Akamanyiso Ka Mushanju.

<< prev

next >>

  Obumanyiso Mushanju.

Akaceceko omu Iguru.


William Branham.

Read the full account in...
Akamanyiso Ka Mushanju.

Kandi hati nitushanga ngu ekyo, nakyo, nitu... Mukama akatubaasiisa kukwata Ebyahandiikirwe, Ebyahandiikirwe Ebirikwera, ebi Yesu yaagambire ngu nibiza kubaho. Mbwenu tukaabaire tubizoire tuta? Kandi hanu, aija kandi ashuuruura, kandi akireeta gye. Eishomo Rye okwo, naagarukamu ekyo, nirikishoboorera kimwe buzima, omu Bumanyiso mukaaga, kwonka Akatambuuka aka mushanju. Mwareeba? Bwanyima Obumanyiso ku bwabambwirwe, Ruhanga, mwetegyereze hanu, Akatambuuka okushuuruura n'obu kaakuba akabonero k'Aka Mushanju. Mwareeba? N'enaama ya Ruhanga buzima. Mwetegyereze. Hati twaza kushoma omu Baiburi, omu-Akamanyiso ka Mushanju. Ako nikashangwa omu kitabo ky'Okushuuruurwa, eshuura ya 8.

Omwana gw'entaama ku yaabambwire akamanyiso ka mushanju, haabaho akaceceko omu iguru okumara nk'ekicweka ky'eshaaha.
[Kandi ebyo nibyo byonka ebi tukiineho]

Hati, tihariho n'omwe omuriitwe orikumanya. Kwonka, na-naaza kubagambira, omu ku-kushuuruurirwa kwangye kw'Ako Kamanyiso. Kandi, hati, tinkira kurengyesereza omu kwikiriza. Ku ndaabe ndi ntyo, tindikukimanya, mwareeba. Ndi... tintwarwatwarwa n'ebyo ebirimu okwekyeeka n'okwetomboita munonga hamwe n'ebintu by'okuteebereza. Ngambire ebintu bimwe, ebirikubaasa kuba bibaire nk'ebitari bya buriijo aha bantu bamwe. Kwonka Ruhanga ku aija aho, enyima Yaakyo, kandi Akakihamya reero akagira ngu Nigo Mazima, obwo ekyo n'Ekigambo kya Ruhanga. Mwareeba? Nikibaasa kureebeka kitari ekya buriijo, omu buryo obwo. Mwareeba? Kandi hati, buzima nk'oku nyemereire omu kituuti omwebazyo ogu, ntungire okushuuruurirwa okushuurwirwe. Kuri omu muringo gw'enyabushatu. Ebi ndikuza kubagambira, ahabw'okuhwerwa Ruhanga, kumwe ahari okwo Okwenyabushatu. Kandi bwanyima nimu... Ka tubanze, ekyo tukirabemu. Okushuuruurirwa nkuku hanu, okutandika eki ndikwenda kubagambira, eki Kiri. Ekirikubaho, kiri ngu... Ebirikuhinda Mushanju ebyo ebi yaahuriire nibihinda, kandi akazibirwa kubihandiika; ekyo nikyo egyo naama eri, eri enyima y'Ebirikuhinda Mushanju ebyo ebirikuhinda bikurataine.

