Aturi ngina a Laodekia.
Our age Laodicea.
William Branham.Tosiomete alo akirot...
Aturi ngina a Laodekia.Apukokino 3:15-19,
“Ayeni ayong ngiticisio kon, nyililim iyong kerai dang nyimwana: okoe, itemokino iyong tolilim kori tomwana! Nai anguna ijalamia, nyililimio kori nyimwania, akalekuni ayong iyong anakituk kang. Anerai ibala iyong abarit ayong, ka ayiakatar ibore daadang, ka emam ibore eitanit, nai nyiyeni iyong atemar icana, irai eka ngipapan, ekuliakit, emudukanoti ka ileri: angun, akalimokini ayong iyong, togielu egolit aneni kang, egolit ngolo ililiunitae ka akim, ikotere itobar. Togielu dang ngilowi ngulu akwangak, ikotere torapia ngileec kon ngulu ilerio. Togielu tari ekitoe ngolo a ngakonyen kon, ikotere tokienyu. Eretakini ka esicani ngulu amina ayong; angun, tomwakutu tokiwa.”Ikwangipei sek asiomere iwon daadang nu anupit ayong atemar idaut iyes aanyun ebe, nyelimuno Ekuwuam idiobore a ne ngini ikamunit aturi na. Elimunit inges ngakitoroneta ngaarei ka alimorit dang etube keng a nguna kec.
(1) Apukokino 3:15,16,
“Ayeni ayong ngiticisio kon, nyililim iyong keraidang nyimwana: ketia kejok kerai tolilim kori tomwana! Aso anguna ijalamia iyong, ikwabo nyimwania keraidang nyililim, ekemmwauni ayong iyong anakitukukang.”Ikilosi iwon akingolikin nu ka acoit. Ebala ebe egurup ngolo ke ekanisa a Laodekia lo erai ngolo jalam. Ido iitanit ajalamu ngin nguna etiakuni Akuj. Nguna etiakuni Akuj ikes nguna ka akimwaun ikes anakituk keng. Erai ne neni ebeit nyikioliyorio iwon ikwa itiyaata ngatukon nguna alalak. Ebasi ikes kan amamut aosou ebe ikimwauni iyong Akuj anakituk keng ido itogogongit nen atemar emame ibore ngini ikoni akiyokino adio ngina ka akitatam ka akidangidangit ngina a ngikakwang. Acamit ayong akiteten atametait kus ngin tokona pei. Emam nyeinakinita engaet lo neni a ipeitunganan bon. Einakinitai neni a ekanisa. Irworo Inges neni ke ekanisa. Ka nabo, erai kiricit iyong Akirot alotooma ngatameta kon iituni iyong atemar emam iwadio neni ebookor Inges ebe, ikiyia iwon NAKITUK ka Akuj. Ikimacarikinitai iwon nakan keng. Ikidakitae iwon anatorobu keng. Ameun alokau alotooma nganyameta nguna emam nyeyenio eringa esaa ayiakai iwon tooma natameta Keng. Ikiyia iwon nanok keng, ka nanomot keng, nai meere jik nakituk keng. Nai nyo eyiai nakituk ke Ekapolon? Eyiai Akirot nakituk keng.
Matayo 4:4, “Nai abu inges tobongok tema, igiritae ebe, mam nyeyiari itunganan anguna ka atap bon, mati ka akirot a daadang angina elomunit anakituk ka Akuj.” Ebeit Akirot toyiai nakituka yok, dang. Ka ikiyeni iwon atemar erai ekanisa akuwuan keng. Eyiai inges ne eyiait akibois keng. Nyobo eyiakaun nakituk a ekanisa? Erai AKIROT.
Petero 4:11,
“Erai kirworo itunganan kirwor inges ikwa ngina eyiakar Akirot ka Akuj.”
Petero 1:21,
“Anerai emam Akirot ngina edwaritae anguna ka acamit a ngitunga, nai erworosi ngitunga nguna kepote aneni ka Akuj, todoikinite Ekuwuam ngolo Akuangan.”
