim san; em i save go antap long hap is na i go daun long hap wes. God i bin statim tok bilong olgeta wan wan man bilong bringim tok i go long olgeta taim bilong sios long hap is na laspela man bilong bringim tok i kamap long hap wes, bringim ol tok hait bilong God i kamap tru, olsem Revelesen 10:7 i bin tok profet long en. Olsem na sapos ol samting we i no bilong man i kamap long ol manmeri i stap long las de pastaim long Bikpela i kam, ol dispela samting bai kamap long hap wes. Long wanem, “olsem laitning i save kam long hap is,...i go long hap wes,” olsem tasol Jisas Krais i bin soim em yet long hap is i go long hap wes long rot bilong ol dispela 7-pela man bilong bringim tok. Taim olgeta wan wan i bringim toksave bilong ol i kam, revelesen i go het, na i go bikpela wantaim olgeta wan wan: Luther husat i bringim fogivnes; Wesley, pasin bilong kamap holi, ol pentekostal, pundaun bilong Holi Spirit long stat bilong dispela taim bilong Laodisia; na nau long pinisim dispela toksave i go long meri bilong Krais we dispela tok hait i bin kamap long dispela man bilong bringim tok na ol i bin opim ol sil tu.
Matyu 24:28,
28 “Long ples bodi bilong ol man i dai pinis i slip i stap long en, long dispela ples tasol ol tarangau i save kam bung.”Olsem na ol ensel bilong em bai bungim ol tarangau, ol lain i stap long dispela taim, taim bilong ol tarangau. Ol tarangau i save kaikai fres mit, i no “traut” we bai pulapim olgeta “tebol” bilong ol sios (Aisaia 28:8), tasol ol i save kaikai long fres mit bilong Tok. Em ples we ol tarangau bai bung. Taim dispela tok i kamap, olsem na ol manmeri i save bungim ol manmeri husat i bilipim dispela, taim God i singautim ol.
Matyu 24:29-30,
29 Jisas i tok moa olsem, “Taim bilong ol dispela bikpela hevi i pinis, orait kwiktaim san bai i kamap tudak, na mun bai i no moa lait, na ol sta bai i lusim skai na pundaun, na ol strongpela samting i stap long skai bai i guria.
30 Long dispela taim mak bilong Pikinini Bilong Man bai i kamap long skai na olgeta lain manmeri bilong graun bai i krai. Na ol bai i lukim Pikinini Bilong Man i stap antap long ol klaut bilong heven na i kam wantaim bikpela strong na bikpelaNarapela tok long kam bilong pikinini bilong man, long Daniel 7:13,
13 Long dispela driman bilong mi long nait, mi lukim wanpela man i wankain olsem yumi man bilong graun. Em i stap namel long ol klaut na i wokabaut i kam klostu long mi. Na ol i kisim em i go long dispela Man bilong bipo bipo yet.
Daniel insait long olpela testamen i tok klia long kam bilong pikinini man bilong man olsem em i bin pas wantaim ol klaut. Olsem tasol Jisas, olgeta taim em i toktok long namba tu kam bilong em, em i toktok long ol klaut.
Long Arizona, olsem ‘chamber of commerce’ i tokaut olsem, 85 pesen bilong taim, i no gat klaut long skai. Tasol long Februeri 28, 1963, wanpela narakain klaut i kamap long skai bilong Arisona. Dispela i bin kamap insait long wanpela atikol, wantaim wanpela poto, we Dokta James McDonald, profesa bilong atmospheric physics long yunivesiti bilong Arizona i bin raitim insait long Saiens magasin, Epril 19, 1963. Ol i askim ol manmeri long salim ol poto o ol narapela infomesen we i stap we inap long givim lait long as bilong dispela klaut.
Bilong wanem ol i gat laik long wanpela klaut tasol? Bikos em i bikpela na altitude. Ol i bin skelim long rot bilong ‘trigonometry’ long 80-pela poto, olsem em i 26 mail antap, 50 mail longpela na 30 mail bikpela. Ol samting ol i lukim i kam long tu handet na eiti mail long wanpela sait na planti long ol narapela sait long moa long wan handet mail longwe. Gutpela lukluk bilong dispela klaut i stap yet long lait bilong san 28 minit bihain long san i go daun. Antap long win, antap long siling bilong balus, winim hap we wara i ken kamap na kondensim, na i no inap long em i kam long wanpela roket bikos em i gat bikpela wara tru, bikpela klaut i stap yet olsem wanpela tok hait bilong saiens.