Hati, ahabw'enki? Reka tukihamye. Ahabw'enki? N'enaama ei omuntu weena atarikumanya. Yohaana akazibirwa Okugihandiikaho, nangwa-nangwa n'okuhandiika akabonero Akagiineho akakwate. Ahabw'enki? Egi niyo nshonga eyaatumire hataabaho ekiriku-ekirikukorwa omu Iguru; kikaabaasa kwata enaama. Hati mwakireeba? [Abateeraine baagira bati, “Amiina.”-Omur.] Ku Karaabe kari kakuru munonga, Nikateekwa kubarirwamu, ahabw'okuba Nikateekwa kubaho. Kwonka Ebirikuhinda Mushanju ku... Hati mwetegyereze. Baamaraika mushanju ku baarugireyo kuteera Enzamba zaabo, hakabaho okuhinda kumwe. [Ow'eish-emwe Branham yaakongoota aha kituuti rimwe -Omur.] Israeli obu yaateeranira hamwe, enzamba ekateerwa. “Obu hataribaho kutuuraho bundi,” enzamba y'aha muheru, okuhinda kumwe. Kwonka hanu hariho Ebirikuhinda Mushanju jubajuba, bikurataine kimwe ahanyima y'ekindi: kimwe, bibiri, bishatu, bina, bitaano, mukaaga, mushanju, egyo namba ehikire. Ebirikuhinda Mushanju bikurataine omurunyiriri, bikagamba ti... nibikora haihi-kimwe, bibiri, bishatu, bina, bitaano, mukaaga, mushanju, jubajuba. [Ow'eishe-emwe Branham yaakongoota aha kituuti emirundi mushanju -Omur.] Bwanyima, Ekyo Eiguru rikaba ritarikubaasa kukihandiika. Eiguru tiririkubaasa Kukimanya, tihariho kintu kyona ekindi, ahabw'okuba tihariho ekintu kyona ekirikweyongyerayo. Bukaba buri obwire bw'okuhuumuraho. Kikaba kiri kikuru munonga, okuhitsya obu, Kyasherekirwe Baamaraika. Mbwenu, ahabw'enki? Sitaane ku Yaakukitunga, naabaasa kushiisha munonga. Hariho ekintu kimwe eki atarikumanya. Hati, naabaasa kushoboorora ekintu kyona eki arikwenda, kandi n'okutooreza buri muringo gw'ekiconco, (nyine amatsiko ngu muriyo nimwega), kwonka Eki tarikubaasa kukimanya. Nangwa tikihandiikirwe n'omu Kigambo. N'enaama eijwire. Baamaraika, buri kintu, kikahunama. Ku bakwehigaho rimwe, kikaabaasa kushohoza enaama, n'ahabw'ekyo bakahunama, baareka kuteera enanga. Buri kintu kikarekyeraho.

Mushanju, enamba ya Ruhanga ehikire. Mushanju, [Ow'eishe-emwe Branham yaakongoota aha kituuti emirundi mushanju -Omur.] bikurataine omu mushorongo. Ebirikuhinda Mushanju bikagambira hamwe jubajuba, orikushusha oti bikaba nibigaiturura ekintu nanka. Mwetegyereze, omu bwire obwo, Yohaaana akatandika Kukahandiika. Yaagira ati, “Otakahandiika.” Yesu Tarakagambireho. Yohaana akaba atarikubaasa Kukahandiika. Baamaraika tihariho ki Barikukamanyaho. Ekyo niki? N'ekintu eki, Yesu yaagizire ati, “Na Baamaraika b'omu Iguru bakaba Batarikukamanyaho” ekintu kyona. Mwareeba? Mwareeba? Akaba Atarikukamanya We wenka. Akagira ati, “Ruhanga Wenka” niwe Orikamanya. Kwonka Akatugambira, ku “turitandika kureeba obumanyiso obu nibureebeka.” Hati haine ahu mwahika? [Abateeraine bati, “Amiina.”-Omur.] Ni kirungi. Mwetegyereze, “nitutandika kureeba obumanyiso obu niburugayo nibureebeka.” Mwareeba? Sitaane ku yaakubaasa Kukatunga...

