Obusingye bwÉkanisa ya Laodikea.
“Nyemereire aha rwigi.”
William Branham.Read the full account in...
Obusingye bwÉkanisa ya Laodikea.Okushuuruurwa 3:15-19,
“Nimmanya emirimo yaawe, ku otarikufuka kandi ku otarikwotsya; nangwa kuri noofuka, nari nooyotsya! Mbwenu ahabw'okutagata kooyakooya, otarikufuka kandi otarikwotsya, Niinyija kukutanaka (kuruga mu kanwa Kangye). Noogira oti: Ndi omutungi, ntungire bingi, tiinyine ki nkyenire; kunu torikumanya ku ori enshoberwa, ow'okusaasirwa, omworo, empumi kandi ojwaire busha. N'ahabw'ekyo Ninkuhabura ku Onguraho ezaabu eshemeziibwe omu muriro obone kuba omutungi, n'ebijwaro ebirikwera obone kujwara, orekye kukwatwa enshoni ahabw'okureebwa ojwaire busha, ogure n'omubazi gw'okuta omu maisho, obone kuhweza. Boona abu Nkunda mbateisa kandi mbahana; n'ahabw'ekyo oyezirikye, oyeteise.”Nk'oku twashoma eki hamwe nimpamya ngu mwayetegyereza ku Omwoyo atagambire kintu na kimwe kirungi aha busingye obu. Naahababa kabiri kandi arangirira ekifubiro Kye aharibo.
(1) Okushuuruurwa 3:15,16 “Nimmanya emirimo yaawe, ku otarikufuka kandi ku otarikwotsya; nangwa kuri noofuka, nari nooyotsya! Mbwenu ahabw'okutagata kooyakooya, otarikufuka kandi otarikwotsya, Niinyija kukutanaka (kuruga mu kanwa Kangye).”
Eki twaza kukireeba n'obwegyendesereza. Nikigira ngu ekibiina ky'obusingye obu obw'ekanisa ya Laodikea kiri kooyakooya. Obwa kooyakooya obu nibwetenga ekifubiro ekirikuruga ahari Ruhanga. Ekifubiro eki kiri ngu Naija kubatanaka barugye omu kanwa Ke. Aha niho tutarikwendera kuhaba nk'oku baingi bakora. Nibagamba bataine bwengye ngu Ruhanga naabaasa kukutanaka orugye omu kanwa Ke kandi ngu ekyo nikihamya ngu tiharimu mazima goona omu nyegyesa y'okugumisiriza kw'Abarikwera. Niinyenda kugorora enteekateeka yaawe hati hati. Omushororongo ogu tiguhairwe omuntu omwe. Guhairwe ekanisa. Naagambira ekanisa. Okwongyeraho, ku oraabe oteebirwe Ekigambo noija kwijuka ngu tihariho ahu kirikugamba ngu turi omu KANWA ka Ruhanga. Tusharwirwe omu biganja Bye. Tuheekirwe omu kifuba Kye. Ira na ira omu busingye obutarikumanywa obwire butakabaireho tukaba turi omu biteekateeko Bye. Turi omu itsibikiro ry'entaama Ze, kandi n'omu mariisizo Ge, kwonka titukabahoga omu kanwa Ke. Kwonka niki ekiri omu kanwa ka Mukama? Ekigambo kiri omu kanwa Ke.
Matayo 4:4 “Kwonka We yaamugarukamu ati: Kikahandiikwa ngu, Omuntu tatungwa by'okurya byonka, kureka n'Ekigambo kyona ekiruga omu kanwa ka Ruhanga.” Ekigambo kishemereire kuba omu kanwa kaitu, naitwe. Hati nitumanya ngu ekanisa nigwo mubiri Gwe. Eri hanu omu mwanya Gwe. Ekiraabe omu kanwa k'ekanisa niki? EKIGAMBO. 1 Petero 4:11 “Orikugamba agambe nk'orikugamba ebi ashuururiirwe (Ekigambo kya) Ruhanga.” 2 Petero 1:21, “Ahakuba tihariho kigambo kya baanabi ekyabaire kireetwa okukunda kw'omuntu, kureka abantu bakaba bagamba ebyaruga ahari Ruhanga, nibakoresibwa Omwoyo Orikwera.” Mbwenu n'enki ekishobire aha bantu aba b'omu biro by'aha muheru? BARUGIRE AHA KIGAMBO. TIBAKIKIINIIRE BWEZIRIKI. NIBA KOOYAKOOYA AHARI KYO. Ekyo naaza kukyoreka hati hati.