Ol edita bilong ‘Laip’ magasin i painim dispela atikol long Science, na long Me 17, 1963, ol i pablisim wanpela piksa bilong klaut wantaim ol dispela toktok, “Wanpela klaut we i antap tumas, na bikpela tumas long kamap tru, tasol yet, hia em i wanpela poto bilong en!” Mi lainim long klaut long namba wan taim long dispela nius Laip. Taim mi tingim bek, mi luksave olsem dispela atikol i bin gutpela, tasol mi no bin givim bikpela mining long en. Mi wanpela ful gospel minista, i pulap long Holi Spirit, mi bilip olsem mi wanpela memba bilong meri bilong Krais, tasol mi no bin gat inap spirit long luksave olsem Jisas Krais i bin tok olsem taim em i kam bek bai i gat ol klaut. Taim yumi tingim bek, em i mekim yumi i stap daun tru long luksave olsem mi no bin putim bikpela mining long dispela klaut we saiens i no inap long eksplenim long en. I no inap long 1964 we mi harim tok tru bilong ol bikpela samting i bin kamap taim dispela klaut i kamap antap long Arizona.
Long Disemba 22, 1962, tupela mun olgeta pastaim long klaut i kamap, Brata Branham i kisim wanpela visen taim em i sindaun long opis bilong em long Jefesonvil, Indiana. Em i wanpela bilong planti tausen visen we em i bin kisim long laip bilong em. Long Disemba 31, 1962, em i stori long dispela visen i go long kongrigesen bilong em insait long Branham Tabenakel, long Jefesonvil. Klostu 600 manmeri i bin harim ol toktok bilong em long dispela nait na ol i bin rekodim long tep taim em i bringim tok bilong em we i gat het tok olsem “Ol bikman, em i taim nau?” Em i stori long olsem wanem long visen em i stap long sait bilong wanpela maunten, na em i rausim wanpela ‘cocklebur’ long lek bilong trausis, taim wantu em i kirap nogut long wanpela bikpela pairap, na bihain 7-pela ensel i kam lukim em. Em i tokaut long kongrigesen olsem em i no save long mining bilong dispela visen. Dispela visen i givim bikpela hevi long em, na long ol wik bihain em i tokim ol narapela olsem ating as tingting bilong God long laip bilong em i bin kamap tru na ating em bai dai long wanpela pairap. Em i tingting olsem ol dispela ensel bai karim bodi bilong em i go olsem ol i bin mekim long Moses.
Bihain liklik long dispela ekspiriens bilong visen, em i go sindaun wantaim famili bilong em long Tucson, Arizona na sindaun long en. Em i autim wanpela tok, na em i stat long stap insait long dispela ples wesan nating, tasol dispela visen i wok long bagarapim em yet. Taim bilong em bai pinis klostu? Wanem taim bai em i kamap?
Tru long pasin bilong em olsem wanpela man bilong ausait na painim abus, em i painim em yet i amamas long wanpela feveret spot bilong dispela eria, em painim abus bilong wel bus ol i kolim Javelina. Em long taim bilong dispela kain raun bilong painim abus we dispela visen we i givim hevi i kamap tru.
Deit em i Mas 7, 1963. Em i moning na Brata Branham i bin lusim kem na i go helpim ol brata na ol wanwok bilong em long painim abus, Brata Fred Sothmann na Eugene Norman, long painim Javelina. Olsem oltaim em i bin winim pinis wok bilong painim animal bilong em. Em i go antap long wanpela liklik maunten, na em i soim ol narapela long rot ol i mas bihainim bilong bungim wanpela lain buai. Em i bin lukim ol dispela buai bipo na em bai fosim ol i kam daun long ol. Em i malolo antap long liklik maunten, na em i lukim olsem i gat wanpela ‘cocklebur’ i stap long lek bilong trausis bilong em. Bihain liklik long em i putim han bilong em long rausim, wanpela pairap i seksekim maunten na graun i guria aninit long em, em i kalap i go antap, na em i no save wanem samting i bin kamap o wanem samting bai kamap bihain.