Ku oraabe nooyenda ngu ekintu kibeho... hati nimuza kwikiriza ebi ndikugamba ahari eki. Ku ndaabe ninteera puraani kukora ekintu, nyine obwengye oburikugasha okutakigambiraho muntu weena. Tikugira ngu omuntu ogwo akaakigamba, kureka Sitaane naija kukihurira. Mwareeba? Tarikubaasa kukiiha, omu mutima gwangye okwo, Ruhanga ku araabe akishembire n'Omwoyo Orikwera, n'ahabw'ekyo ekyo kiri ahagati yangye na Ruhanga. Mwareeba? Tihaine ekintu kyona eki arikukimanyaho okuhitsya obu oraakigambe, reero akihurire. Kandi ngyerizeho... ngambira abantu ngu niinyija kukora ekintu nanka na nanka, kandi ndeeba Sitaane naazibira buri ntambo ei arikubaasa, okukintangaho, mwareeba, okukintangaho. Kwonka ku ndaatungye okushuuruurirwa kuruga ahari Ruhanga, kandi ntakigambeho kintu kyona, obwo kihindukireho. Mwijukye, Sitaane naija kugyezaho kutooreza. Aryagyezaho kutooreza buri kintu eki Ekanisa erikora. Akagyezaho kukikora. Nitukyetegyereza, kurabira omuri antikristo. Kwonka eki n'ekintu kimwe eki atarikubaasa kutooreza. Tiharibaho abarikutooreza ahari eki, mwareeba, 'habw'okuba Tarikukamanya. Tarikubaasa Kukamanya na kakye. N'Okukurura kwa Kashatu. Tarikukamanyaho kintu kyona. Mwareeba? Tarikukeetegyereza.

Kwonka harimu enaama Omwo! [Ow'eishe-emwe Branham yaakongoota aha kituuti rimwe -Omur.] Ruhanga aheebwe ekitiinisa ahaiguru omu Iguru! Tindigaruka kuteekateeka nk'oku ntwire ninteekateeka, ebiro by'amagara gangye byona, ku ndeebire. Hati, tindikumanya eki... nimmanya entambo erikukurataho, kwonka tindikumanya niki, ekyo okukishoboorora. Tikirikwija kumara obwire buraingwa. Mpandiikire ahaifo hanu, obu kibaireho, ku mwakubaasa kureeba hanu, “Rekyera aho. Oteeyongyerayo kurenga ahari eki hanu honyini.” Tintwarwatwarwa okurengyesereza omu kwikiriza. Ningamba Amazima gonka. Kwonka nimwijuka kari kakaito kakye, aku naabaire buriijo ngyezaho kushoboorora oku ngu omutima gukaba guri ahari nanka na nanka, kandi n'eiraka ry'omunda, kandi n'ebintu byona by'omuringo ogwo? Eki, kikareetaho ekibiina kihango ky'abarikutooreza kutandikaho. Oku bashemereire kukwata omukono, n'okukwata abantu, kandi n'okugira okutetema? Buri muntu akaba aine okutetema omu mikono yaabo. Kwonka nimwijuka, ku Yantwaire ahaiguru okwo, kandi Akagira ati, “Oku ni kwa Kukurura kwa Kashatu, kandi tihariho n'omwe Orikumanya.” Ekyo nimukiijuka? [Abateeraine baagira bati, “Amiina.”-Omur.] Okworekwa tikuremwa kuhikiirira. N'Amazima gahikiire kimwe.

Hati mwetegyereze. Nimwijuka okworekwa kw'ekibiina kya Baamaraika? Charlie, ni... Nkiki hanu. Hariho ekirikugyenda omumaisho, naabagambiire, esaabiiti egi, nti mu... Kitwire kiri haihi naimwe, kwonka niinyebuuza ku muraabe mukyetegyereize. Nimwijuka ekibiina, ky'okworekwa kwa Baamaraika, obu nduga hanu kuza Arizona? [Abateeraine baagira bati, “Amiina.”-Omur.] Nimwijuka “Ni Bwire Ki, Baasebo?” [Bati, “Amiina.”- Omur.] Ekyo nimukiijuka? Mwetegyereze, hakaba hariho okubaruka kw'amaani kumwe kwonka kw'okuhinda, reero Baamaraika mushanju baareebeka. Ekyo kihikire? [“Amiina.”] Okubaruka kumwe kw'okuhinda, Baamaraika mushanju baareebeka. Bwanyima naareeba Omwana gw'Entaama naabambuura akamanyiso k'okubanza, naahurira ekihangirwe kimwe ahari ebyo ebiine amagara ebina nikigamba n'eiraka nk'ery'okuhinda kw'enkuba, kiti: Ija (oreebe)! Mwetegyereze, okuhinda kumwe, Obutumwa Mushanju obutwire bukomirwe n'akamanyiso kandi tiburikubaasa kushuuruurwa okuhitsya omu biro by'aha muheru, by'obusingye obu. Nimureeba eki ndikumanyisa?