Ababaputisiti baine enyikiriza n'ebigunjano byabo byegamiire Ekigambo kandi torikubaasa kubatengyetsa. Nibagira ngu ebiro by'entumwa eby'okukora eby'amahano bikahwaho kandi ngu tihariho okubatizibwa n'Omwoyo Orikwera, ahanyima y'okwikiriza. Abametsodisiti nibagira ngu (beegamiire Ekigambo) tihariho okubatizibwa omu maizi (okushukaho amaizi tikuri kubatizibwa) kandi ngu okwezibwa nikwo Kubatizibwa n'Omwoyo Orikwera. Ekanisa ya Church of Christ ehamira aha kubatizibwa kw'okuhindurwa obusya kandi emirundi erikukira obwingi bashuuma omu maizi bari abasiisi aboomire kandi bagarugamu bari abasiisi abajubire. Beitu nibagira ngu enyegyesa yaabo eyegamiire Ekigambo. Gumirizamu kimwe ohikye aha Bapentekoote. Baine Ekigambo? Bagyeze n'Ekigambo haza oreebe. Nibaija kutwara okukyamukirira omu mwanya gw'Ekigambo haihi buri kaire. Ku waakukora eky'okutangaaza nk'amajuta n'eshagama n'endimi n'obundi bumanyiso, ka bibe biri omu Kigambo nari bitarimu, nari yaaba bishoboroirwe gye omu Kigambo, abarikukira obwingi nibaija kukiikiriza. Kwonka n'enki ekibaire aha Kigambo?
Ekigambo kitairwe aha rubaju, n'ahabw'ekyo Ruhanga naagira ati, “Naaza kubarwanisa mwena. Niinyija kubatanaka kuruga mu kanwa Kangye. Egi n'emperu. Omu busingye mushanju bwona, tihariho kindi ki Ndeebire kureka abantu okukuza ekigambo kyabo okukira Ekyangye. N'ahabw'ekyo aha muheru gw'obusingye obu Nimbatanaka kuruga mu kanwa Kangye. Byona byahweire. Eego Naaza kugamba. Eego, Ndi hanu ahagati y'Ekanisa. Ogwo Amiina wa Ruhanga, Omwesigwa kandi ow'amazima naija Kweshuuruura kandi nikwija kuba OKURABIRA OMURI NABI WANGYE.” Oo eego, ekyo nikwo kiri. Okushuuruurwa 10:7 “Kwonka omu biro ebi maraika owa mushanju ariteereramu enzamba ye, enaama ya Ruhanga eryahikiirizibwa, nk'ebigambo ebirungi oku biri ebi Yaagambiire abaheereza Be baanabi.” Nkikyo aho. Naayohereza nabi ohamiibwe. Naayohereza nabi haihi ahanyima y'emyaka enkumi ibiri. Naayohereza omuntu ori hare munonga n'ebibiina by'ediini, obwegyese, n'ensi y'ediini ngu nka Yohaana Omubatizi na Eliya owa ira, aryahurira kuruga ahari Ruhanga wenka kandi naija kuba aine “oku nikwo Mukama arikugira” kandi agambirire Ruhanga. Aryaba akanwa ka Ruhanga kandi WE, NK'OKU KIGAMBIRWE OMURI MALAKI 4:6, ARYAHINDURA EMITIMA Y'ABAANA BAGARUKANE N'ABAZAIRE BAABO. Naija kugarura entoore z'omu biro by'aha muheru reero zihurire nabi ohamiibwe naaha amazima gonyini nk'oku gaahairwe Paulo. Naija kugarura busya amazima nk'oku baabaire bagaine. Kandi ezo ntoore hamwe nawe omu bwire obwo nibo baryoreka Mukama omu mazima kandi babe Omubiri Gwe kandi babe eiraka Rye bakore emirimo Ye. Haleluya! Waakireeba?