Nyo nai erono alotunga a ngulu ka awasia a lu? ADAUT IKES AEKAR ANAKIROT. MAM NYEROKO NABO IKES ICASITOTOR AKIROT. ALILIMIYOSI ANAKIROT. Alosi ayong akitogogogng ngun tokona-pei.Eyiakatar ngulu abaptist dang akitatam kec ngina elemunito ikes anakirot ido nyipedori iyong akiloilookin ikec. Ebasi ikes ebe alunyar ngarwa nguna kolong a ngikiakia nguna a ngapedorosio ka emam ebatisimu ngolo ke Ekuwuam a ngolo Akuangan, ngolo iriamuni iyong kidau sek akiyiun. Ebasi ngulu a Mesodist (egongakina Nakirot) emam ebatisimu ngolo a ngakipi (akiwat angakipi nyerai ebatisimu) ka tobasi dang ebe, akitokwangunio inges erai akibatisauno a Ekuwuam a ngolo Akuangan. Ewuoi ekanisa angolo enyaritae ebe, ekanisa a Kristo alo batisimu a ngolo kitete ido alotoma ngapakio nguna alalak eloset ikes kwap erai ngikasecak ngulu eokito ka todokut erai todokut kidiama erai ngikasecak ngulu palal. Ka tobasi ebe, akitatam kec ngin inges iriamara ka Akirot. Bua nai nabo neni a ngulu a Pentekost. Eyiakatar ikes Akirot-a? Inak iyong ikes akilo ngina ka Akirot ido kingolik. Epedorito ikes agielar Akirot anguna ka epupe kec a edio a daadang alotooma nginapaki daadang. Erai kipedorit iyong akitiyia ngaumonokineta nguna ka akimiet ka ngaokot ka ngangajepa ka ngakitaanyuneta ngace, ata kerai nakirot kori mam, kori kilocunitai ejok anakirot, erimaar ngikalalak nen. Nai anu etiyakinosi neni ka Akirot? Ewaakin Akirot nawai, angun ebala Akuj ebe, alosi Ayong akitoroniar iyes daadang. Ekemwauni ayong iyes anakituk Kang. Aso anangetakinet ka anyamet a na ekemwauni Ayong iyes anakitukukang. Erikakinosi dadang. Alosi ayong erwor. Ee, ayiai Ayong ne kiding Ekanisa. Amen Ngolo ka Akuj, ekeyiunan ngolo iyookino ebuni Elope apukun ka eruwor kan EKADWARAN KANG.“ Okoe kire, ikote neni.
Apukokino10:7,
“Ka alorwa a ngulu ke eporoto a emalaika a ngolo a ngikanikaarei, ngina ekutakinia inges arupepe, itodolikini Akuj akimunono keng daadang, ikwa ngina kolong kelimokinitor inges ngiketiyiak keng ngikadwarak.”Ikec ngun nen. Elosikinit inges akiyiakiun ekadwaran tar kelunyara ngikaru ngalipio ngarei. Iyiakiuni inges itunganan ngini elwana noi aloriongeta, anaswomit ka alotoma akwap ngina ke edin tosodi ikwa ngina kolong a Yokana Ekebatisan ka Eliya ngolo kolong ye, ebuni inges akipup aneni ka Akuj bon ka toyiakaunor nai nguna ebakai “Irworo Ekapolon ikona ta” ido kirwor anguna ka Akuj. Ebuni inges araut akituk ngina isitiyiae Akuj, IDO INGES IKWAPEI ITEYENIARITERE ALOTOMA MALAKI 4:6, EBUNI AKIBELEKIN NGITAIN A NGIDWE TOMAIKINOS KA NGULU ATA PAPA KEC. Ebuni inges akinyakun ngiseuna ngulu ka apaki angina ka awasia ka epote ikes akiirar ekadwaran ngolo itogogongitoi ngol itatami akiyokino ikwa ngina kolong a Paulo. Ebuni inges akinyakun akiyokino alopite a ngolo kolong keyiakar. Ka ngiseuna ngul kapei ka inges anakolongit angin eraunete ngulu kire itodiarito Ekapolon ka dang toraut akuwuan keng ka toraut eporoto keng ka akitiyia etic keng. Alleluia! Iteete iyes ngun a?