Hati, mwetegyereize ekicweka ky'omubonano ky'esaabiiti egi? Ekyo nikyo Kiri. Okwo nikwo kitwire kiri. Ti muntu, o-omuntu. Babaire bari Baamaraika ba Mukama. Mwetegyereze. Hariho abajurizi, bashatu, abashutami hanu, abu esaabiiti ehingwire, kakyeho enyima y'esaabiiti ehingwire, nkaba ndi eruguru, enyima hare omu nshozi, haihi na Mexico, n'ab'eishe-emwe babiri abashutami hanu. Nkaba niinyeihaho obukurura, nari enyabarashana, aha kuguru kw'empare yangye ndaingwa; reero habaho okubaruka, oku haihi, kwatetemeise enshozi kukazigwisa ahansi. Hati, ekyo kihikire. Tindagambiire ab'eishe-emwe bagyenzi bangye, kwonka bakeetegyereza omutaano. Kandi Akangambira ati, “Hati yeteekateekye. Za burugwa-izooba. Okushoboorora kw'okworekwa okwo nkuku.“ Mwareeba? Hati, kwenda ngu mukimanye, Ow'eishe-emwe Sothmann tatungire enyamaishwa ei abaire agiire kuhiiga. Tubaire nitugyezaho kugimusherurira. Kandi Yaagira ati, ”Hati, omwebazyo ogu, nk'akamanyiso ahariiwe, tarikuza kugibona. Nooteekwa kweyeza omu bwire obu ahabw'okutaayaayirwa kwa Baamaraika aba.“ Kandi nkahurira naaruga omu buteeka, nimwijuka. Kandi nkaba ndi burengyerwa-izooba. Baamaraika bakaba nibaija burugwa-izooba. Kandi ku Baahikire aho, nkaterurwa hamwe Nabo, (ekyo nimukiijuka?) kuruga burugwa-izooba.

-----
Kandi mwetegyereize? “Maraika omwe ogwo,” nkagira nti, “omunda omwo, hakaba harimu Maraika otari wa buriijo.” Akandeebekyera kuba ow'omutaano munonga okukira abandi Abo boona. Ekyo nimukiijuka? [Abateeraine bati, “Amiina.”] Bakaba bari omu kibiina; bashatu aha rubaju rumwe, kandi n'omwe aha mutwe. Kandi ogwo ompikire haihi munonga hanu, waabara okuruga bumosho kuza buryo, akaabaire ari Maraika owa mushanju. Akaba naakiraho okumurinkana, akambeera ow'omutaano munonga okukira abandi Abo. Nimwijuka? Nkagira nti, “Akaba atunukire ekifuba batyo, kandi akaba naaguruka naatoora burugwa-izooba” (nimwijuka) “batyo.” Nkagira nti, “Kikanterura; kyanyimutsya ahaiguru.” Ekyo nimukiijuka?

Ngugu hanu, ogwo oine Akamanyiso ka Mushanju, ekintu eki nyebuurizeho obwire bw'amagara gangye goona. Amiina! Obumanyiso obundi obwo bukamanyisa kihango ahariinye, n'ekya buzima, kwonka, oo, timurikumanya eki Aka kamanyiise, omurundi gumwe omu magara gangye! [Ow'eishe-emwe Branham yaakongoota aha kituuti emirundi mingi -Omur.] Nkashaba, naatakira Ruhanga. Nka-nka-nka... Ahanyima y'oruteerane orwo orwa Phoenix... Omuntu weena, owaabaire ariyo hamwe naanye, naamanya. Nkaraara omu nshozi. Akasheeshe kamwe, nkaimuka kandi naaza eruguru omu Nengo ya Sabino, enshozi ezo z'amaani, zisinikire amaino, ndaingwa. Kandi nkanyegyerayo okwo. Kandi hariyo ekirari kikye ky'ebigyere, waaheza kutsiga omuhanda, ogurikunyegyera kuza omu Rushozi rwa Lemmon, orugyendo rwa mairo makumi ashatu, haihi nka fuuti makumi ashatu, z'orubaare eruguru okwo.

