Isambilisho lya kwa Balaamu.
Pergamo. Icipuna ca Bufumu cakwa Satana.
William Branham.Belengeni ili buku...
Inshita ya Lukuta lwa Pergamo.Ukusokolola 2:14,
14 Walikwata uko abaikate sambilisho lya kwa Balaamu uwasambilishe Balaki ukupose ca kupuntwisha ku bana bakwa Israele, ku kubalengo kulya ifyaipailwe amalambo ku tulubi, no kucito bulalelale.Nomba teti mukwate fye imitantikile ya bena Nikola mu lukuta kabili ukwabulo kukwata ili limbi sambilisho ukwisamo, nalyo. Mulemona, nga cakutila mwafumyapo Icebo cakwa Lesa kabili no kwenda kwa mupashi nge nshila ya kupepelamo (abo aba Mpepa balingile uku Mpepa mu Mupashi na mucine) kanshi muli no kupela abantu umusango umbi uwakupepa nge cakupyana, kabili ica kupyanisha cilumbula ubwina Balaamu.
Nga twalaumfwa ifyo isambilisho lya kwa Balaamu lyaba mu lukuta lwa mu Cipingo Cipya tulingile ukubwekela kunuma no kumona ifyo cali mu lukuta lwa mu Cipingo ca Kale no kulibika kuli ilya inshita ya citatu elyo kabili no kulileta mpaka kuli ino nshita.
Ilyashi lisangwa mu Mpendwa Icipandwa 22 mpaka 25. Nomba twalishibo kuti Israele bali abantu abasalwa bakwa Lesa. Bali ba Pentecosti ba bushiku bwabo. Babutukile mukucingililwa pe samba lya mulopa, bonse balibatishiwe muli Bemba Wakashika kabili balipitile ukufuma mu menshi ukwimbila mu Mupashi kabili no kushanina mu maka ya Mupashi wa Mushilo, ilyo Mirriam, kasesema mwanakashi, alishishe malimba wakwe. Cisuma, panuma ya nshita imo iya bulendo aba bana ba Israele baishile kuli Moab. Muleibukisha ifyo Moab ali. Ali umwana mwaume wakwa Lot ukupitila mu mwana mwanakashi wakwe umo, na Lot nao ali umwipwa wakwa Abraham, e ico Israele na Moab bali ulupwa. Ndefwaya imwe mumone cilya. Abena Moab baliishibe cine, nangu baleikalila pali cena atemwa iyo.
E ico Israele aishile ku mipaka ya kwa Moab no kutume nkombe ku mfumu ukuyasosa, “Tuli ba munyina. Lekeni tupite mu mpanga yenu. Nga bantu besu atemwa ifitekwa fyesu fyalya atemwa ukunwa icili conse, tuli no kulipila ne nsansa pali cena.” Lelo Imfumu Balaki alisangalele nganshi. Ilye ntungulushi ya lilye bumba lya bena Nikola tayali no kusuminisha ulukuta ukupita ne fishibilo fya luko ne fipapusho ne filangisho ifya lekana lekana ifya Mupashi wa Mushilo, ne finso fyabo ifyalebalika no bukata bwakwa Lesa. Cali ica kuleto mwenso, pantu kuti alufya bamo mwi bumba lyakwe. E ico Balaki alikene ukuleka Israele ukupitamo. Nakuba, e ico umwenso wakwe wali uukalamba pali bena, icakuti aile kuli kasesema uwa cilambu uwitwa Balaamu no ku mwipusha ukupapatila pakati ka ena na Lesa no kulomba Impalume ku kutipa Israele, no kubalenga ukuba ababula amaka. Kabili Balaamu, pa kufwaisha ukusangwa mu malyashi ya fya ma politiki no kuba umuntu umukalamba, ali ne nsansa nganshi ukucite co. Lelo ukumona ukuti alingile ukupalamako, no kupokelela ubwasuko kuli Lesa ku kulenga abantu batipwe apo tali no kucicita umwine eka, aile mukwipusha Lesa nga enga kwata insambu Shakwe ukuya. Nomba bushe ico tacaba fye nga abena Nikola twakwata naifwe ilelo? Balatipa uli onse ushilekonka inshila yabo.
Ilyo Balaamu aipwishe Lesa ku kupelwa insambu ku kuya, Lesa ali mukenye. Iyee cilya cali kusuma! Lelo Balaki alikonkomeshe, ukumulaya ifilambu ifikulu no bucindami. E ico Balaamu alibwelemo kuli Lesa. Nomba ubwasuko bumo ukufuma kuli Lesa nga bwali ubwalinga. Lelo te kuli Balaamu uwakwete ubufwayo bwakwe. Lintu Lesa amwene ukupondama kwakwe, Alimwebele ukwima no kuya. Bwangu bwangu aninine pali punda no kuya aliile. Nga aliishibe ukuti ici cali fye ubufwayo bwakwa Lesa ubushapwililika kabili nga tabatipile nga aile imiku amakumi yabili no kwesha imiku amakumi yabili. Filya nga Balaamu efyo abantu bali ilelo! Balicetekela muli ba Lesa batatu, bala batishiwa mu fyakulumbwilako fitatu mu cifulo ce SHINA, kabili lelo Lesa akatuma Umupashi pali bena nge fyo Acitile pali Balaamu, kabili bali no kutwalilila ukucetekela ukuti bali fye abalungama nganshi, kabili apa epo bali mucituntulu abena Balaamu abene bene. Mwamona, isambilisho lya kwa Balaamu. Twalilila te mulandu. Cicite munshila yobe. Batila, “Cisuma, Lesa natupala. Kuti caba fye bwino.” Ninjishiba Namupala. Nshilekane co. Lelo ni nshila imo ine iya kabungwe iyo Balaamu asendele. Cabo kukanapelo mucinshi ku Cebo cakwa Lesa. Lyena lisambilisho lya bufi.