Okuteekateeka kw'ahonaaho aha byafaayo by'ekanisa nikiija kuhamya oku ekiteekateeko eki kihikire. Omu Busingye bw'Omwirima Ekigambo kikaba haihi kiburiire kimwe omu bantu. Kwonka Ruhanga akoohereza Luteeri n'EKIGAMBO. Aba Luteeri bakagambirira Ruhanga omu bwire obwo. Kwonka bakeekoramu ekibiina ky'ediini, kandi Ekigambo ekishemeire kyagaruka kyabura ahakuba ebibiina by'amadiini nibyegamira ebigunjano n'enyikiriza z'ediini, kitari KIGAMBO ky'amazima. Bakaba batakibaasa kugambirira Ruhanga. Bwanyima Ruhanga yaayohereza Wesili, kandi akaba ari eiraka n'Ekigambo omu bwire bwe. Abantu abaikiriize okushuuruurirwa kwe okurugire ahari Ruhanga bakahinduka ebaruha ezihuriire ezaabaire zishomwa zikamanywa abantu boona ab'obusingye bwabo. Abametsodisiti ku baaremirwe, Ruhanga yaimutsya abandi n'ahabw'ekyo kigumiizemu omu myaka yoona okuhitsya obu omu biro ebi eby'aha muheru ogundi murundi hariho abandi bantu omu nsi, abu ahansi y'entumwa yaabo bariba iraka ry'aha muheru aha busingye obw'aha muheru.
Eego sebo, Ekanisa “tekigambirira” Ruhanga. Neeyegambirira. N'ahabw'ekyo Ruhanga naagijuukirira. Aryagireetera okushoberwa kurabira omuri nabi n'omugore, ahakuba iraka rya Ruhanga niriija kuba riri omu mugore. Eego nikwo kiri, ahakuba nikigamba omu shuura y'aha muheru ey'omu Kushuuruurwa omushororongo gwa 17 ngu, “Omwoyo n'Omugore nibagira bati: ija.” Ensi neija kugaruka kuhurira kurugira kimwe ahari Ruhanga nk'ahari Pentekoote; kwonka n'ekya buzima ogwo Mugore Kigambo aryayangwa nk'omu busingye bw'okubanza.
Hati Agambire n'eiraka rihango aha busingye obu obw'aha muheru, “Mwine Ekigambo. Mwine Baiburi nyingi okukira obundi bwire, kwonka timwine kintu kyona eki murikukorera Ekigambo kureka okukibaganisamu n'okukitematemamu obucweka-cweka, nimutwara eki murikwenda kandi nimureka eki mutarikwenda. Timurikwenda KUKITUURA, kureka okukihaajaanaho. Nangwa kuri noofuka nari nooyotsya. Kuri mwabaire nimufuka haza mukakyanga, Nkaakigumisiriize. Kuri nimwokyeza kimwe kumanya amazima gaakyo kandi mukagatuura, Nkaakibasiimiire. Kwonka ku murikufa kutwara Ekigambo Kyangye mutakihaire kitiinisa, Naanye omu kubaihura ninteekwa kwanga kubaha ekitiinisa. Niinyija kubatanaka ahakuba Nimunsheshemura.”
Hati omuntu weena naamanya ngu amaizi agari kooyakooya nigo agarikutuma waayenda kutanaka. Ku oraabe nooyetenga omubazi ogurikutanatsya, amaizi agari kooyakooya nigo marungi munonga g'okunywa. Ekanisa eri kooyakooya etumire Ruhanga yaayenda kutanaka n'ahabw'ekyo Agizire ngu Naija kugitanaka. Nikitwijutsya oku Yaayehuriire omwegyemure gutakabaireho. Tikwo kiri?