N'ahabw'ekyo, eruguru omu rushozi, kare munonga eizooba ritakajwire, niinyegyera kuraba omu kirari eki kikye eky'ebigyere, omu nkiri z'enkurungu. Nkeehuriramu nyebembeirwe okuhindukira oku. Kandi nkahinduka, kandi naanyegyera kuza omu nkiri z'amaani zimwe, ezishongoize, oo, mugyenzi, amagana n'amagana ga fuuti okuza ahaiguru. Kandi nkafukama ahansi ahagati y'enkiri ezo. Naata ahansi Baiburi egi, kandi naata ahansi ekitabo eki... akabaaho kakye aka. [Ow'eishe-emwe Branham yaayoreka Baiburi ye n'akabaaho -Omur.] Naagira nti, “Mukama Ruhanga, okworekwa oku nikumanyisa ki? Ndi-ndi-ndi...” Naagira nti, “Mukama, ni... Nikumanyisa okufa kwangye?” Nimwijuka, nkabagambira nti, “Nkateekateeka ngu nikibaasa kumanyisa okufa kwangye, 'habw'okuba ekintu kikabaruka okuhitsya obu kyantiiniise munonga.” Nimukiijuka. Nibangahi abarikukimanya, abaakihuriireho? [Abateeraine baagira bati, “Amiina.”-Omur.] Ahabw'enki, buzima, mwareeba, mwena. Kandi nkateekateeka ngu kikaabaasa kumanyisa okufa kwangye. Kandi bwanyima omu kishengye, nkagira nti, “Kikaba... Kikaba-kikaba-kikaba kiri ki, Mukama. Ninikimanyisa ki? Nikimanyisa ngu ninza kufa? Ku kiraabe nikwo kiri, ni kirungi, tindikwija kugambira eka yangye. Reka nyegyendere, mwareeba, omurimo gwangye ku guraabe guhweire.” Kandi naagira... Hati, kikaba kiri ki? Kwonka Akagarura obujurizi, nimwijuka ndikubagambira, ngu kikaba kitari ekyo. Kukaba kuri okweyongyerayo kw'omurimo gwangye.

Oo, oo, oo! Mwakyetegyereza? [Abateeraine bati, “Amiina.” -Omur.] Mwareeba? Kandi nshutami eruguru omu Nengo ya Sabino... Tata ow'omu Iguru eki naakimanya. Buzima nk'oku murikureeba ekyo kirikubaho, Baamaraika abo bakaija baashuumira kimwe kandi baahamya buri Butumwa ku ni bumwe. Obwo, nimumanya bwaba niburuga ahari Ruhanga, nari ngaaha. Bukaragurwaho ahariimwe, omu kworekwa. Nkaba ntarikubaasa kubagambira okuhitsya aha muheru gwa zaasaaviisi ezi, 'habw'okuba nkazibirwa kubagambira. Omu Nengo ya Sabino, nshutami eruguru okwo akasheeshe ako, nkaba nyimukize emikono ahaiguru. Kandi ebyangye... Omuyaga gukaba gunagire ahansi enkofiira yangye ekuzire erikwiragura. Ku... Nkaba nyemereire aho, nyimukize emikono ahaiguru, ninshaba. Naagira nti, “Mukama Ruhanga, eki nikimanyisa ki? Tindikubaasa kukyetegyereza, Mukama. Nkore ki? Ku buraabe buri obwire bwangye bw'okutaaha, ka nyegyere eruguru hanu, ei batarimbona. Tindikwenda omuntu weena kuba naatonzya hanu, ku ndaabe ningyenda. Ni-niinyenda ngu eka yangye eteekateekye ngu nkaza omu rugyendo. Kandi ei batarimbona. Gira ahu wanshereka. Ku ndaabe ninza kugyenda, ahabw'enki, reka ngyende. Shana Yosefu aryazoora Baiburi yangye erambikire hanu, ekiro kimwe, kandi reka Agikorese. Mwareeba, ku ndaabe ningyenda, reka ngyende, Mukama.”