E ico Balaamu aile uwafulungana mulya mu musebo mpaka malaika ukufuma kuli Lesa aiminine mu nshila yakwe. Lelo ulya kasesema (bishop, cardinal, chairman, president kabili general overseer) ali uwapofushiwa nganshi ku fintu fya bu Mupashi kwi tontonkanyo lya ku cindikwa no bukata ne ndalama ica kuti talemona na malaika uwaiminine no lupanga naikata. Ulya aliminine ku kucilinganya kasesema uwapena. Punda umunono ali mumwene abutukile uku no ku mpaka mukulekelesha atitikishe ukulu kwa kwa Balaamu ku cibumba ce libwe. Punda ali mininine kabili taendele. Tekuti acicite. E ico Balaamu alitolweke kabili atendeke ukulamuuma. E lyo punda atendeke ukulanda kuli Balaamu. Lesa alekele ulya punda ukulanda mu lulimi lumbi. Ulya punda tali wasankanishiwa; ali ni mbuto ya ntendekelo. Atile kuli kasesema uwapofula, “Bushe ine nshili punda obe, kabili bushe nshikusenda mubufumacumi?” Balaamu alyaswike, “Ee, ee, uli punda wandi kabili ulansenda mu bufumacumi mpaka nomba; kabili nga tawaende, nalakwipaya... iyee! cinshi ici, ukulanda kuli punda? Cintu icakusekesha, na citontonkanya na cumfwa punda alelanda kabili nacila mwasuka.”
Lesa lyonse alandila mu ndimi shimbi. Alilandile ku mutebeto wakwa Belshazzar elyo na pa Pentecosti. Alecicita nakabili ilelo. Cena kusoka kwa bupingushi ubuli mupepi no kwisa.
E lyo malaika alengelwe ukumonekela kuli Balaamu. Aebele Balaamu ukuti pa mulandu wa punda ena ngali uwafwa ilya ine nshita pa kwesha Lesa. Lelo lintu Balaamu alaile ukubwekelamo, alituminwe ukuya nakabili noku konkomeshiwa ku kusosa fye ifyo Lesa amupele.
E ico Balaamu aliile no kupanga ifipailo cinelubali ifya nama ishasangululwa ishelambo. Aipeye sukusuku ukulangisha Mesiya uwali no kwisa. Alishibe ifyo alingile ukucita ukupalama kuli Lesa. Alikwete ifibombelo bwino bwino; lelo te maka; cimo cine nga nomba. Bushe tamulecimona mwebena Nikola? Ulya ali palya Israele palya pe samba mu mupoka poka ukuninika ilambo limo line, ukucita ifintu fimo fine lelo umo fye e wakwete ifishibilo ukumukonka. Umo fye e wali na Lesa pakati kabo. Imimonekele tayakamutwale nangu kumo. Teti isende icifulo ca kulangisha kwa Mupashi. Ici e cacitike ku Nicaea. Balibikilepo isambilisho lya kwa Balaamu, te sambilisho lya kwa Lesa. Kabili baliipunwine; ee baliwile. Baishileba abantu abafwa.
Panuma lintu ilambo lyapangilwe, Balaamu ali uwaiteyanya ku kusesema. Lelo Lesa akakile ululimi lwakwe kabili tekuti abatipe. Ali bapalile.
Balaki alikalipe nganshi, lelo tapali nangu cimo ico Balaamu engacita pa busesemo. Cali landilwe no Mupashi wa Mushilo. E ico Balaki aebele Balaamu ukuya kulya kwisamba, mu mupoka poka, no kulolekesha panuma shabo ku kumona nga teti kube inshila imbi iyo engabatipilamo. Ubucenjeshi ubo Balaki abomfeshe bucenjeshi bumo bwine babomfya ne lelo. Ifilonganino ifikulu filalolekesha pa tumabumba utunono, kabili ne cili conse ico basanga pakati kabo ku kupangilako ilyashi libi balalifumya no kulibilisha. Nga babwikashi bwa nomba baikala mu lubembu, tapali nangu umo usosa akantu pa lwacena; lelo lekeni umo uwa basalwa aye mubwafya ne pepala lyonse ilye lyashi lili no kucibilisha mu nko yonse. Ee, Israele alikwete ifilundwa fyakwe (fya buntunse) fyanuma. Balikwete ulubali lwabo ulushali ulwalinga ukutashiwa; lelo nangula bena bali abashapwililika, ku kupanga kwa kwa Lesa ukutila imilimo ukupitila mu kusala, ni mukusenamina kabili te ku milimo, BALIKWETE IKUMBI MU KASUBA KABILI NE NTUMBA YA MULILO MU BUSHIKU, BALIKWETE ICILIBWE ICAFWANTWA, INSOKA YA MUKUBA KABILI IFISHIBILO NE FIPAPWA. Bali abashininkishiwa_te palwabo abene beka, lelo muli Lesa.
Belengeni ili buku...
Inshita ya Lukuta lwa Pergamo.