Oo, kuri ekanisa neefuka nari neeyotsya. Ekirikubikira byona, eshemereire kuba neeyotsya (neebuguma). Kwonka tikwo eri. Orubanja rwaherize kucuubwa. Ekanisa tekiri eiraka rya Ruhanga omu nsi. Neija kuguma neegira ngu niyo, kwonka Ruhanga tikwo arikugira.
Oo, Ruhanga akiine eiraka ahabw'abantu b'omu nsi, nk'oku ahaire omugore eiraka. Eiraka eryo riri omu mugore nk'oku twamara kugamba kandi nitwija kugamba ebirikukiraho ahari ekyo ahanyima.
(2) Okushuuruurwa 3:17-18, “Noogira oti: Ndi omutungi, ntungire bingi, tiinyine ki nkyenire; kunu torikumanya ku ori enshoberwa, ow'okusaasirwa, omworo, empumi kandi ojwaire busha. N'ahabw'ekyo Ninkuhabura ku Onguraho ezaabu eshemeziibwe omu muriro obone kuba omutungi, n'ebijwaro ebirikwera obone kujwara, orekye kukwatwa enshoni ahabw'okureebwa ojwaire busha, ogure n'omubazi gw'okuta omu maisho, obone kuhweza.”
Hati reeba ebigambo by'okubanza eby'omu mushororongo ogu, “ahabw'okuba noogira oti.” Reeba, bakaba nibagamba. Bakaba nibagamba nk'abagambirizi ba Ruhanga. Eki nikihamya buzima eki ngambire ngu emishororongo 16-17 neemanyisa. Kwonka n'obu barikukigamba, ekyo tikirikukihindura ekihikire. Ekanisa Enkatorika egira ngu neegambirira Ruhanga, neegira ngu niyo eiraka rya Mukama ery'amazima. Ku haakuba haarabaireho abantu babi munonga omu mwoyo abu ndamanyire n'aba, kwonka nibaana ebyana ebirikushusha embibo ebarimu kandi nitumanya ei embibo egyo yaarugire, tikwo?
Ekanisa ya Laodikea neegira eti, “Ndi omutungi, ntungire bingi, tiinyine ki nkyenire.” Okwo nikwo yaabaire neeteekateeka ngu nikwo eri. Ekeereeba kandi ekyo nikyo yaareebire. Ekagira eti, “Ndi omutungi,” ekirikumanyisa ngu n'engaiga omu bintu by'ensi egi. Neeyehimbisa ekyo waakigyeragyeranisa na Yakobo 2:5-7 aharikugira hati, “Muhurire, b'eishe-emwe abarikukundwa. Abooro omu nsi egi, Ruhanga tarabatooraine kuba abatungi omu kwikiriza, n'okuba abahunguzi b'obukama obu Yaaraganiise Abarikumukunda? Kwonka nimwanga mugaya ogwo mworo. Abatungi tibo babatwaza eikama, bakababindirana nibabata omu maramuriro? Tibo barogota aha Iziina ry'ekitiinisa eri mwetwa?” Hati TINDIKUGAMBA ngu omuntu omutungi tarikubaasa kuba ow'Omwoyo, kwonka twena nitumanya ngu Ekigambo nikigira ngu ni bakye munonga. Abooro nibo baingi munonga omu mubiri gw'ekanisa y'amazima. Hati mbwenu, ekanisa ku eijura eitungo, tumanya ekintu kimwe kyona; “Ikabodi” kyaherize kuhandiikwa aha marembo gaayo! Torikubaasa kukyehakana, ahakuba ekyo n'Ekigambo.
Read the full account in...
Obusingye bwÉkanisa ya Laodikea.
Obushwere n’Okushenda.