Kandi nkaba nyimukize emikono yangye. Kandi, ahonaaho, ekintu kyagwa omu ngaro zangye. Tindikumanya. Tinkaabagambira. Nkagwejegyera? Tindikumanya. Nkaba ndi nk'ori omu turo? Tindikumanya. Kukaba kuri okworekwa? Tinkaabaasa kubagambira. Ekintu kyonka eki ndikubaasa kugamba n'eki ndi... Ekintu nikyo kimwe nka Baamaraika abo oku baabaire bari! Kandi kikagwa omu ngaro zangye. Kandi nkareeba, kandi ekaba eri rurara. Kandi ekaba eine ekirindi ky'omuhendo mwingi, kiboneire munonga; kandi kikaba kiine ahaiguru yaakyo eky'okurinda engaro okutatirimuka zikasharwa obwogi, ky'ezaabu. Kandi ekyogi kya rurara egyo kikaba nikireebeka nk'ekintu ekiri nk'ekyoma ekigumire kirikwengyengyeta, nk'efeeza, kureka kikaba nikyengyengyeta munonga. Kandi ekaba ekazire munonga nk'obwogi bw'egirita, oo, mugyenzi! Kandi nkateekateeka nti, “Ekyo t'ekintu ekirikukirayo kubonera!” Yaahika gye omu ngaro zangye! Nkateekateeka nti, “Eboneire munonga. Kwonka nti,” naagira nti, “iwe, buriijo ntuura nintiina ebintu ebyo, rurara.” Naateekateeka nti, “Ndyagikoresa ki?” Kandi omu kaanya ako Eiraka ryashuuma kurabira aho, eryatetemeise enkiri. Ryagira riti, “Ni Rurara y'ogwo Mugabe!” Reero naakurugamu. “Rurara y'ogwo Mugabe.” Hati, kuri Ryagizire riti, “Rurara y'omugabe...” Kwonka Rikagira riti, “Rurara y'ogwo Mugabe.” Kandi hariho omwe wenka “ogwo Mugabe,” kandi ogwo ni Ruhanga. Kandi Aine Rurara emwe, ekyo n'Ekigambo Kye, ekimbaisizeho. Ekyo, mpwera Mukama, Ruhanga; nyemereire enyima y'emeeza Ye erikwera hanu, n'Ekigambo eki ekirikwera kiri hanu! N'Ekigambo! Amiina!

Oo, ka n'ekiro kikuru eki tutwiremu! Ka n'ekintu kikuru! Mwareeba egyo naama n'omubonano? Ekya kashatu... Nyemereire aho obu eki kyandugaho, Ekintu kikaija ahariinye kandi kyagira kiti, “Otatiina.” Hati, tindahuriire eiraka ryona. Nk'omunda yangye hakagira, ekyagamba. Ninteekwa kubagambira amazima, buzima kwo ekyabaireho. Ekintu kikateera, kandi kyagira kiti, “Otatiina. Eki ni kwa Kukurura kwa Kashatu.” Okukurura kwa Kashatu! Nimukiijuka? [Abateeraine bati, “Amiina.” -Omur.] Akagira ati, “Ogizire abarikutooreza baingi munonga ahari eki, eki waagyerizeho kushoboorora. Kwonka,” ati, “Eki nangwa otakigyezaho.” Nimukiijuka? Nibangahi abarikwijuka okworekwa okwo? [“Amiina.”] Ahabw'enki, kuri hoona. Kukwatsirwe aha ntambi z'amaraka, na buri hantu. Ekyo kimazire nk'emyaka mukaaga ehingwire, emyaka mushanju ehingwire. Kimazire emyaka mushanju ehingwire. Yaagira ati, “Ekyo otagyezaho Kukishoboorora.” Yaagira ati, “Oku n'Okukurura kwa Kashatu, kwonka nimwo ndikwija kukubugana.” Ekyo kihikire? [“Amiina.”] Yaagira ati, “Otagyezaho...”