Erai kianyu iyong nguna eyiakasi tooma eemut ngolo ngorot ngolo ke ekanisa ebuni akitodikin iyong akiyookino ngina ka atametait a na. Alotooma apaki ngina a ngaturio a nguna ka akirionut asir Akirot jik angopia daadang aneni a ngitunga. Nai abu Akuj kiyiakiu Lusa ka AKIROT. Apotu ngulu a Lusaran kirworo anguna ka Akuj anapaki angin. Nai apotu kidiniyoros nabo abu Akirot tooliyo anguna ke erionget torauni akitatam ngina erai ngina a ngitunga, topalik arakau Akirot ngina apatanan. Emam nabo Pa erworosi ikec a nguna ka Akuj. Kiyiakiuni nai Akuj Wesili, ido arai inges etoil ngolo ayiakatar Akirot alorwa keng. Ngitunga ngulu apotu yaasi apukokino keng ngina ariamuni inges aneni ka Akuj apotu-toraut ngabaruwae nguna eyiarete nguna asiomete ka toyenete ngitunga daadang alotooma aturi kec. Ngina ebusokinotor ngulu a Mesodist, abu Akuj kitonyou ngice ido apotu ngun torubakis ikote nen alotooma ngikaru paka akitodol akolongit ngina esidio na. Eyiakaun ngitunga ngice nabo tooma nakwap, ngulu alotoma ekiakia kec eraunete etoil ngolo esidion nanyamet ngina esidion.
Ee robo malim. Nyeroko ekanisa erai “ibore ngini irworor” Akuj. Arau inges akerworon anguna keng ka alope. Aso eyiai Akuj amulen inges. Ebuni inges akisibiler ikes alotooma ekadwaran ka ateran, anerai ebuni etoil ka Akuj ayiakaun tooma keng. Ee ikote neni, anerai ebala alotoma ekokoro a ngolo ka awasia alotoma apukokino ngulu cicik 17,
“Ebasi Ekuwuam ka ateran bua, Bua.”
apei rwait nabo ebuni Akwap akiirar nabo aneni ka Akuj ikwa ngina kolong alo Pentekost; ido nai Ateran ngina ka Akirot na ebuni ayiakaun ikwa ngina kolong anaturi a ngina esiaunan.Tokona adau inges akikaloikin aturi ngina esidion na, “Iyiakatar iyes Akirot. Iyiakatar Ngibaibulio adepar, nai emam nguna ityiaete iyes anguna ka Akirot mati ca atiakatiak ka anyilinyil inges, yaete nai nguna icamito iyes bon ka kimiekis nguna nyicamito iyes. Nyikiburit iyes AKIYIAR ikwapei eyiakar inges, nai iraut ngulu imitingaata inges. eitanit sek ayong atipei atemar kerai tolilim iyes kori tomwana. Kori kerai tolilim iyes ido tongero inges, kapedorit ayong aanyun ngun. Erai kerai toraunete iyes ngulu ekwang amwanis. Eketur ayong iyes a ngun. Nai ngina ijemakiniata iyes Akirot kang kimiekis akerar inges, abeit ayong dang akimiekin akerar iyes. Ekemwauni ayong iyes kinga anerai iteleleete iyes etau kang.”
Tokona eyeni nginitunganan daadang atemar erai ngakipi nguna jalam ikitedikakinete iyong anakook kon. Erai kiitani iyong akilek, ngakipi nguna jalam erai ibore ngini ajokan ngini ebeit iyong tomat. Etediakak ekanisa ngolo jalam lo Akuj ido adau Inges akiteyeniar atemar alosi inges akimwaun inges kinga. Kissiitunete iwon ngun epite ngolo kebunio inges topupunio eroko akalele nyebuno, meere-a?