Long skai antap long em, i gat 7-pela liklik dot i kamap, olsem balus. I no winim wanpela wink bihain ol dispela dot i kamap long ai bilong em - wanpela piramid bilong ol ensel wantaim wanpela strongpela ensel antap na tripela liklik ensel i stap daunbilo long tupela sait. Olsem Pol i bin tok olsem ol i bin kisim em i go antap long namba tri heven, olsem tasol Brata Branham i stori olsem em i bin “go antap” namel long dispela lain ensel. Long dispela taim em i kisim wok olsem: “Yu go bek long hap is long hap yu bin kam long en na long rot bilong revelesen na visen, God bai opim 7-pela mak we ol i bin pasim long wanpela tok hait stat long taim Jon, man bilong tokaut long ol samting i bin kamap, i bin raitim ol long buk bilong Revelesen!”
Ol brata wantaim em i save long dispela visen na ol i bin lukim maunten i guria, tasol, long save bilong mi, ol i no save olsem ol ensel i stap. Brata Branham i tokim ol long dispela taim long noken tokim wanpela man long wanem samting ol i bin lukim na harim. Taim em i lusim Tucson long Mas 13, 1963, em i go bek long Jefesonvil. Stat long namba 17 de i go inap long namba 24 de bilong mun Mas, em i bin statim ol gutpela tok tru we ol i bin mekim insait long sios.
Em i autim tok long wanpela sil long olgeta nait, na long rot bilong Holi Spirit i tokaut stret na kirapim em long autim tok long ol tok hait bilong God, God i bin tok promis long Daniel olsem em bai i no inap kamap ples klia inap long taim bilong las de. Dispela em i dispela taim we ol skripsa i tok long en, taim bilong pinis, na God i bin toktok long profet bilong em olsem em i bin mekim oltaim, tasol dispela taim toktok i kamap long wanpela rot bilong revelesen we i no bin kamap long man bipo. Ol i soim meri olsem planti samting we ol i wok long painim i bin kamap pinis. Em i taim pinis bilong meri i laik marit long “redi.”
Sapos yu glasim poto bilong dispela narakain klaut yu ken lukim pes bilong Bikpela Jisas Krais insait long en. Em i lukluk na lukluk i go long hap is, na gras bilong em i olsem wul, olsem Jon bilong Revelator i bin lukim em. Em i no kamap olsem wanpela yangpela man olsem taim em i bin hangamap long diwai kros taim em i gat 33 krismas, tasol em i kamap olsem man husat i jas bilong wol. Ating em i hat long sampela manmeri long kisim, tasol em i no tok insait long ol skripsa long planti hap olsem taim pikinini man bilong man i kamap ples klia, bai i gat ol klaut?
-----
Mi tokaut long ol manmeri bilong taim bilong yumi olsem ol skripsa i tok promis olsem bai i gat wanpela klaut i konektim wantaim kamap bilong pikinini man bilong man long dispela graun. Nau mi bringim yu dispela nius we i mekim yu kirap nogut olsem i bin gat kain klaut olsem long dispela handet yia - wanpela klaut we saiens i no inap long eksplenim. Sapos ol i ken tok klia long en long rot bilong saiens prinsipol bihain mi no inap bilipim, tasol i no gat wanpela eksplenesen. Mi bin kisim toksave long wanpela man husat mi bilip olsem em i wanpela profet bilong God long dispela taim, Brata William Branham, olsem 7-pela ensel i kam long em na tokaut long ol tok hait bilong buk bilong Revelesen, na kisim em i go antap namel long ol, na taim ol i lusim em, ol i kamapim dispela klaut. Mi no gat as long tupela tingting long dispela tok klia. Klaut i bikpela tumas, i antap tumas, na i mas gat planti wara tumas long en bilong kamap tru; tasol trupela samting i stap yet - em i bin tru. Em i samting we i no bilong man na God i salim i kam olsem wanpela sain long meri i marit.bilong... Acts of the Prophet. - Pearry Green
Daunlodim (Tok Inglis): "Is this the sign of the end Sir"
Ritim ful akaun long... The Cloud. - Pearry Green.