Nkaba nyemereire nyine aka-akakaito kakye k'omwerere obu Yangambira. Yaagira ati, “Hati tandika Okukurura kwawe kw'Okubanza. Kandi ku oraakikore, eky'enyanja nikiija kwirukira kukwata omududu gw'aha irobo.” Yaagira ati, “Bwanyima oreebe Okukurura kwawe kwa Kabiri,” yaagira ati, “ahabw'okuba nikiija kuba eky'enyanja kikye kyonka.” Yaagira ati, “Bwanyima Okukurura kwa Kashatu kuryakikwata.” Kandi abo baheereza boona bakanyehinguririza, baagira bati, “Ow'eishe-mwe Branham, nitumanya ngu noobaasa kukikora! Haleluya! Ow'eishe-mwe Branham!” Aho niho buriijo mboherwa, n'ekibiina ky'ababuurizi. Mwareeba? Ninkunda abantu. Nibenda ngu oshoboorore buri kintu, eki, kiri.

Kandi naagira nti, “Mpaho, uh, uh, uh,” naagira nti, “tindikumanya.” Naagira nti, “Naamanya kushoha. Mbwenu,” naagira nti, “hati, ekintu eki orikubanza kukora... Ogu nigwo muringo ogu kirikukorwamu. Nooreeba eby'enyanja byona aha hoona; oshemereire kujabura omududu gw'aha irobo.” Mpaho, obwo nibwo bukoryo bw'okushoha buzima. N'ahabw'ekyo naagira nti, “Jabura omududu gw'aha irobo. Hati, nimureeba, ku naajabwire omududu gw'aha irobo, omurundi gw'okubanza, hati eky'enyanja kyairuka kyagukurata.” Kwonka bukaba buri obw'enyanja buto. Kandi obwo ni nk'obu baabaire nibakwata. N'ahabw'ekyo na-naagira nti, “Bwanyima nimwinimwija kuta...” Kandi nkagujaburayo naaguta aha nkungu. Kandi naakwata eky'enyanja, kwonka kikareebeka nk'oruhu aha mududu gwa aha irobo, kikaba kiri... kakaba kari kakye munonga. Kandi bwanyima nkaba nyemereire aho, reero Ekintu kyagira kiti, “Naakugambiire ngu ekyo otakikora.” Naatandika okurira. Omugoye gw'okushohesa gwona gukaba gunyeshobenkeineho, nka bati. Kandi nkaba nyi... nkaba nyemereire aho, nindira, nyinikire omutwe gwangye nka batyo. Naagira nti, “Ruhanga! Oo, na... Nsaasira! Ndindi omuntu omushema! Mukama, otakora... Nsaasira.” Kandi nka-nkaba nyine ogu mugoye gw'okushohesa. Kandi ekyo, eki naabaire nyine omu ngaro zangye, kakaba kari akakaito kakye k'omwereere, nk'ak'oburaingwa burikwingana butyo. Kandi nkaba nyine omuguha ogwo, ogwabaire nigwingana nk'orukumu rwangye omu buhango, nk'ekicweka kya inci, nka batyo. Kandi akaina omu nkaito egi kakaba kari nk'ak'ekingano kya... kakye munonga okukira ki-kimwe ky'ebicweka ikumi na mukaaga, obundi, kya inci, omu kaina ako. Kandi nkaba ningyezaho okutsiba akakaito kakye aka, n'omuguha ogu muhango gw'amaani ogurikwingana inci omu buhango. Ha! Eiraka ryaija, ryagira riti, “Torikubaasa kwegyesa Abapentekoote abeereere ebintu ebirengire eby'obuhangwa.” Riti, “Hati, barugyeho!”