Okoe, eitanit Akuj ebe, kerai torai ekanisa ngolo elilim kori ngolo emwana. Nguna sek ajokak ikes nguna ka (amwanis) keng noi. Nai mam nyemwana inges tokona. Adaun atubokin inges. Nyeroko nabo inges erai etoil ngolo ka Akuj tooma nakwapin. Erubakini inges ebala ebe arai inges etoil ka Akuj, nai ebala Akuj mam.
Okoe, eroko Akuj eyiakar etoil a nguna a ngitunga a ngakwapin, ikwapei ainakinia inges etoil neni ka ateran. Eyiai etoil ngol tooma ateran ikwa ngina sek ikilimunio iwon ka ikilosi iwon erwor nguna alalak ikotere ngun ekau.
(2) Apukokino 3:17-18,
“Anerai ibala iyong abarit ayong, ka ayiakatar ibore daadang, ka emam ibore eitanit, nai nyiyeni iyong atemar icana, irai eka ngipapan, ekuliakit, emudukanoti ka ileri: angun, akalimokini ayong iyong, togielu egolit aneni kang, egolit ngolo ililiunitae ka akim, ikotere itobar. Togielu dang ngilowi ngulu akwangak, ikotere torapia ngileec kon ngulu ilerio. Togielu tari ekitoe ngolo a ngakonyen kon, ikotere tokienyu.”Toanyu mono iyong ageunet ngina ka engaet alo, “anerai ibala iyong.” Toanyu, ayiakasi ikes irworosi. Erworosi ikes ikwa iborosit ngini esitiyiae Akuj. Erai ngin apolou ngina a ngakiro anguna abu ayong atolimu alotoma engaet 16-17. Tar kebasi ikes nen, emam nyitarauni nen ngun akiyookino adio. Ebala ekanisa ngolo a Katolik ebe, irworo inges anguna ka Akuj, tobala ebe, inges erai etoil ngolo a kire ngolo ke Ekapolon. Epite ngolo epedoritotor ngitunga ngice araut ngulu aronok noi alotooma ekuwuam adepar neni sek engolikinitor ayong, nai erayete ikes alopite a ekinyomit angolo eyiai tooma kec, ka ikiyeni iwon neni abunio ekinyomit ngol, meere-a?
Ebala ekanisa ngolo a laodekia ebe, “Abarit ayong, ka ayiakatar ngiboro ngulu alalak ido emam ibore ice ngini eitanit.” Erai ngol epite ngolo epimitor inges eyiakaunitene keng ka alope. Abu inges toripikin bon ido erai ngun ibore ngini abu inges kingolik. Abala inges “abarit ayong.” Inges atemar ebarit inges alotooma ngiboro ngulu ka akwap a na.
Ituro inges aloreet ka akigiret angina eyiai tooma Yakobo 2:5-7,
“Kiirasi ngikaitotoi kang ngulu minan, emam mono nyeseuna Akuj ngulu a ngican anakwapin araun ngikerumak ngulu ka apukan angina ikongit inges neni a ngulu eminasi inges a? Nai ipotu iyes tongero ngolo a ngican, mere mono ngikabarak ikiriyianarete iyes natubokino a? Mere mono ikes iyanyete ekiro ngolo ajokan ngolo ikinyaritere iyes a?”
Tokona EMAM ayong nyatamit ebe nyepedori itunganan ngini abaran araut ngini ke Ekuwuam, nai ikiyeni iwon atemar ebala Akirot ebe ekudioko ikes. Erai ngulu a ngican noi elalak alotoma akuwuan ngina ke ekanisa a ngolo iyokino. Tokona, erai kilelebun ebari lokanisa, ikiyeni iwon ipeibore; adaun akigirakin “icabod” lokekia keng! Nyipegari iyong ngun anerai erai ngin Akirot.Tosiomete alo akirot... Aturi ngina a Laodekia.