Kandi omu kaanya ako Yanterura. Yantwara ahaiguru, yanshutamya ahaiguru munonga ahu oruteerane rwabaire nirugyenda omumaisho. Rikaba nirireebeka nk'eihema nari ekanisa mpango nkuru y'obureeberezi, y'omuringo ogundi. Kandi naareeba, kandi hakaba hariho ekibokisi kikye, nka batyo, kiine omwanya mukye omunda. Kandi naareeba Omushana ogwo ogwabaire nigugamba n'omuntu, ahaiguru yangye, ogwo Mushana ogu murikureeba aho aha kishushani. Gukeetooroora gwandugaho, nka batyo, kandi gwaza ahaiguru y'eihema eryo. Reero gwagira guti, “Niinyija kukubugana kuriya.” Kandi gwagira guti, “Oku nikwija kuba Okukurura kwa Kashatu, kandi Otakagambira omuntu weena.” Kandi omu Nengo ya Sabino, Akagira ati, “Oku n'Okukurura kwa Kashatu.” Kandi hariho ebintu bikuru bishatu ebirikugyenda Nakwo. Kandi kimwe kyashuuruurwa eriizooba... nimmanyisa nyomwebazyo; ekindi kyashuuruurwa eriizooba; kandi hariho ekintu kimwe eki ntarikubaasa kushoboorora, ahabw'okuba kiri omu rurimi orutarikumanywa. Kwonka nyemereire aho honyini kandi naakireebera kimwe. Kandi oku n'Okukurura kwa Kashatu okurikwija. [Ow'eishe-emwe Branham yaakongoota aha kituuti emirundi eshatu -Omur.] Kandi Omwoyo Orikwera wa Ruhanga... Oo, mugyenzi! Egyo niyo nshonga eyaatumire Eiguru ryona ryaceceka.

Read the full account in... Akamanyiso Ka Mushanju.


Melekizedeki Ogu N’oha?

English Newsletter Site.

Ekitabo
ky'Okushuuruurwa.

Rushozi Sinai. Meriba.
- Archaeology.

Okutwarwa.

Engiri ya Yesu Kristo.
Kristo akafa
ahabw'ebibi byaitu.

Mweteise,
mwena mubatizibwe...

 

Kicu.

Nyomyo y'omuriro.

Ekyo kiro ahari
Gologosa.

Ekigambo ekihuriire.

 

Bwire bw'emperu.
Obushwere n’Okushenda.
Kibanja kya Edeni.
Bikaba bitari
bijuma bya apo.

Obwaruhanga obwa
Yesu Kristo.

Acts of the Prophet.

(English)

Archaeology.
Sodoma na Gomora.

Obumanyiso Mushanju.

Emibonano ya
Babulooni.

Akamanyiso.

Runyakitara Obutumwa.

  Baiburi neegira ngu...

Yohaana okushuuruurirwa omuzingo gw'akatabo Kandi nkareeba maraika ondiijo ow'amaani naashuma naaruga omu iguru, ayefubikire ekicu, n'omuhangazima guri ahaiguru y'omutwe gwe; ah'amaisho ge nihaaka nk'eizooba, n'amaguru ge nk'enyomyo z'omuriro.

Akaba aine omuzingo gw'akatabo kashuurwirwe omu ngaro ze. Yaata ekigyere kye kya buryo aha nyanja n'ekya bumusho aha nsi;

yaagamba n'eiraka rihango nk'oku entare etsinda; kandi ku yaagambire, ebirikuhinda mushanju byagamba.

Okushuuruurirwa 10:1-3


Click on an image to download PDFs or fullsize picture.


Ebyafaayo
By’Amagara Gangye.

(PDF)

Oku Maraika Yaizire
Ahariinye,...
(PDF)

Aka Niko Kamanyiso K’emperu, Sebo?

(PDF) - Mt Sunset.
Where cloud appeared.

Chapter 11
The Cloud

(PDF English)

Chapter 14
- Sabino Canyon

(PDF English)

Chapter 9
- The Third Pull

(PDF English)

Ekyo nikyo egyo
naama eri, eri
enyima y'Ebirikuhinda
Mushanju ebyo
ebirikuhinda
bikurataine.



Message Hub...Choose your Language and download Free Messages from Brother Branham